zero media family planning adv

टेकु अस्पतालय् प्यम्ह कोरोना संक्रमित वासः यानाः लन, लंपिं ४९ म्ह थ्यन

नेवा: अनलाइन न्युज – ललेन्द्र शाक्य | २०७७ जेठ ८, बिहिबार १९:१३:२६

येँया टेकुइ च्वंगु शुक्रराज ट्रपिकल व सरुवा रोग अस्पतालय् वासः याकाच्वंपिं प्यम्ह मनू कोरोना भाइरस संक्रमित थौं बिहिवाः डिस्चार्ज जूगु दु ।

लिपांगु निगू रिपोर्ट नेगेटिभ वयेधुंकाः इपिं डिस्चार्ज जूगु खः । डिस्चार्ज जूपिं निम्ह ख्वपया व निम्ह येँयापिं खः ।

अस्पतालया निर्देशक डा. सागरराज राजभण्डारीया कथं डिस्चार्ज जूपिं निम्ह मिजं व निम्ह मिसा खः ।

टेकु अस्पतालय् वंगु बैशाख ३१ गते ख्वपया छम्ह मिजं व छम्ह मिसा, येँया छम्ह मिसा भर्ना जूगु खः । उगु दिं भर्ना जूपिं संक्रमित मिजं सशस्त्र प्रहरी खः ।

मिसा छम्ह आरोग्य प्रतिष्ठानय् ज्या यानाच्वंम्ह कर्मचारी खः । मेम्ह मिसा चन्द्रागिरीइ च्वंम्ह खः । थप छम्हेसिगु धाःसा विस्तृत विवरण वःगु मदुनि । इपिं गुन्हुया दिं डिस्चार्ज जूगु खः ।

अस्पतालय् थप छम्ह संक्रमित वासः यायेगु झ्वलय् दूगु डा. राजभण्डारीं जानकारी ब्यूगु दु । थौं डिस्चार्ज जूपिं प्यम्ह यानाः कोरोना भाइरस संक्रमणया वासः लिपा डिस्चार्ज जूपिनिगु ल्याः ४९ म्ह थ्यंगु दु ।

Categorized in राष्ट्रिय