kmc bidya

झापाय् ८७ म्ह भारतं दुहाँ वल, संक्रमित लुयावल

नेवा: अनलाइन न्युज – ललेन्द्र शाक्य | २०७७ जेठ १०, शनिबार १९:४३:५२

झापाया पुलांगु सदरमुकाम झापा गाउँपालिकाय् छम्ह कोरोना संक्रमित लुयावःगु दिं भारतं ८७ म्ह मनूत दुहाँ वःगु दु ।

थीथी स्थानीय तहलय् छ्वयेगु कथं सीमाय् अलपत्रय् लानाच्वंपिन्त नेपाः दुकाःगु खः ।

अनच्वंगु सशस्त्र प्रहरी बल स्रोतया कथं नेपाः दुहाँ वःपिंमध्ये १६ म्हेसित डिल्लीराज मावि, टाघनडुब्बाया क्वारेन्टाइनय् तःगु दु । अन तःपिंमध्ये छम्ह ३३ दँया मिजंयाके शनिवाः कोरोना संक्रमण पुष्टि जुइधुंकूगु दु ।

गाउँपालिकाया प्रमुख प्रशासकीय अधिकृत जीवन निरौलाया कथं संक्रमित मनू झापा गाउँपालिकाया हे खः । मेमेगु स्थानीय तहया मनूतय्त सम्बन्धित स्थानीय तह नं हे यंकूगु दु व अन क्वारेन्टाइनय् तःगु दु ।

संक्रमित मनू जेठ ४ गते सीमाय् थ्यंकूगु खः । बम्बईपाखें वलिसें स्वम्हेसिगु पुचः सीमाय् थ्यंकूगु खः । अनं इमित तप्यंक क्वारेन्टाइनय् तःगु खः । स्वम्हेसिगु कोरोना परीक्षण याःसां नं छम्हेसिके जक कोरोना पोजेटिभ खनेदूगु खः ।

आः क्वारेन्टाइनय् २२ म्ह मनूत च्वनाच्वंगु निरौलां जानकारी ब्यूगु दु ।

Categorized in राष्ट्रिय