नेवा: अनलाइन न्युज – विजयरत्न | ने.सं. ११४४ चिल्लागा चिल्लागा नवमि (२०८१ बैशाख २० गते ) बिहिवाः

नांजाःम्ह लोकंह्वाःम्ह बरिष्ठ म्येहालामि जुजुकाजी रंजितया याकः सांगितिक कन्सर्ट दक्षिणकालिया छैमले रिसोर्टय् तःजिक क्वचागु दु ।

पेजथ्री बाःछिपौया प्यसः ल्याः पिदंगु लसताय् छैमले रिसोर्टय् जूगु उगु कन्सर्टय्  पेजथ्री बाःछिपौया सम्पादक व ज्याझ्वःया परिकल्पनाकार लिसें कजि दर्शनवीर शाक्यं लसकुस यानादीगु खः ।

पेजथ्री पत्रिकाया हरेक २५ अंक लिपा छुं नं छुं ज्याझ्वः जुयाःच्वंगु व पेजथ्री बाःछिपौया झिंगुदँया इतिहास कंसें प्यसः ल्याः पिदंगु लसताय् थुगु पेजथ्री सनिल कन्सर्टया ग्वसाः ग्वःयागु जानकारी दर्शनवीरं बियादीगु खः ।

ज्याझ्वःया शुरुवातय् हे जुजुकाजी रंजितया क्लासिकल व सिग्नेचर म्ये कथं न्हापांगु नेवाः संकिपाः “सिलु” पाखें ‘बांलाः मय्जु बांलाः’ हालादीगु खः । अनलिं ‘छन्त लुमंकाः’ व ‘लुँस्वां लुयाः’ हालादीगु खः ।

किपूया नांजाःम्ह म्येहालामि रत्नशोभा महर्जनं “छु जुल रे” म्ये व “मिखाया अजल ”ं जुजुकाजी रंजितलिसे ज्वः म्येहालादीगु खः । थुगु म्ये लिपा “छंगु लुमन्तिइ दुबि दुबि थें” व “छंगु म्हगः गुलि बांलाः” न्यंकादिल ।

अनं हाकनं रत्नशोभा महर्जनया सलय् “छल याना जुसां ज्यु” बोलया म्ये न्ह्यब्वःगु खः । थ्व धुने वं हे मेगु ज्वः म्ये “मकः जन्म कायेमाली” न्ह्यब्वःगु खः ।

जुजुकाजी रंजितया मेगु सिग्नेचर म्ये “नापच्वने मदुसा” नं हाःगु खःसा थनं लिपा रत्न शोभा महर्जनया सिग्नेचर म्ये “लिक्क वयाः” न्यंकादीगु खः । अथेहे, “यःसां मयः पहः” ज्वः म्ये न्यंकाः ज्याझ्वःया लिपांगु ब्वज्या कथं “छन्त जि धात्थें यःगु खःसा” हालाः कन्सर्ट ज्याझ्वः क्वचायेकूगु खः ।
सेभेन वण्डर्स ब्याण्डं साथ ब्यूगु थुगु कन्सर्ट ज्याझ्वलय् ब्याण्डपाखें नं छपू थःगु हे प्रस्तुति देछाःगु खःसा लोकंह्वाम्ह म्येहालामि रत्नशोभा महर्जनं जुजुकाजी रन्जितयात साथ बियादीगुखःसा ज्याझ्वः कल्पना बज्राचार्यं न्ह्याकादीगु खः ।

ज्याझ्वलय् म्येहालामि जुजुकाजी रंजितयात पेजथ्री सम्मान लिसें झिंन्याद्व तका नगद नं लःल्हाःगु खः ।

बागमति प्रदेश संस्कृति पर्यटन व सहकारी मन्त्री शैलेन्द्रमान बज्राचार्यं थुगु सम्मान लःल्हाःनादीगु खः । अथेहेतुं ईलोहं प्रकाशनया प्रबन्घ निर्देशक नरेशवीर शाक्यं दोसल्लां न्ययेकाः सम्मान यनादीगु खः ।

\ज्याझ्वलय् पेजथ्री पत्रिकापाखें पिदंगु जुजुकाजी रंजित विशेषांकया पितब्वज्याया नापनापं स्केच आर्टिस्ट अर्पिता शाक्यं च्वयातःगु जुजुकाजी रंजितया स्केच पोष्टर नं लःल्हाःगु खः ।

ज्याझ्वलय् छैमले रिसोर्ट या नापनापं यलया १६ वडा कलाकार समितिं नं जुजुकाजी रंजितयात सम्मान कथं हनापौ लःल्हाःगु खः ।

किपाः – विक्रम खड्गी

Categorized in कला