1142 nhoo dan adv

ट्राजिक रेलिफ (नर्मदेश्वर प्रधानया ख्यालि न्हिलि च्वसु)

नर्मदेश्वर प्रधान

नांजाःम्ह अभिनेत्री रेखा थापां धाइ, ‘छविलिसे जि झिंनिदँ नापं च्वना । कलाः–भाःतया रुपय् । तर जि कुमारी हे तिनि ।’ पत्रिकाय् ब्वने । भचा तं पिहांवइ । भचा भचा हीमी चाये । मखु थ्व सिनेमा ख्यःया सेलिब्रिटी धाःपिंसं थःत छु खनीगु थें ? लाक्व पाक्व खँ बके याना जुइ । वमन याना जुइ । मन्त्रं मगाःपिं बोक्सीत थें । अभिनेत्रीलिसेया सरोकार वया प्रतिभा, कलाकारितालिसे जुइ । दर्शकतय्त वं गुलितक प्रभावित यायेफत । उकिया महत्व दइ । तर ‘जि कुमारी अझं’ । कलाकारिता, प्रतिभालिसे थ्वया छु स्वापू ? छु मतलब ? थन अभिनेत्री सेलिब्रिटी धाःपिनि योग्यता, कलाकारिता, प्रतिभा स्वयां नं इमिसं छु नल, गुलि द्यन, इपिं श्रीमान, ब्वाइफ्रेण्ड लिसे गुलि सन, गय् सन ? थुज्वःगु उल्का खँ जुयाबी । जुयाच्वनी । थुज्वःगु हे विषय थःगु शान क्यनाः अभिनेत्री, सेलिब्रिटीत जनताय् आकर्षित जुइत स्वइ । केन्द्रविन्दु जुइत स्वइ ।

थन छम्ह मेम्ह अभिनेत्रीया अन्तर्वार्ता लुमंकेमाली । ‘जि अझं नं सतप्रतिशत कुमारी !’ जिं उबलय् थ्व विषय नं च्वयागु खः । शतप्रतिशत कुमारी धाःगु छु ? कुमारीत्वया नं प्रतिशत धइगु दइ ला ? कि कुमारी । कि अकुमारी । थुकिइ प्रतिशतया खँ गय् वइ ? अथे हे थौंकन्हय् छम्ह गायिका दु । ‘जि अविवाहित । तर जि भर्जिन मखु ।’ लाछिं मलाछिं धयाजुइ । थांैकन्हय् पत्रिपत्रिकातसें सेलिब्रिटीया बखानया नामय् जनतायात भोजन याकीगु खुराक थुज्वःगु हे जुइ । खायतु खा । नखायतु नखा !

गोसाइँकुण्ड वनेबलय् दथुलँय् लकडी विनायक धइगु थाय् वइ हँ । वयात लकडी विनायक छाय् धाःगु ? लकडी विनायकय् मिसातसें भाःतपिनि नामं कथि छाइ । ग्वःम्ह भाःत कयागु दु । ल्यवःत ग्वःम्ह । इमि नामं नं सुलाः सुनां मखंक कथिपु छायेगु चलन दु हँ । पाप धर्मया ख्याच्वः क्यनाः मिसातय्त थःगु गोपनियता उले मायेकाबी लकडी विनायकं । खतुं थ्व लकडी विनायक छगू कथं कुमारीत्वया धार्मिक परीक्षण विधि जुयाबी । मत्तिइ वइ । थःगु कुमारीत्वयात कयाः अनेक तनेक हल्ला याना जुइपिं सेलिब्रिटीतय्त लकडी विनायकय् यंकेमाली । अन इमिसं कथि छाइ, मछाइ, ग्वःपु छाइ अले उकिं हे इमि कुमारीत्वया परीक्षण जुइ । धाइ परीक्षण मजूगु योग्यता विश्वसनीय जुइमखु । थःगु धापू विषय विश्वास हे बीगु खःसा रेखा थापा कुमारीत्वया प्रमाणिकरणया लागि लकडी विनायकय् छकः वंसा वेश जुइ ।

