prabhu baink new

झी चीधंगु चाकलं पिहां वनेम्वाःला ?

इमेज च्यानलया छगू लोकं व्हाःगु ज्याझ्वः खः समयबजि । थुगु ज्याझ्वःया निर्देशन यायेगुलिसें ज्याझ्वः न्ह्याकेगु ज्या नं याना च्वनादीम्ह नांजाःम्ह ख्यालःकःमि, कलाकार खः सुरेन्द्र मानन्धर । वय्कःलिसे नेवाः अनलाइन न्यूजया खँल्हाबल्हा थन न्ह्यब्वयाच्वना

  • समयबजि ज्याझ्वः थौंकन्हय् गुकथं न्ह्यानाच्वन ?

समयबजि धयाकथं थुकी थीथी कथंया घासाया थीथी सवाः दइ । अथे हे समयबजि ज्याझ्वलय् नं थीथी सेगमेन्टया थीथी सवाः दइ । थीथी थाय्या जात्रापात्रा, गतिविधि, नेवाः ख्यलय् जुयाच्वंगु थीथी ज्याखँया जानकारी, ख्यालिखँ, क्वाःकासा आदि कथंया थीथी सवाः झीसं समयबजि ज्याझ्वलय् बिया वयाच्वनागु दु ।
स्वकुमिपिनिगु मागकथंया थीथी सवाः थुकी दुथ्याकातयागु दु । व हे कथं स्वकुमिपिनिगुपाखें वःगु सल्लाह सुझाव कथं थुकी छुं भचा ह्यूपाः हयेगु नं ग्वसाः ग्वयाच्वनागु दु ।

  • गज्याःगु कथंया ह्यूपाः हयादी त्यना ?

न्हापा न्हापा समयबजि धाल कि छ्वय्ला, बजि, मुस्यापालु आदि जक दइगुलिइ ई कथं आः समयबजिया घासाय् नं थीथी घासात थप जुयाः पानावःगु दु । अथे हे झीसं नं यायेगु खः । आः झीसं नेवाः गतिविधि, सुटिङ रीपोर्ट आदि नं तयावनेगु बिचाः यानाच्वना । छगू म्यागेजिन थें हे थीथी चिचीहाकःगु सेगमेन्ट तयेगु बिचाः खः ।

  • बजारया ल्याखं स्वयेबलय् ज्याझ्वः दयेकेत गुलितक्क थाकु या अःपु ?

झीसं ज्याझ्वः दयेकूसा गाः । बजारया ल्याखं विज्ञापनया खँ ल्हायेबलय् व झीसं स्वयेम्वाः । इमेज च्यानलपाखें हे स्वइ । इमेज च्यानलपाखें नेवाः ज्याझ्वःयात निरन्तरता बीमाः धइगु बिचाः तयाः झीत सपोर्ट हे यानाच्वंगु दु । विज्ञापन दुसां मदुसां इमेज च्यानलपाखें यक्व हे सपोर्ट दु । मदिक्क थौंतक्क नेवाः ज्याझ्वः न्ह्याकाच्वंगु च्यानल धइगु इमेज च्यानल हे जुइमाः । थुकथं नेवाः ज्याझ्वः न्ह्याकाच्वंगु खँय् ला झी सकल नेवाःतय्सं इमेज च्यानलयात सुभाय् देछाये हे माः ।
स्वकुमिया ल्याखं बजारया खँ ल्हायेगु खःसा स्वकुमिपिनिगु मायां यानाः हे थौं समयबजिया ५०० एपिसोडं मयाक्क प्रसारण जुइधुंकल । व धइगु समयबजिं स्वकुमिया नुगः त्याकूगु दु धायेफइगु हे जुल नि । लिसें झीसं खस नेपाली भाषं सबटाइटल तयेगु याना । लिसें नेवाः भाय् ल्हायेमसःपिन्त खस भाषं नं खँ ल्हायेगु याना । अय्जूगुलिं गैर नेवाः स्वकुमित अप्वया वनाच्वंगु दु ।

  • थथे यायेबलय् नेवाः ज्याझ्वलय् नेवाः भाय् जक ल्हायेमाः, खस भाय् ल्हाये मज्यू धइगु खँ मवःला ?

थथे धाल धाःसा झी नेवाः आन्दोलनय् जानाच्वनापिन्सं नेवाः आन्दोलन मयाःसां जिल का । झी झीगु हे दथुइ जक सिमित जुयाच्वन । झी चीधंगु चाकलं पिहां वनेम्वाःला ? झीगु ज्याझ्वःत जुइबलय् व हे ख्वाःपाः जक खनेदयाच्वनी । अय्जूगुलिं झीसं छगू चीधंगु चाकलं पिहां वने हे माः । मेपिन्त नं नेवाः ख्यःयाबारे सीकेबीगु, अले नेवाः भाय् ल्हाकेबीगु लकस दयेका वनेमाः ।

  • समयबजिया सूटिंगया दौरानय् छि थीथी नेवाः बस्तीइ थ्यन । पिनेपिनेयापिं नेवाःतय्गु अवस्था गथे खनादिया ?

