नेवा: अनलाइन न्युज | २०७६ श्रावण ३१, शुक्रबार १७:४४:४३

छुं ई न्ह्यः वैज्ञानिकतय्सं याःगु छगू अनुसन्धानय् कम्प्यूटरया कीबोर्डय् असंख्य मात्राय् किटाणुत दयाच्वनीगु खँ सार्वजनिक याःगु यक्व मदुनि ।
आः वयाः हाकनं वैज्ञानिकतय्सं याःगु मेगु खोजय् मोबाइल फोन ट्वाइलेट स्वयां नं फोहर जुइगु खँ धाःगु दु । मोबाइलं ट्वाइलेटय् थें नँ वइ ला मखु, तर छगू ट्वाइलेट सिटय् स्वयां अप्वः मोबाइल सेटय् किटाणुया ल्याः अप्वः दइ ।
अमेरिकाया एरिजोना विश्वविद्यालयया शोधकर्तातय् कथं मोबाइल थीथी मनूतय्गु ल्हातय् लाइ व इलय््ब्यलय् थीथी थासय् नं तइ । थथे याइबलय् हरेक पटक मोबाइल सेटय् न्हूपिं किटाणु संक्रमित जुइगु ह्वःताः दइ । विद्युतिय सामान जूगुलिं थुकियात लखं सिले मज्यू । उकिं मोबाइल सेटय् न्हियान्हिथं किटाणुया ल्याः अप्वयाच्वनी, अर्थात् मोबाइल सेट किटाणुतय्गु छेँ जूवनी ।
तारन्ताः ल्हाः सफा मयासें हे मोबाइल ज्वनीबलय् जक मखु, फोनय् खँ ल्हाय्बलय् सासःया माध्यमं म्हुतुं तकं किटाणुत मोबाइल सेटय् सरय् जुयाच्वनी । थुकथं मोबाइल सेटय् करोडौंया ल्याखय् थीथी किटाणुत च्वनाच्वंगु दइ, गुपिं मध्ये गुलिखे हानिकारक नं जुइ ।
मोबाइल फोन ट्वाइलेट स्वयां नं फोहर जुइगु थ्व अध्ययनया निचोड लिपा आः विश्वय् मोबाइल लगायतया ग्याजेटत सिले ज्यूगु वा सफा याये ज्यूगु छुं क्लिनिङ प्रोडक्ट उत्पादन यायेगु पाखे सम्भवतः छुं कम्पनीत न्ह्यचिलीगु विश्वास यानातःगु दु ।
छुं ई न्ह्यः तिनि लखं सिले ज्यूगु किबोर्ड उत्पादन जूथें हे आः लखं सिले ज्यूगु मोबाइल फोन नं उत्पादन मजुइ धकाः धाये मफु ।
मोबाइल फोन झीगु जीवनशैलीया छगू अभिन्न भाग जुइ धुंकूगु दु । तर थ्व अभिन्न अंग थुलिमछि फोहर जुइ कि गुकिं झीत हे गिजय् यानाच्वंगु दु व ल्वय्या खतरा अप्वयेका च्वंगु दु । तर झीसं थ्व ख“ सि हे मस्यू ।
मोबाइल फोनयात ग्वलंग्वः हे सिलाः सफा याये ला मज्यू, तर इलय्ब्यलय् पिनेया खोल हिलेगु व पिनेया ब्वय् कापः प्याकाः हुइगु व दुनेया ब्वय् नं ब्रसं सफा यायेगु बांलाइ ।