dudha jayanti 2568

ज्या यानाः नं जस मकाइम्ह व्यक्तित्व देवदास – मल्ल के सुन्दर

नेवा: अनलाइन न्युज – ललेन्द्र शाक्य | ने.सं. ११४४ सिल्लाथ्व नवमी

नेवाः न्ह्यलुवाः मल्ल के सुन्दरं मदुम्ह देवदास मानन्धर नेवाः ख्यलय् यक्व कथंया ज्या यानाः नं जस मकाइम्ह व्यक्तित्व जूगु खँ कनादीगु दु ।

वय्कलं थौंकन्हय्या न्हूपुस्ता चिचीधंगु ज्या यात धाःसां जस कायेगु नितिं दकले न्ह्यःने वइगु प्रवृत्ति जुयाच्वंगु खँयात न्ह्यथनादिसें देवदास सुनां हे मसीक थः सतीपिं पासापिंनाप च्वनाः दँदँ थःगु हे क्वथाय् भाषा, लिपि, संस्कृति लिसें थीथी नेवाः ख्यःया नितिं यायेमाःगु ज्या याइम्ह व्यक्तित्व जूगु खँ कनादीगु दु ।

श्रष्टा साँझ अमेरिका व लक्ष्मीदास लुमन्ति गुथिया मंकाः ग्वसालय् म्हिगः शनिवाः बहनी निघौसिबेंअप्वः ई जूगु देवदास मानन्धर लुमन्ति जूम ज्याझ्वलय् न्वःवासें नेवाः न्ह्यलुवाः मल्ल के सुन्दरं थुगु खँ न्ह्यथनादीगु खः ।

जूम ज्याझ्वलय् संस्कृतिविद् डा. त्रिरत्न मानन्धरं देवदास बहुआयामिक व्यक्तित्व जूगु खँ कनादिसें वय्कलं देवदासं नेपाल संवतया नगुमा (क्यालेण्डर) व्यवहारय् छ्यलेफूगु कथंया पिथनेगु ज्या याःगु खँ लुमंकादिल ।

अथेहे, ज्याझ्वलय् जनकवि दुर्गालाल श्रेष्ठ, भिक्षुकौडण्य महास्थवीर, पूर्वमन्त्री जीवनराम श्रेष्ठ, वर्ल्ड नेवाः अर्गनाइजेशनया नायः सयुंक्त श्रेष्ठ, श्रष्टा साँझ अमेरिकाया कजि प्रभात दीक्षित, भाषासेवी विष्णु चित्रकार, मंगल महर्जनलिसें थीथी वक्तापिन्सं न्वःवानादीगु खः ।

ज्याझ्वः कवयित्री प्रतिसरा सायमि व संचारकःमि सिल्भिया राजोपाध्यायं न्ह्याकादीगु खः ।

ज्याझ्वलय् ब्वति काःपिं सकलसितं छेँजःपाखें देवदास मानन्धरया किजा नारायणदास मानन्धरं सुभाय् देछानादीगु खः ।

देवदास मानन्धर लुमंकाः लय् पतिकं थुकथंया ज्याझ्वः यायेगु तयारी ग्वसाः खलकं याःगु दु ।

Categorized in नेवाः