ad prabhu

झीसँ म्हपूजा व न्हूदँ गुबले यायेगु ?

नेवा: अनलाइन न्युज | २०७७ कार्तिक ३०, आइतबार १३:११:४४

डा. बाल गोपाल श्रेष्ठ

न्हूदं कुनुं म्हपुजा मयासै किजा पुजा यायेमा कन्हे दुतियां किजा पुजा यासा अनिस्ट जुइ धाइपिंसं छक बिचा यायेमा – पला छपला छिइत तकं नेपाया हावादारी दुकुलण्ठु जोतिषतयसं धाधाथें याना जुइपिं शाह जुजुपिं बीरेन्द्र, ज्ञानेन्द्रतय छु हाबिगत जुल झीसं खना चोनागु मदु ला ?

जानाजान नेवातय नखचख गडबड याना नेवातय दथुइ कचवं पिथनेगु कुत्सित नियतं म्हपुजाया न्हियात बारंबार सेंकेगु याना वैचोंगु बनारसी पण्डिततय पुचया नेपाल पञ्चाङ्ग निर्णायक समितिया खंय सहि तयेगु कि नेवा तजिलिज सेंके बी मज्यु धाइम्ह संसारं हनातम्ह सच्छि दं थकाली झी नेवा बिद्धान संस्कृतिविद सत्यमोहन जोशीया खं नेनेगु ?

सत्यमोहन जोशीजु पेशां ज्योतिष मखयवं वयक ज्योतीषीय ज्ञान मदुम्ह अल्पज्ञानी मखु । वयकलं सोन्ति नख म्हपुजा व न्हूदं हनेगु खंय नेवा परंपरा नालेगु खं ल्हानादिगु ख । म्हपुजा व न्हूदं छन्हुं हनेगु धका वयकलं अत्थें धयादिगु मखु । नेवा परंपरा नेवा संस्कृति नेवा तजिलजि बारे राजकिय पंचाङ्गय चोयातगु बाहेक मेगु आख बाग मस्युपिनिगु खं पायछि धका हाला जुइगुया छुं अर्थ मदु ।

नेवातयसं म्हपुजा परापुर्व कालं निसें कछला पारु कुन्हुं हे हनेगु याना वयाचोंगु इतिहास ख । नेपाल संवत शुरु जुइ आपालं न्ह्यव पुलांगु नेपाल संवत कथं नं न्हूदं केनिकुनुं नेवातयसं म्हपुजा हनेगु याना वयाचोंगु ख । नेवातय म्हपुजा बारे बनारसी पण्डिततय पुचलं धाधाथें याइगु नेपाल पञ्चाङ्ग निर्णायक समितिं छुं स्युगु खं हे मखु ।

सुथय सा पूजा याना बहनि म्ह पुजा याइगु नेवातय रिति मखु । औसि कुनुं म्हपुजा यायेगु नेवा ल्वाकेगु नीति राजकिय नेपाल पञ्चाङ्ग निर्णायक समितिं नेवातयसं नेपाल देशया नामं सोनातगु नेपाल संवतयात राष्ट्रिय संवत यायेमाल धका आन्दोलन तचोयेका हगु वंगु पीदं थुखे हे जक ख ।

जुजु वांछोया गणतन्त्र जुइ धुंकुगु थो देशय जुजुयात साइत बीपिं हावादारी जोतिषतय संगठन नेपाल पञ्चाङ्ग निर्णायक समितिं व हे ल्वापुखिचा खं हानं पिथंगु यात दिब्य बचन तायेका न्हूदं कुनुं म्हपुजा मयासें किजा पुजा यायेमा धाइपिंत छु धायेगु रु

नेवातयत गालय कोथुनिगु नेपाल पञ्चाङ्ग निर्णायक समितिया ल्यु ल्यु वना नेवा तजिलजि सेंकेगु खं बिलकुल पायछि मखु । न्हूदं कुनुं किजा पुजा यायेमा कन्हे दुतियां किजा पुजा यासा अनिस्ट जुइ धाइपिं दुकुलण्ठु जोतिषतय खंय बिस्वास यायेगु आधार छुं मदु ।

यम पंचक धयागु न्यान्हु यंक हनिगु नख ख । छसिकथं तृतियां को पूजा धुंका चतुरदशि कुन्हु खिचापुजा, आमाइ कुनुं सापुजा व लक्ष्मीपुजा, अले पारुं न्हूदं कुनुं म्हपुजा अले दुतियां किजापुजा याना वयां कन्हे कुनुं लक्ष्मी कोकायगु हे नेवा परंपरा ख ।

खय ब्रम्हुतयगु पञ्चाङ्ग निर्णायक समितिया पात्र बहिस्कार याना नेवातयसं थगु हे पात्रो दयेका केनेगु ज्या नेवातयसं आ हे यायेमाल । थुलि जुल धासा नेवा नेवा ल्वाकिगु थज्यागु बिबाद लिपा मइगु भलसा कायेफु । नत्र हानं मेगु दयं नं थज्यागु कचवं पिथना मबी धाये थाकु ।

Categorized in बिचा: