zero media family planning adv

टेलिफोनपाखें हे मनोपरामर्श

नेवा: अनलाइन न्युज | २०७७ जेठ २१, बुधबार १०:००:४१

नोबेल कोरोना भाइरसया महामारीं विश्व आक्रान्त जूगु दु । कोरोना भाइरस संक्रमण न्यना वने धुंकाः सामाजिक लागाय् तःधंगु लिच्वः लाःगु दु । कोरोना अप्वया वनेधुंकाः रोजगारीया झ्वलय् थीथी देसय् थ्यंकाच्वंपिं नेपाली आर्थिक व मानसिक तनाब फयाच्वंगु दु । आर्थिक व मानसिक रुपं समस्याय् लाःपिं नागरिकयात कैलालीइ धाःसा टेलिफोनपाखें हे परामर्श बियेगु यानाहःगु दु । कोरोनाया महामारीं गन्तब्यय् मुलुकय् रोजगारी चबुपिं थःगु देसय् लिहाँ वने मखंपिं पित्याका च्वनेमाःपिं नापंयात समस्या खने दत । परिवारय् नापं ब्यक्तिगत लिसें विदेशय् दुपिनि प्रतिया चिन्ता अप्वःगु दु । विदेश व मेगु थासं छेँय् लिहां वःपिंत नापं समाजय् स्वइगु दृष्टिकोण पाना वनाच्वंगु दु । थथे विभेदय् लाःपिं नागरिक व उमि परिवारय् नापं मनो सामाजिक लिच्वः लानावःगु दु । कोरोनाया महामारी नापं मनोसामाजिक लिच्वः खने दयेवं कैलालीइ सुरक्षित आप्रबासन परियोजना (सामी) पाखें टेलिफोनं सुचं बियाः परामर्श बिइगु ज्या यानाच्वंगु परियोजना संयोजक पञ्चराम चौधरीं कनादिल । विदेशं लिहां वःम्ह नागरिक विदेशय् थःथिति दुपिं परिवारया सदस्यय् मनोत्रास ब्वलनाच्वंगु दु । संयोजक चौधरीं कन । थज्याःगु विपत्तिइ न्हापां ला मनूतय् मानसिक अवस्था पाय्छि जुइमाः । फुक्कं ज्या दिमागं याइ । उमिगु सोच नकारात्मक मजुइमाः धकाः जिमिसं मनोपरामर्श बियेगु यानाच्वनागु दु ।  

कैलालीं श्रम स्वीकृति कयाः ६० हजार ब्यक्ति थीथी मुलुकय् रोजगारया सिलसिलाय् वंगु दु । श्रम यायेत विदेश वंपिनि गन्तब्य मुलुकया पीडा छखे दुसा छेँय् लिहां वंपिं नागरिक नं थीथी पक्षं समस्याय् लानाच्वंगु दु । ताः ई तक पिने च्वनाः लिहां वःपिं नागरिकं गामय् दुब्र्यबहार व अबहेलना थेंज्याःगु समस्या भोगे यानाच्वंगु दु । जानकी गाउँपालिकाया सेवक चौधरी वंगु चैत ९ गते मलेशियां मलेशिया लिहां झाःगु खः । लछिया लागिं धकाः छेँय् लिहां वःगु खः । छेँय् थ्यंकाः लकडाउन जुल । चौधरीं धयादिल । थः छेँय् दुने हे सीमित जुयेमाःगु दु । गनं वन, सुलिसें नाप लात धाःसा संक्रमित जुइ धकाः न्ववायेत हे थाकु चाइ । समाजया दुब्र्यबहार सह यायेत हे थाकु । विदेश व पिनेया जिल्लां वयाच्वंपिं आपालं छेँय् लिहां वने मखनाः क्वारेन्टाइनय् च्वने मालिगु जूगुलिं उमिके तकं नकारात्मक विचार उत्पन्न जुइगु बितृष्णा ब्वलनीगु, मनोबल घटे जुइगु थेंज्याःगु समस्या वयेगु यानाच्वंगु परियोजना संयोजक चौधरीं कनादिल । थज्याःगु समस्याय् लाःपिंत जिमिसं मनोसामाजिक परामर्श बियेगु ज्या सुरु यानागु खः । वय्कलं धयादिल । तेश्रो मुलुक व भारतं लिहां वःपिंत समस्या जुल धाःसा परियोजनां धनगढीया सुरक्षित आप्रबासनपाखें टेलिफोन परामर्श बियेगुया नापं प्यम्ह मनोपरामर्शकर्तायात आवश्यक जूगु क्वारेन्टाइनय् वनाः सेवा बियेगु ब्यवस्था याःगु दु । लकडाउया इलय् टेलिफोन सूचना परामर्श बियेबलय् प्रभाबकारी जुइगु परियोजनाया ठहर दु । परियोजनां आः तक नं कैलालीया २१० म्हेसित परामर्श बिइधुंकूगु दु । सुरक्षित आप्रबासन परियोजना (सामी) नेपालय् ३९ जिल्लाया १५६ स्थानीय तहलय् चले याःगु दु । कैलाली धनगढी उपमहानगरपालिका, टिकापुर नगरपालिका, घोडाघोडी नगरपालिका व जानकी गाउँपालिकालिसेंया साझेदारीइ स्थानीय सेवा प्रदायक संस्था टेस नेपालं चले यानाच्वंगुलिं समस्याय् लाःपिं ब्यक्तियात माःगु ग्वाहालिया लागिं श्रम, रोजगार तथा सुरक्षा मन्त्रालयया कल सेन्टर मार्फत् विदेशी दूतावासय् जुइगु खँ कनादिल ।

 

Categorized in स्थानिय-समाज