nepal life 2076 3 18

टोकियो ओलम्पिक : अमेरिका न्ह्यःने चीन ल्यूने

नेवा: अनलाइन न्युज – ललेन्द्र शाक्य | २०७८ श्रावण २४, आइतबार १६:२१:५७

टोकियो ओलम्पिकय् अमेरिकां सर्वाधिक स्वर्ण त्याकूगु दु । लिपांगु दिं अमेरिकां स्वंगू स्वर्ण त्याकाः चीनयात ल्यूने लाकूगु खः । अमेरिकां ३९ स्वर्ण त्याकूगु दुसा चीनं ३८ स्वर्णलिसें अमेरिकाया ल्यूने लाःगु दु ।

पदक धलखय् २७ स्वर्णया लिसें जापान स्वंगूगु थासय् २२ स्वर्णया लिसें बेलायत प्यंगूगु थासय् व २० गू स्वर्णया लिसें रुस न्यागूगु थासय् लाःगु दु । रुस डोपिङ प्रतिबन्धया हुनिं रुसी ओलम्पिक कमिटीया नामय् सहभागी जूगु खः ।

कोरोना भाइरसया महामारीया हुनिं दच्छि लिपा जक ग्वसाः ग्वःगु टोकियो ओलम्पिकय् दर्शकपिं प्रत्यक्ष रुपं स्वयेगुपाखें बञ्चित जूगु दु । तर, कासामिपिन्सं करोडौं करोड दर्शक टेलिभिजनय् स्वयाच्वंगु थुइकाः हौसलाया लिसें म्हितूगु दु ।

थुगुखुसिया ओलम्पिकय् स्वीमिङ, एथ्लेटिक्स, सुटिङ, डाइभिङ, जिम्न्यास्टिक, भारोत्तोलनथें जाःगु कासाय् विश्व कीर्तिमान कायम जूगु दु ।

एथ्लेटिक्सया चीहाकःगु दूरीइ जमैकाया वर्चश्व जुल । स्वीमिङ व एथ्लेटिक्सय् अमेरिकाया वर्चश्व छुं कमजोर जुल । तर, अमेरिकां १२८ गू पदक एथ्लेटिक्सय् जक त्याकलसा स्वीमिङय् ५० गू पदक त्याकल ।

दक्षिण एसियापाखें भारतं जक ओलम्पिकय् पदक त्याकल । भारतं छगू स्वर्ण, निगू रजत व प्यंगू काँस्यया लिसें ४८ गू थासय् लायेत ताःलाःगु दु । टोकियो ओलम्पिकय् भारतं आःतकया हे सर्वाधिक पदक त्याकूगु दु ।

नेपालं ओलम्पिकय् छुं नं पदक त्याकूगु मदु । नेपाली पौडीबाजपिन्सं राष्ट्रिय कीर्तिमानय् धाःसा सुधार याःगु दु । थ्व हे नेपाःया सफलता जुल ।

Categorized in कासा