coved ad

ढाका म्याराथनय् नेपाःया पुष्पां त्याकल कास्य पदक, मिजं कासामिपिन्सं त्याकेमफुत पदक

नेवा: अनलाइन न्युज – ललेन्द्र शाक्य | २०७८ पौष २६, सोमबार १३:०२:१२

बंगलादेशय् जूगु बंगबन्धु शेख मुजीव ढाका म्याराथनय् नेपाःया धावक पुष्पा भण्डारीं कास्य पदक त्याकूगु दु ।

दक्षिण एसियाली क्याटेगोरीपाखे पुष्पा स्वंगूगु थासय् लाःगु खः । थ्वसिबें न्ह्यः वंगु दँ पुष्पां वहे क्याटेगोरीइ स्वर्ण पदक त्याकूगु खः ।

तर थुगुखुसि भारतीय कासामिपिंलिसे ल्यूने लासें पुष्पा स्वंगूगु थासय् लाःगु खः । पुष्पां निर्धारित दूरी निघौ व ५५ मिनेट ३५ सेकेण्डय् पूवंकूगु खः ।

पुष्पां वंगु दँ निर्धारित दूरी निघौ व ५९ मिनेट ४१ सेकेण्डय् पूवंकूगु खः । पुष्पां टाइमिङ सुधार याःसां नं स्वर्ण पदक रक्षा यायेमफुत ।

नेपाली टिमया प्रशिक्षक चन्द्र गुरुङं थुगुखुसि भारतया धावकपिं बांलाः जूगु धाःगु दु ।

भारतया आरती दत्तात्रय पाटिलं निघौ व ५३ मिनेट २८ सेकेण्डय् ब्वाकासा पूवंकाः स्वर्ण पदक त्याकूगु खःसा भारतया हे ज्योति गवाटें निघौ व ५४ मिनेट १५ सेकेण्डय् दूरी पूवंकाः रजत पदक त्याकूगु खः ।

नेपाःया मिजं कासामिपिन्सं त्याकेमफुत पदक

अथेहे, नेपाःया निम्ह मिजं कासामिपिन्सं नं दक्षिण एसियाली कोटाय् धेंधेंबल्ला याःगु खः । तर इमिसं छुं नं पदक धाःसा त्याकेमफुत ।

नेपाःया किरण सिंह बोगटी निघौ व २३ मिनेट ४३ सेकेण्डय् ब्वाकासा पूवंकाः न्यागूगु थासय् लाःगु दु । शीर्ष प्यम्हय् भारतीय कासामिया पकड दुबलय् बुगाथा स्रिनुं निघौ व १६ मिनेट २६ सेकेण्ड ईलिसें स्वर्ण पदक त्याकल ।

प्रशिक्षक गुरुङं किरण व मेम्ह कासामि नरेन्द्र सिंह रावतं बांलाःगु ई पिकाःसां नं पदक धाःसा त्याकेमफूगु खँ धाःगु दु ।

Categorized in कासा