prabhu baink new

डा. राममान श्रेष्ठप्रति प्रचण्ड, सभामुख सापकोटा व नेवाः राष्ट्रिय मुक्ति मोर्चां बिचाः हायेकल

नेवा: अनलाइन न्युज – Rakesh Maharjan | २०७७ आश्विन ३०, शुक्रबार २१:१८:२०

येँ – वामपन्थी व्यक्तित्व एवं प्राध्यापक डा. राममान श्रेष्ठ मदुगुली नेकपाया अध्यक्ष पुष्पकमल दाहाल प्रचण्ड, सभामुख अग्नि सापकोटा लिसें नेवाः राष्ट्रिय मुक्ति मोर्चां बिचाः हायेकूगु दु ।

प्रोस्टेट क्यान्सरया उपचार याकुयाकुं हे वय्कः थौं शुक्रवाः येँया सिभिल अस्पतालय् सुथय् ९ः३० ताः इलय् मदुगु खः । ८२ दँया मदुम्ह श्रेष्ठया जहान व म्ह्याय् नं मदयेधुंकूगु दुसा आः वय्कःया छम्ह काय्, भौ व छय् दनि ।

राष्ट्रिय सभाया न्हापायाम्ह दुजः श्रेष्ठ प्राज्ञिक व्यक्तित्वकथं नं म्हस्यू ।

मदुम्ह श्रेष्ठ त्रिभुवन विश्वविद्यालय गणित विषयया प्राध्यापक, नेपाल प्राध्यापक संघया पूर्वसभापति, नेपाल बुद्धिजीवि परिषद्या पूर्वनायः, त्रिभुवन विश्वविद्यालयया पूर्वशिक्षाध्याक्ष नं जुयादी । वय्कलं विसं २०५४ सालय् तत्कालीन नेकपा (एमाले)पाखें राष्ट्रियसभा सदस्य जुयादीगु खः ।

सत्तारुढ नेपाल कम्युनिष्ट पार्टी (नेकपा)या नायः पुष्पकमल दाहाल प्रचण्डं पार्टीया पूर्व केन्द्रीय सल्लाहर प्रा.डा. राममान श्रेष्ठया निधनं थःत मर्माहत जूगु धयादीगु दु ।

दाहालं दिवंगत श्रेष्ठयात श्रद्धाञ्जलि प्वंकुसें दुःखं कःपिं छेँजःपिंत समवेदना नं ब्यूगु दु ।

अथेहे, राममान श्रेष्ठ मदुगु बुखँं थःत मर्माहत याःगु धासें सभामुख अग्निप्रसाद सापकोटां मदुम्हेसित श्रद्धाञ्जलि नं देछायादीगु दु ।

अथे हे, शुक्रवाः छगू शोक विज्ञप्ति पिथँसें नेवाः राष्ट्रिय मुक्ति मोर्चा, नेपाःया नायः पवनमान श्रेष्ठं राममान श्रेष्ठया निधनं वामपन्थी आन्दोलन, नेवाः जातिया आन्दोलनय् अपूरणीय क्षति जूगु खँ कनादीगु दु । मदुम्ह श्रेष्ठप्रति बिचाः हायेकाः शोकसन्तप्त छेँजःपिनि धैर्यधारणया कामना नं विज्ञप्तिइ यानातःगु दु । मदुम्ह श्रेष्ठ नेवाः राष्ट्रिय मुक्ति मोर्चाया केन्द्रीय सल्लाहकार जुयाच्वनादीम्ह खः ।

 

Categorized in राजनीति