थौंकन्हय् कुमारीया अर्थ नं हिले धुंकल । कुमारी मांत नं दु । ब्याहा मयाःगुलिं जक कुमारी, तर मचा दयेधुंकी । इपिं मां जुइ । हानं मिजंतलिसे नापं च्वनाः, द्यनाः, सनाः नं कुमारी हे जुइगु प्रथा नं दु थौंकन्हय् । ‘लिभिङ्ग टुगेदर’ धाइ । नापं च्वनी । औपचारिक इहिपा याइमखु । थन मिसा कुमारी हे जुयाच्वनी । हानं मिजं मदय्क कृत्रिम गर्भाधानं मचा दयेकीपिं कुमारी मांत नं दइ । कुमारी मां नं निथी दइ । मिजंलिसे सहवासय् च्वनीपिं व कृत्रिम गर्भाधान याइपिं । अझ थौंकन्हय् लिङ्ग हे हिलाः कुमारी जुइपिं नं दइ । मिजंया लिङ्ग लिकयाः मिसाया लिङ्ग छुइपिं । थौंकन्हय् कुमारीत्वया खँ ल्हायेबलय् गोलमाल जुइ । अनेक झमेलाय् तक्यनेफु । जटिलताया लुफिं हायेफु । कुमारी धयां जक मगायेफु । गुगु कित्ताया कुमारी खः । न्यनीपिंत नुगलय् खुलदुल जुयाच्वनेफु ।

क्यानाडाडटकम धाःगु संचार माध्यमय् छम्ह माताजीं अन्तर्वार्ता बियाच्वनी । वं अनेक राजनीतिक विषय भविष्यवाणी यानाक्यनी । वं सेलिब्रिटी हिरोइनतय् बारे नं अनेक भविष्यवाणी प्वंकाच्वनी । ‘रेखा थापा, कोमल वली, दीपाश्री स्वम्हं अभिनेत्रीतय् आः इहिपा हे जुइमखुत । इमि विवाह जुइगु ई छले जुइधुंकल । आः व ई लिहां वइमखु । आश मदये धुंकल । रेखा थापा भविष्यय् मन्त्री जुइफु । कि त व मदर टेरेसा थें जुइ । माताजीया भविष्यवाणी न्यने । रेखा थापा कमरेड प्रचण्डलिसे डान्स याःगु दृश्य लुमनी । प्रचण्डजी आः प्रम जुइधुंकल । उकिं हे रेखा थापा मन्त्री जुइगु भविष्यवाणी वःगु खः ला ? मस्यू ग्व ?

रेखा थापाबारे हालय् छगू हल्ला वइ । छम्ह गायक राजेशपाल राईलिसे रेखाया विवाह याकनं जुइ । रेखा थापां छकः अन्तर्वार्ताय् भविष्यय् थः निम्ह मचाया मां जुइ धाःगु लुमनी । हानं राजेशपायल राइलिसे थ्व दँ नापं च्वना । जिं अय्नं कुमारी हे तिनि धाइगु खः ला रेखां । तर खँ मेगु हे जुइ । राजेशलिसे इहिपा जुइ धकाः जिं मजाक यानागु जक खः । व यथार्थ मखु । रेखां अप्रिल फूल यानागु खँ ल्हाइ । अभिनेत्रीतसें चर्चाय् वयेत थुज्वःगु बजारी जोक याना हे च्वनी । उकिइ लज्जा चायेम्वाः । इमित छूट दइ । भविष्यद्रष्टा माताजीं धाः कथं रेखा थापाया ब्याहा जुइ मखुत । आः जीवनपर्यन्त रेखा कुमारी हे जुइ । मदर टेरेसा थें जुइ–मजुइ । थ्व धाःसा धाये मफयेफु । मदर टेरेसा थें रेखा थापां नं सदाबहार कुमारी जुइ लाइ ? हानं कथम्कदाचित रेखा थापाया भविष्यय् इहिपा हे जूसां व इहिपा धात्थेंया मखु ला ? वया कुमारीत्व महत्व म्हो जुइमखु । धाइ इहिपाया मार्केटय् अकुमारीपिं स्वयां कुमारीपिं बहुमूल्य जुइ हँ । पश्चिमी मुलुकय् ला कुमारीत दुर्लभ । अनमोल । रेखा थापां ‘छविलिसे १२ दँ च्वंनं जि कुमारी हे तिनि’ धाःगु लुमनी । शायद इहिपा बजारय् थः अझं अनमोल हे तिनि । संकेत याःगु खः ला ? लोभंं क्यंकेत स्वःगु खः ला ?