zero media family planning adv

तःजिक क्वचाल स्वक्वःगु नेपालभाषा साहित्य नखः

नेवा: अनलाइन न्युज – ललेन्द्र शाक्य | २०७६ मङ्सिर ८, आइतबार १३:२२:३२

नेपालभाषा साहित्यया विकास उलि बांलाक जुयाच्वंगु अवस्था मदुगुलिं नेपालभाषाया पुलांगु व न्हूगु पुस्तापिन्सं साहित्य सिर्जना याना च्वंसां तबि नं उगु साहित्ययात बाँलाक ब्वना बिइपिं पाठकपिं मदयाच्वन धैगु थौं कन्हय् व्यापकरुप चर्चा परिचर्चा जुयाच्वंगु दुृ । थुज्वःगु अवस्थायात गुकथं समाधान याना वने मालिइ धैगु छगू बःचाःधंगु ज्या धैगु हे साहित्यकार व पाठकपिनिगु भेला नं खः ।

चर्चा थ्वहे खँया छुं हद तक जुसां नं तिबः बिइगु कथं नेपालभाषा साहित्य ख्यलय् समर्पित जुयाः थःत साहित्यकारया रुपय् स्थापित यानाच्वंपिं व यायेत कुतः यानाच्वंपिं न्हूपिं व पुलांपिं पुस्ताया च्वमि व ब्वमिपिन्त छथाय् तयाः स्वक्वःगु नेपालभाषा साहित्य नखः ने.सं. ११४० कछलागा दसमि व द्वादसि (मंसिर ६ व ७ गते) निन्हुयंकं यानाः  क्वचाःगु दु ।

येँया प्रज्ञा भवनया चकं दबुलिइ जूगु साहित्य नखः ज्याझ्वलय् न्हयगू (७ गू) नेपालभाषाया सफू विमोचन यानाः नेपालभाषा साहित्य धुकुतिइ सफूत  तँसाया रुपं  थप यायेगु ज्या जूगु धैगु साहित्य सिर्जनाया झ्वलय् झीपिं अझ नं त्यान्हु मचाःनि धैगु दसि न्ह्योब्वःगु दु  ।

उगु नेपालभाषा साहित्य नखतय् नेपालभाषा ख्यःया थीथी च्वमिपिन्सं च्वःगु नेपालभाषा साहित्यया रचना पाठ नं याःगु खः । थुकथं रचना पाठ यायेगु ज्यां नेपालभाषा साहित्यकारपिन्त थः साहित्यकार जुयाः वयाच्वनागु दु धकाः स्वकुमिपिन्त क्यनेगु, थःगु आत्म गर्व यायेगु व आत्म विश्वासयात अझ थकायेगु ज्या जूगु दु ।

थुकथं हे थुगु ज्याझ्वलय् नेपालभाषाया साहित्य च्वमिपिंलिसेया अन्तरक्रिया ज्याझ्वः नं जूगु खः । थुगु ज्याझ्वलं याना साहित्यकारपिन्सं थःत गुकथं न्ह्योब्वया च्वना व साहित्य रचनाया सवालय् थःम्ह थःत गुकथं पानाः वयाच्वन  धकाः नं पाठकपिन्सं सीका कायेगु आधार चूलानाच्वंगु दु । 

थुगु साहित्य नखःया झ्वलय् नेपालभाषा संकिपाया अवस्था थौंया इलय् गुकथं जुयाः न्ह्यां वनाच्वन व आः गुकथं याना वनेमाली धैैगु लिसेंया खँयात कयाः अन्तरक्रिया ज्याझ्वः नं उत्साहजनक रुपं हे जूगु खः । थुगु ज्याझ्वलय् निर्माता व कलाकारं थौंया इलय् संकिपाया ख्यलय् खनेदया वयाच्वंगु खँ न्ह्योब्वःगु खःसा समाधान थुकथं यानावने माली धैगु खँय् थःगु धारणा नं पितव्यूगु खः । सहजकर्ताया रुपय् राकेश महर्जनं न्ह्याकूगु थुगु ज्याझ्वलय् विजयरत्न असंबरे, आर्यम नकःमि, ओमचरण अमात्य व आशिष्मा नकःमिपिन्सं ब्वति कया थःथःगु धारणा पितव्यूगु खः ।

उगु ज्याझ्वलय् न्हापांगु दिं खुम्ह च्वमिया न्हय्गू सफू उलेज्या याना नेपालभाषा साहित्य ख्यःयात अझ तव्याः याना वनेगु कुतः जूगु खः । थुकथं उलेज्या जूगु सफूया नां कायेबलय् मथुरा सायमिया आत्मकथा ‘सायमि जि मथुरा’, गजलकार भुषणप्रसाद श्रेष्ठया गजल मुना ‘नुगःया गुनगुन’, च्वमि साहित्यकार राजेन्द्र कुमार पुताया गजल मुना व सैद्धान्तिक खँ ‘गजलया सिद्धान्त व नेपालभाषा गजल व सुथया लिसः’, राज सायमिया जासूसी उपन्यास ‘तुयुगु अजः’, कवि बासुदेव अधिकारीया नेपाली भाषापाखें भाय् हिलातःगु चिनाखँ मुना ‘युरो स्पर्श’ व च्वमि साहित्यकार उद्धव मास्केया नियात्रा ‘छगू नन्द देसय्’ नांया  खः ।

