ad prabhu

झापांं येँय् वल पूर्वजुजु ज्ञानेन्द्र शाह, क्वारेन्टाइनय् च्वनी कि मच्वनी ?

नेवा: अनलाइन न्युज – ललेन्द्र शाक्य | २०७७ जेठ २, शुक्रबार १२:१६:३५

लकडाउनया हुनिं नेपाःया पूर्वया झापाय् अलपत्रय् लानाच्वंम्ह पूर्वजुजु ज्ञानेन्द्र शाह येँपाखे वःगु दु । गृहमन्त्रालयया सहमति कयाः झापाया जिल्ला प्रशासन ज्याकुथिं सवारी पास बिइधुंकाः थौं शुक्रवाः पूर्वजुजु शाह झापां येँपाखे वःगु खः ।

झापाया प्रमुख जिल्ला अधिकारी उदयबहादुर रानां गृहमन्त्रालयया सहमति कयाः म्हिगः बिहिवाः हे सनिलय् पूर्वजुजुयात सवारी पास बियागु जानकारी ब्यूगु दु ।

पूर्वजुजु ग्वाहालिमिं इमेलपाखें सवारी पास कायेत निवेदन बिइधुंकाः प्रशासन ज्याकुथिं पास ब्यूगु खः । तर, गृहमन्त्रालयया स्वीकृति मकाःसे सवारी पास बिइमदूगु जुइधुंकाः प्रशासन ज्याकुथिं उगु पास रद्ध याःगु खः ।

तर बिहिवाः सनिलय् हे गृहमन्त्रालया अनुमति कयाः पास ब्यूगु प्रमुख जिल्ला अधिकारी रानां धाःगु दु ।

प्रजिअ रानां धाःगु दु, “जिमिसं न्हापा बियागु पासय् गृहमन्त्रालयया अनुमति मदूगुलिं उकियात रद्ध यानागु खः । लिपा गृहमन्त्रालयया अनुमति कयाः म्हिगः बिहिवाः जक पास बियागु खः ।”

नीजि भ्रमणय् झापा थ्यंकूम्ह पूर्व राजदम्पत्ति लकडाउन सुरु जुइधुंकाः अन झापाय् हे च्वनेमाःगु खः । लकडाउन ताःहाकः जुजुं वनेधुंकाः शाह दम्पत्ति येँय् वये चाहेजूगु खः ।

लकडाउनया इलय् छगू जिल्ला मेगु जिल्ला वयेमदूगु नियम कथं अथे वःसा क्वारेन्टाइनय् च्वनेमाःगु नियम सरकारं दयेकातःगु दु । आः झापां निसें येँय् थ्यंकूपिं पूर्वजुजु दम्पत्तिपिन्त सरकारं क्वारेन्टाइनय् च्वनेत गुकथं पलाः न्ह्याकीगु खः ? थ्व स्वये ल्यंदनि धकाः सचेत नागरिकपिन्सं च्यूताः प्वंकूगु दु ।

Categorized in राजनीति