coved ad

तःदँ न्ह्यः तंगु मूर्ति जात्रा याना यथास्थानय् लित हल

नेवा: अनलाइन न्युज – निश्चल | २०७८ पौष २५, आइतबार २०:३१:४८

थनिं करीव पीदँ न्ह्योनिसें तनाच्वंम्हकथं कयातःम्ह पद्मपाणी लोकेश्वर (करुणामय)या आकर्षक व तःधंगु मूर्ति छावनीया राष्ट्रिय संग्रहालयलय् शुरक्षित रुपं तयातःगु अवस्था दुगुलिं उगु मूर्तिअभियन्ता तथा सम्पदा संरक्षण अभियानया संयोजक यादबलाल कायस्थ लगायतया सहकार्यय् प्रक्रिया पुरा याना उम्ह लोकव्हाम्ह द्यः पद्मपाणी लोकेश्वर (करुणामय) द्यःया वासस्थान नक्सालय् बाजं सहित जात्रा याना म्हिगः छावनिं नक्साल यंकुगु खः ।

थुकथं द्यःयात जात्रा याना नेपाली सेनाया विशेष बग्गीलय् तयाः यंकेगु याःगु खःसा थुकथं जात्राया झ्वलय् पद्मपाणी लोकेश्वर (करुणामय) यात नेपाली सेनाया बाजं (गुर्जुको पल्टन) लिसें विशाल जन समुदायलं लुसकुस याना जात्रा याना नक्साल थ्यंकेगु याःगु खः ।

जात्राया झ्वलय् थीथी स्थानं वःपिं बाजं खलःपिन्सं नं बाजं धिमे थाना द्यःयात भक्तजन सहितं धुं धुपाय् ज्वना ताय् व्हाला लसकुस याना सांस्कृतिक वातावरवणय् नक्साल थ्यंकूगु खः । थुकथं द्यःयात नक्सालय् बिज्याकेगु झ्वलय् बग्गीलय् च्वना बौद्ध विद्धान प्रा। डा। नरेशमान बज्राचार्य, सुृरेन्द्र रत्न तुलाधर लगायतपिंन्सं स्वागत यानादिगु खः । 

गु मूर्ति नक्सालय् थ्यने धुंकाः गुर्जुपिन्सं नं लँ धुछिं लसकुस यायगु ज्या जूगु खः । नापं शंकर कीर्ति विहारय् मूर्तियात बज्रयानी विधिकथं पुजाआजा याना वास लाया लसकुस याना दुत बिज्याकेगु ज्या जूगु खः । मूर्तियात यथास्थानय् तयधुंकाः गुर्जु प्रा। डा। नरेश मान बज्राचार्य सहितया गुर्जुपिन्सं पुजाआजा याना बिज्यागु खः ।

थुगु द्यःयात पोहेलाथ्व अष्टमिया दिं अर्थात पुष २६ गते सोमवाः नक्सालस्थित शंकर कीर्ति बिहारय् होम सहितया विशेष पुजा याना मूर्तियात स्थापना याइगु जूगु दुृ ।

कामनपा वडा नं। १ नक्सालस्थित शंकर कीर्ति बिहारया प्रांगणं २०३४ सालय् थुगु मूर्ति खुया यंकूगु कथं कयातःगु दु । थुगु मूर्ति तनेधुंकाः मुर्ति माला वनेगु क्रमय् राष्ट्रिय संग्रहालय छाउनी लूगु खः ।

बुखँ ग्वाहालिः सम्यक वाःपौ

Categorized in स्थानिय-समाज