नेवा: अनलाइन न्युज – ललेन्द्र शाक्य | २०८० कार्तिक १७, शुक्रबार १५:१४:५६

नेपाः झिदँ लिपा टी–२० विश्वकप क्रिकेटय् छनोट जूगु दु ।

शुक्रवाः येँया मूलपानी मैदानय् संयुक्त अरब इमिरेट्स (युएई)यात ८ विकेटं बुकुसें नेपाः सन् २०२४ या जुन महिनाय् अमेरिका व वेष्ट इन्डिजय् जुइगु टी–२० विश्वकपय् छनोट जूगु खः ।

थ्वसिबें न्ह्यः नेपालं सन् २०१४ स बंगलादेशय् जूगु टी–२० विश्वकप म्हितूगु खः । मूलपानी मैदानय् युएईं ब्यूगु १३५ रनया लक्ष्य लिइगु झ्वलय् नेपाःया आशिफ शेखं सर्वाधिक ६३ रन दयेकूगु खः । अथेहे, कप्तान रोहित पौडेलं ३५, गुल्सन झा नं २२, कुशल भुर्तेलं ११ रन मुंकूगु खः ।

न्हापां ब्याटिङ याःगु युएईयात मध्यम स्कोरय् पनेत नेपाःया कुशल मल्लं महत्वं जाःगु ३ विकेट काःगु खः । ३ ओभर बलिङ याःम्ह मल्लं ११ रन खर्चेयानाः ३ विकेट काःगु खः । अथेहे, सन्दीप लामिछानें २, सोमपाल कामी व रोहित पौडेलं १–१ विकेट काःगु खः ।

येँय् जूगु छनोट कासापाखें ओमान नं विश्वकपय् छनोट जूगु दु ।

नेपाः व ओमान छनोट जुइधुंकाः सन् २०२४ य् जुइगु टी–२० विश्वकप म्हितीगु १८ गू टोली छनोट जुइधुंकूगु दु । आईसीसी मेन्स टी–२० विश्वकप २०२४ स मुक्कं २० गू टिमं धेंधेंबल्ला याइगु जूगु दु ।

गुकी वेष्ट इन्डिज व अमेरिका ग्वसाः खलःया रुपय्दु व तप्यंक हे छनोट जुइधुंकूगु दु ।

२०२२ या टी–२० विश्वकपय् शीर्ष च्यागू थासय् लाःगु अष्ट्रेलिया, इंग्ल्याण्ड, भारत, नेदरल्याण्ड्स, न्युजिल्याण्ड, पाकिस्तान, दक्षिण अफ्रिका व श्रीलंका तप्यंक हे छनोट जुइधुंकूगु दु ।

टी–२० विश्वकपलिपा वरियताय् च्वय् लाःगु आधारय् बंगलादेश व अफगानिस्तानं नं थाय् सुरक्षित याःगु दु ।

आयलल्याण्ड, स्कटल्याण्ड, पपुवा न्युगिनी व क्यानडां टी–२० विश्वकप रिजनल क्वालिफायर्सपाखें टी–२० विश्वकपय् थाय् पक्का यायेधुंकूगु दु ।

वइगु २० नोभेम्बरनिसें १ डिसेम्बरय् नामिबियाय् जुइगु अफ्रीका क्यालिफायर फाइनलपाखें निगू टिमं विश्वकपय् थाय् काइगु जूगु दु ।

Categorized in कासा