Newa Ekata Diwas Gosthi Adv

ट्रम्पविरुद्ध महाअभियोग लगेयायेगु तयारीइ अमेरिकी राष्ट्रपति

नेवा: अनलाइन न्युज – ललेन्द्र शाक्य | २०७७ पौष २७, सोमबार ११:२६:५३

अमेरिकी राष्ट्रपति डोनाल्ड ट्रम्पविरुद्ध महाअभियोगया प्रस्ताव पेस यायेगु तयारी जुयाच्वंगु दु । न्हूम्ह निर्वाचित राष्ट्रपति जो बाइडनं सपथ ग्रहण यायेगु ९ दिं ल्यंदुबलय् राष्ट्रपति ट्रम्पयात महाअभियोग लगेयायेगु तयारी जूगु खः ।

महाअभियोग प्रस्तावय् निसःसिबें अप्वः डेमोक्रेट सांसदपिन्सं ल्हाःचिं तःगु दु । उगु प्रस्तावय् अमेरिकी संसदया तल्लो सदन हाउस अफ रिप्रिजेन्टेटिभ्सय् थौं मंगलवाः मतदान जुइफूगु डेमोक्र्याट नेतापिन्त उदृत यासें बीबीसीं जानकारी ब्यूगु दु ।

महाअभियोग लगेयायेगु तयारी जुइधुंकाः रिपब्लिक उम्मेदवारपिन्सं ट्रम्पयात राजीनामा बिइत सुझाब ब्यूगु दु ।

सभामुख नेन्सी पेलोसीं नं ट्रम्पविरुद्ध महाअभियेग लगेयायेत सदनं माःगु कारवाही यायेगु धाःगु दु । पेलोसीं आइतवाः सनिल थः पासापिन्त छ्वःगु पतिइ धयातःगु दु, झीपिं झीगु संविधान व लोकतन्त्रया रक्षाया नितिं तत्पर जुयागु दु । छाय् धाःसा राष्ट्रपतिपाखें थ्व निगुलिं पक्ष खतराय् दु । आःया राष्ट्रपतिं झीगु लोकतन्त्रय् हमला याःगु दु । उकिं कारवाही तत्काल आवश्यक जू ।

सभामुख पेलोसीया कथं ट्रम्प असक्षम राष्ट्रपति घोषित यायेगु नितिं उपराष्ट्रपति पाइक पेन्सं मुक्कं मन्त्रिमण्डलयात ध्वाथुइकाः सकारात्मक पलाखय् हयेधुंकाः २५ क्वःगु संशोधन लागू जुइ व वं कार्यबाहक राष्ट्रपतिया रुपं तुरुन्त पद कःघाइगु जुइ ।

महाअभियोग प्रस्तावय् ट्रम्पं हिंसायात बढावा ब्यूगु द्वपं ब्यूगु दु । लिसें ट्रम्पयात संयुक्त राज्य अमेरिकाया सरकारविरुद्ध मनूतय्त उक्सेयाःगु द्वपं नं दु ।

वंगु वाः ट्रम्पया उक्साहटय् वया समर्थकपिन्सं अमेरिकी संसद दुने दुहाँ वनाः आक्रमण व तोडफोड याःगु खः । उगु हिंसाय् छम्ह प्रहरी अधिकारी व प्यम्ह सर्वसाधारणपिन्सं ज्यान गुमेयाःगु खः ।

अमेरिकाया राष्ट्रपतिइ जो बाइडन विजयी जूगु औपचारिक घोषणा याकेमबिइगु आजजुं ट्रम्प समर्थकपिन्सं आक्रमण याःगु धाःगु दु । अय्सां संसदं बाइडन राष्ट्रपति निर्वाचित जूगु घोषणा याःगु खः ।

Categorized in अन्तर्राष्ट्रिय