prabhu baink new

डा. केसीयात प्रहरीं चान्हय् अस्पताल यंकल, वासः मयाकेगु अडान

नेवा: अनलाइन न्युज – ललेन्द्र शाक्य | २०७७ आश्विन ४, आइतबार १२:१७:५३

जुम्लाय् आमरण अनसनय् च्वनाच्वंम्ह डा. गोविन्द केसीयात प्रहरीं बलपूर्वक अस्पताल थ्यंकूगु दु । चान्हय् थ्यंमथ्यं ११ ता इलय् प्रहरीं डा. केसीयात जुम्लाया रानीचौरय् च्वंगु बाबिरामष्ट देगः परिसरं कर्णाली स्वास्थ्य विज्ञान प्रतिष्ठान यंकूगु खः ।

१९ क्वःगु सत्याग्रहरय् दुम्ह डा. केसीया स्वास्थ्य अवस्था कमजोर जूगु धासें चिकित्सकपिन्सं अस्पताल यंकेत सुझाब ब्यूगु खः । तर डा. केसी अस्पताल वनेत मानेमजूगु खः ।

थःत अपहरणया शैलीं अस्पताल यंकूगु धासें डा. केसीं छुं नं उपचार मयाकेगु धाःगु दु । डा. केसीं धाःगु दु, माग पूवंकेगु पलेसा जितः अपहरण यानाः हयेगु ला ? जि छुं नं उपचार, मोनिटरिंग काइम्ह मनू मखु ।

नोवेल कोरोना भाइरस कोभिड १९ या पीसीआर परीक्षण ब्यापक यायेमाःगु, निःशुल्क गुणस्तरीय शिक्षा व स्वास्थ्यय् समान पहुँचया सुनिश्चितता जुइमाःगु लिसेंया माग तयाः २९ भाद्रनिसें डा. केसी जुम्लाय् अनसन च्वनाच्वंगु दु ।

डा. केसीं विगतय् सरकारं थःलिसे याःगु सम्झौता कार्यान्वनय जुइमाःगु माग तकं तःगु दु ।

Categorized in राजनीति