स्वनिगलय् च्वंपिं नेवाःतय्के स्वयां स्वनिगलं पिने च्वंपिं नेवाःतय्के अझ अप्वः नेवाः धइगु भावना दुगु जिं खना । शसक्त जुइमाः धइगु भावना, झीगु नेवाः तजिलजियात म्वाकेत अझ अप्वः सनाच्वंगु खना । भाय् ल्हाये मसःसां तजिलजि म्वाकेमाः धइगु ल्याखं इपिं यक्व सनाच्वंगु दु । इपिं आर्थिक ल्याखं ल्यूने लाःसां पुचः, स्थानीय क्लबत जानाः थः हे न्ह्यचिलाः थम्हं हे धेबा ल्हानाः जूसां नेवाः तजिलजिया नितिं सनाच्वंपिं यक्व नेवाःत दु ।
बरु थन स्वनिगलय् नेवाः भावना पिने स्वयां म्ह्वः जुयावंगु खनेदत । ख्येँय् सगं कायेगु स्वयां केक तानाः बुदिं मखु बर्थ डे न्यायेकेगु जुयावन । अथे धाःसां थन नेवाः नुगः मदु हे नं धायेमखु । तर पश्चिमी सभ्यताया ल्यू ल्यू वंपिं थः काय्म्ह्याय्या ल्यू ल्यू मांअबु नं उखेपाखे हे वंगु खनेदत का ।

  • थज्याःपिं नेवाः ख्यःलिसे तापानावंपिं ल्याय्म्हतय्त नेवाः भावना थने कथं समयबजि ज्याझ्वःपाखें नं छुं गज्याःगु कुतः जुयाच्वंगु दु ला ?

पक्कां यानाच्वनागु दु । मनोरन्जनया माध्यमं क्वाः न्ह्यब्लयेबलय् झीगु पुलांगु मौलिक नेवाः क्वाःया बारे ल्याय्म्हतय्सं सीकाच्वंगु दु । गांगांया तापाक्क तापाक्क च्वंपिं नेवाःतय्गु नं जात्रापर्व क्यनेबलय् नेवाःतय्गु जात्राया बारे नं मनूतय्सं सीकाच्वंगु दु ।

उकिया लिसें जिपिं थीथी कार्यक्रमय् वने, जात्रापर्वय् वने । उगु इलय् जिमिसं प्रचलित लिपिं समयबजि च्वयातःगु टिसर्ट फिनावने । व नं छगू झीगु भाषा व लिपिया प्रचार प्रसार यायेगु माध्यम जुल । थथे फुकथं, खं कथं झीसं नेवाः ल्याय्म्हतय् दथुइ नेवाः भाषा, लिपिया प्रचार प्रसार यायेगु व्हःताः सित्तिं मछ्वया । न्हापा दुर्गालाल दाइ नं धयादीगु लुमं । वय्कःपिं सनाच्वनाद्यूबलय् संचार माध्यम मदु । तर आः नेवाः संचार माध्यम नं दु । झीसं ईया थुइकाः, ईयात ल्वःकथं ज्या यानाः वन धाःसा बुलुहुं बुलुहुं नेवाः ख्यः बांलाना वइतिनि । न्हूगु स्वरुप खनेदइ तिनि । झीगु आन्दोलन छन्हु न छन्हु पूवनी । थनथाय् लुमंके माःगु छता खँ छु थें च्वं धायेबलय् नेवाःतय्के अप्वः हे कुंखिनेगु बानी खना । कुंखिनेमाः, तर मेपिन्त नुगलय् स्याक्क मखु, सुझावया रुपं कुंखिनेगु यायेमाः ।

  • नेवाः अनलाइन न्यूजया ब्वँमिपिनिगु नितिं छु हसना बियादी ?

जिं न्हाचः धयाथे नेवाःतय् आपाः हे कुंखिनेगु बानी दु । नेवाः अनलाइन न्यूजया नं थःगु कमी कमजोरी दयेफु । तर उकियात न्वायेबलय् कुंखिनाः मखु, छ्याता बिइगु यायेमाः । थुकियात गथे यानाः ज्यू झीसं तिबः बीमाः । थ्व धात्थें हे बांलाःगु खँ खः ।
झीगु आन्दोलन सफल यायेगु खःसा वेब मिडिया, टेलिभिजन, पत्रपत्रिका, रेडियो सकलयात तिबः बिया वनेमाः । नेवाः न्ह्यलुवाःतय्सं नं नेवाः आन्दोलन सफल यायेगु खःसा राजनैतीक मनूत जक मखु, संचार ख्यः, संचारकःमिपिन्सं नेवाः ख्यलय् यानाच्वंगु दुःखय् नं मिखा तयेमाः । अथे जुइफत धाःसा झीगु नेवाः ख्यः बल्लाना वइ, झीगु आन्दोलन सफल जुइ ।