coved ad

डान्सिङ आइटम म्ये ‘नाच न माया नाच न...’ ज्वनाः अबु व म्ह्याय् कृष्णभक्त व सोनम (भिडियो)

नेवा: अनलाइन न्युज – ललेन्द्र शाक्य | २०७८ पौष १२, सोमबार १३:०२:२४

संगीत ख्यलय् बिस्कं म्हसीका न्ह्यब्वयेत ताःलानाः च्वनादीम्ह यलया ऐतिहासिक बस्ती सुनागुथिया संगीतकःमि कृष्णभक्त महर्जनं थः म्ह्याय् सोनम महर्जनलिसे डान्सिङ आइटम म्ये ‘नाच न माया नाच न...’ ज्वःम्ये हालाः बय् बय् जुयाच्वंगु दु । थुगु म्येया म्यूजिक भिडियो ओएसआर डिजिटल युट्युब च्यानलय् डिसेम्बर १७ स अपलोड जूगु खःसा आःतकया थुगु म्येया भ्यूअर्स ८८,००७ म्ह थ्यंगु दु ।

कृष्णभक्त महर्जनं हे च्वयादीगु व लसय् हनादीगु थुगु म्ये हरिशरण सायमिं संगीत संयोजन व मिक्स मास्टर यानादीगु खः ।

बिजु पार्की व कविता नेपालीया दमदार अभिनय व हुलाप्याखंपाखें स्वकुमिपिनिगु नुगः त्याकेत ताःलाःगु थुगु म्येया म्यूजिक भिडियोया सिनेमाटोग्राफी पवन सुस्लिङ खःसा मेकअप आर्टिष्ट अनिता ग्वाछा खः ।

अथेहे, पवन सुस्लिङं हे भिडियो सम्पादन यानादीगु थुगु म्येया म्यूजिक भिडियोया ग्राफिक्स सिदान्त मगरं यानादीगु दु ।

क्रियटिम मोसन पिक्चर्स प्रा.लि.पाखें पोष्ट प्रोडक्सन यानातःगु थुगु म्येया म्यूजिक भिडियोया कोरियोग्राफर प्रमोद भण्डारी खःसा निर्देशन सोनाम पाख्रिनं यानादीगु दु ।

बिस्कं बिस्कं पहःया म्ये न्ह्यब्वयेगुलि माहिरम्ह संगीतकःमि कृष्णभक्त महर्जनं थुगु ‘नाच न माया नाच न...’ म्ये न्ह्यः आपालं उत्कृष्ट म्ये व म्यूजिक भिडियो स्वकुमिपिनिगु नितिं बिइधुंकूगु दुसा संगीतकःमि महर्जन नेपालभाषा संगीत ख्यलय् नं लोकं ह्वायेत ताःलाःगु म्येत स्वकुपिन्त बिइत ताःलाःम्ह संगीतकःमि खः ।

यलया सुनागुथिया स्थानीय बासिन्दा कृष्णभक्त महर्जन थौंकन्हय् सकल छेँजःपिं हङकङय् च्वनादी । थःगु व्यवसायया लिसेलिसें अन हङकङय् च्वनाः थःगु मांभाय् नेपालभाषा व खस नेपाली भाषाया संगीत ख्यःयात तब्या यायेगु आज्जुं निरन्तर रुपं पलाः न्ह्याकाः वयाच्वनादीगु दु ।

संगीतकःमि कृष्णभक्त महर्जनं थः म्ह्याय् सोनम महर्जनयात नं संगीत ख्यलय् हे स्थापित यायेत ताःलाःगु दु । आः नकतिनि पिदंगु ‘नाच न माया नाच न...’ डान्सिङ आइटम म्येय् नं थः म्ह्याय् सोनम महर्जनलिसें स्वयं कृष्णभक्त महर्जन थःम्हं हे सः बियादीगु दु । थुगु म्येया विश्लेषण यायेगु खःसा थुगु म्ये व्यवसायिक म्ये जुइत ताःलाःगु दु । अबु व म्ह्याय् निम्हेसिगुं यइपुगु व कर्णप्रिय सलं समाः यानातःगु थुगु म्येपाखें झी नेवाः ख्यःया संगीतकःमिपिं नं खस नेपाली भाषाया संगीतकःमिपिं स्वयां छुं कम मजू धैगु दसि क्यनाच्वंगु दु थुगु म्ये ‘नाच नं माया नाच न...’पाखें ।

संगीतकःमि कृष्णभक्त महर्जन छम्ह प्रतिभावान तबलाबादक खः । तबलाबादक जक मखु कि संगीतकःमि कृष्णभक्त महर्जनं हार्मोनियम थानादी, म्ये लसय् हनादी, थःम्हं हे म्ये नं च्वयादी । कृष्णभक्त महर्जन सुनागुथिया श्रीगणेश भजन मण्डलय् आबद्धम्ह संगीतकःमि खः । वय्कलं हरिसिद्धि जलया बरिष्ठ संगीतकःमि निरञ्जन महर्जनयात थः गुरुया रुपं नालादी ।

वय्कः न्हापा रेडियो नेपालय् तबलाबादकया जागिरे खः । रेडियो नेपालया जागिर त्वःताः वय्कः हङकङ झायादीगु खः । अनं लिपा थः सकल छेँजःपिं थौंकन्हय् हङकङय् हे च्वनादी ।

नेपालभाषा संगीत ख्यलय् संगीतकःमि कृष्णभक्त महर्जनया आपालं लोकंह्वाःगु म्येत दु । उगु म्येत मध्ये कृष्णभक्त महर्जनं हे च्वया, लसय् हनाः हालादीगु म्ये ‘ह्याउँगु मल्ता म्हाः वाउँगु तुकं म्हाः...’ अतिकं लोकंह्वाःगु म्ये खः ।

(थन क्लीक यानाः भिडियो स्वयादिसँ)

Categorized in कला