उगु सफूया उलेज्या मूपाहाँ येँया मेयर विद्यासुन्दर शाक्य, नेपालभाषा एकेदेमिया चान्सलर चित्तरञ्जन नेपाली, नेपालभाषा मंकाः खलःया नायः जनकवि दुर्गालाल श्रेष्ठ, किपू नगरपालिकाया मेयर रमेश महर्जन व नेपालभाषा मंकाः खलःया न्वकू मल्ल के. सुन्दरपिन्सं उत्सुकता पूर्वक यानादीगु खः । उगु ज्याझ्वलय् नेवाः न्ह्यलुवाः मल्ल के सुन्दरं पिदंगु न्हयगू सफूया बारे बःचाहाकलं समिक्षा यानादीगु खः ।

नेपालभाषा साहित्य नखः हना ज्याझ्वलय् विश्वय् हे  बय् बय् जुयाः वयाच्वंगु नेपाःया रञ्जना लिपियात कया नं अन्तरक्रिया ज्याझ्वः जूगु खः । थौंया इलय्  रञ्जना लिपियात गथे यानाः संरक्षण व प्रचार प्रसार याना यंकेफइगु अवस्था दु धइगु विषयवस्तुयात कःघाना थुगु अन्तरक्रिया ज्याझ्वः नेपाल लिपि गुथिया निरञ्जन तवः, आनन्द महर्जन, सुनिता डंगोल व सुयोग्य ताम्राकारपिं लिसे जूगु खः । लिपिया ज्ञाता भाजु निर्मल बज्राचार्य सहजकर्ता जुया न्हयाकादीगु थुगु ज्याझ्वलय्  नेपाःया लिपिया विकासया नितिं थुकथंया ज्याखँत याना वनेमालिगु अवस्था व थौंकन्हय् नेपाल लिपि गुथिं न्ह्याकाः हयाच्वंगु ज्याखँय् आधारित जुया थुगु अन्तरक्रिया जूगु ज्या लिपियात विकास याना यंकेत हपाः जूवनिगु खनेदु ।

आइतवाः न्हापांगु सत्रय् उपन्यासकार मथुरा सायमिलिसे च्वमि राजेन मानन्धरं वय्कःया साहित्यिक यात्रायात कयाः अन्तरक्रिया ज्याझ्वः न्ह्याकादीगु खः ।

उगु ज्याझ्वलय् येँ महानगरपालिकया मेयर विद्यासुन्दर शाक्य, नेपालभाषा टाइम्स न्हिपौया सम्पादक लिसें साहित्य नखः ग्वसाः खलःया न्वकू सुरेश मानन्धर, ज्याझ्वःया सभापति एवं ग्वसाः खलःया कजि साहित्यकार रमेशकाजी स्थापित, जनकवि दुर्गालाल श्रेष्ठ लिसेंया पिन्सं थःथःगु नुगः खँ प्वंकादीगु खः ।

थुगु ज्याझ्वलय् म्ये हालेगु व ख्यालः क्यने ग्वसालय् थुकथंया साहित्य नखः हनेगु ज्याझ्वः वंगु स्वदँ न्ह्यःनिसे यानावयाच्वंगु खः ।

थुगु हे ज्याझ्वलय् नेपालभाषा चीहाः संकिपा कासा ग्वसाः खलःया ग्वसालय् जूगु नेपालभाषा टाईम्स चिहा संकिपा सिरपाःया निंतिं जूगु कासाय् सिरपाः इनेगु ज्या नं जूगु खः । शहरी विकास पूर्वाधार राज्यमन्त्री रामबीर मानन्धरं थुगु सिरपाः इनादीगु खः ।

उगु कासाय् योवन शाक्यया  ‘ध्व छध्वः रेखां क्यूगु’ न्हाप जुया न्हय्न्याद्धः (७५,०००) तकाः,  रजिन महर्जनया ‘मिउजियम’  ल्यू जुया  न्यय्द्धः (५०,०००) तका व  लियांल्यू जूगु निगू संकिपा रामकृष्ण खडगीया ‘स्वार्थ’ व दर्शनबीर शाक्यया ‘ईन्द्रायणी’यात म्हतिं नीन्याद्धः (२५,०००) तका हनापौ लिसें लःल्हाःगु खःसा कासाय् ब्वति काःगु मेगु झिंप्यंगू चिहा संकिपायात म्हतिं न्याद्धः न्याद्ध (५,०००) तका दांया हःपाः सिरपा कथं लःल्हायेगु ज्या नं जूगु ख ।

उगु कासाया सिरपा क्वःछिना मल्ल के सुन्दर, रमेशकाजी स्थापित, गौरीशंकर धुँजु, राजकृष्ण श्रेष्ठ, रजिला श्रेष्ठ, मानिक उराय व विजयरत्न असंबरेपिं दुथ्याःगु पुचलं याःगु खः ।

Categorized in नेवाः