1142 nhoo dan adv

तं लिसे होसियार जुयादिसँ

२०७२ मङ्सिर १, मंगलबार १४:५१:०४

तं ला सकस्यां वइ । छितः नं वः जुइ । गुलिसितं छता–छता खँय् हे तं पिहां वयाच्वनी । गुलिसितं म्वाय्कं म्वाय्कं हे तं वइ, अले गुलिसितं खःगु खँय् नं तं वइ । गुलिसितं आपाः तं वइ, गुलिसितं म्हो जक । गुलिं तं चायाः थम्हेसित हे हानि यानाच्वनी, गुलिसिनं मेपिन्त हानि यानाबी । गुलिसितं आर्थिक हानि जुइ सा गुलिसित शारीरिक, मानसिक वा बांलाःगु सम्बन्धया हानि जुइ । तमं दुस्परिणाम अर्थात बांमलाःगु लिच्वः हे पिथनी बी ।
छिके तं गुगुं मतभेदया हुनिं असमझदारीया हुनिं वा छुं इच्छापूर्ति मजूगु हुनिं वा मेगु हे छुं हुनिं वःगु जुइफु । तर उकियात ताःहाकय्क तयातल धाःसा व तं छिगु जिद्दिइ हिलावनी व वहे जिद्दी छिगु अहंकार जुयावी । मस्तय् जिद्दीया छगू उदाहरण स्वयादिसँ, छथाय् छम्ह मनू न्यादँ तक तापालय् च्वनावःगु । वयेवं वं जःला खःलाय् व त्वालय् थः पासापिन्त कन्हय् खुन्हु नयेत थःगु छेँय् सःतल ।गुलि न्हाइपुसे च्वंक थः पासापिन्त नयेत सःतूम्ह । वयाथाय् कन्हय् खुन्हु सन्ध्या काःइलय् न्ह्इपुकेत हे वंपिं मनूत वया छेँय् दुहाँ वने ला मवने ला जुल ।


वया १६ दँ दुम्ह म्हाय् व १२ दँ दुम्ह काय् निम्हं घोरघोर ल्वानाच्वंगु जुयाच्वन । अबु म्हेस्यां म्हाय्यात धकाः कीमति घडी छगः व काय्म्हेसित बाँलाःगु हे ज्याकेत हयाब्यूगु जुयाच्वन । तर निम्हेस्यां हे घडी माः धकाः ल्वापु थलाच्वंगु जुयाच्वन । अन्तय् काय्म्हेसिनं उगु घडी हे लाकाकयाः वांछ्वयाः तछ्याना बिल ।
संभवतः तताम्हेस्यां निन्हुप्यन्हु घडी न्ह्यानाः किजाम्हेसित बीगु नं खइ । तर आः पश्ताय् चानाः लिमलात । उलि जक मखु, अबुम्हेस्यां थः पासापिनि न्हयःने गुलि म्हाइपुके माल जुइ ।
तर थुकियात सामान्य क्षतिया कथं जक काःसां छुं पाइमखु, झीसं थुज्वःगु आपालं उदाहरण खनागु दु, गुकी तमं यानाः मनूतय् परिवार हे स्यंगु दु जीवनय् थुकथं नकारात्मक ह्यूपाः हयाब्यूगु दु कि व आः पकां पर्के फइमखु ।
नूपुर व रविया प्रेम विवाह जूगु जुयाच्वन । झिदँ तक इमि जीवन न्ह्यइपुक हे न्ह्यात । तर वयांल्यू इमि दथुइ जूगु खटपटं थुज्वःगु ह्यूपाः हयाबिल कि इपिं चिचीधंगु खँय् नं छम्हेस्यां मेम्हेसिया दोष खनीगु जुयावल । थुकथं हे जुजुं वंबलय् छक्वः नूपुर नापसं च्वंगु छेँय् भूबाःगु लँ सुइकः वःबलय् भाःतम्ह रवि अफिसं थ्यंकः वल । मस्त म्हितः वनाच्वंगु, उकिं नूपुरं छेँय् तालं ग्वयाथकूगु जुयाच्वन ।

 

थ्वहे खँय् तमं मि जूम्ह रविं नूपुरयात खनेवं हे छक्वलं झम्टे यात, इमि ताःहाकःगु हे ‘डिस्कस’ जुल । अन्ततः निम्हेस्यां हे थवं थवय् नमतुइगु वाचा नयााः सुम्क च्वन । अर्थात इमिसं तं ताःहायेकल । प्रेम विवाह याःगु हुनिं नूपुर थःछेँय् नं वनेफुगु मखु । इमि दथुइ छुं सम्वाद मजू । खाली जा थुयाः जा नकल, नल वन, उलिं तुं । थुकिं यानाः रवि अय्लाः त्वनाः लिबाक्क लिबाक्क दुहां वइम्ह जुल । गुबलें ला द्यं मवइगु नं जुल । मस्तसें गुबलें अबुया ख्वाः स्वइगु, गुबलें मांम्हेसिया । नूपुरं फुक्क खँ वाःचायेकल, व स्वयं उदास व दुःखी जुल । तर अहं ल्यनाच्वंगुलिं हे वं थः क्वमालि जूवने मफु । क्वमालि जू वनेगु हे गथे यानाः ? थ्व स्यंगु सम्बन्ध अझ भयंकर रुपं हे वं पिदनेफुगु खः, यदि वया पासापिसं सुझाव यिबा मछ्वःगु खःसा ।
थुकिं सीदु, तं धइगु काचाक्क वयाः तनावं थें जूसां उकिं मेमेगु रुप कयाः गुलि ग्यानापुकेयः । उकिं तमं याइगु नोक्सान तत्कालीन जक जुइगु मखु, दीर्घकालीन नं जुइयः । तमं वचे जुइत झीसं उदार प्रवृत्ति नाले फयेके माः व मुख्यतः तंयात जिद्दी व अहंकारय् हीके मवीत तच्वकं सचेत जुयाच्वनेमाः। – अजय