nepal investment baink

ज्या जंको या बैंश (लुमन्ति च्वसु)

नेवा: अनलाइन न्युज | नेपाल संवत ११४४ तछलागा तृतीया (२०८१ असार १० गते) सोमवाः

मंगलमान शाक्य

०४६ सालया राजनैतीक थथ्याःक्वथ्याः लिपाः, २०४७ सालय् न्हूगु संबिधान वया  २०४८ सालया न्हूगु निर्वाचित सरकारं २०४९ सालय् याकुगु स्थानीय चुनावय् बुद्धिराजजु उम्मेदवार जुइमखन । उम्मेदवार मजुसां वय्कः निष्कृय जुया मदि । नेपाली कांग्रेसया उम्मेदवार बेखारत्न शाक्ययात वय्कःलं क्वातुक ग्वाहाली यानादिल धैगु गाईंगुई यात वय्कलं खः न मधाः, मखु न मधाः । थ्व गाईंगुइ जि उबले बेखारत्नजु नापनापं वय्कःयात त्याकेत न्हि न्हि सुथबंछि जुयाबले इलय्ब्यलय् पत्या याये बहः जुइक न्यना । 

बुद्धिराजजुं  पंचायत या अन्तिम ईलय् २ करोड ३२ लाख दाँ फ्याना ग्वसाःग्वया दिगु पुच्वःपुखुली थुबलेतकया दुने यल (उप–महा) नगरपालिका या न्हूगु तःखाछेँ दने सिधयेधुंकल । नापं न्हूगु पाजेरो छगः न दिके हय्धुंकल । येँ, यलया जनता माक्र्सया दारी, लेनीनया ग्वाय् अले माओ या आग्सा मदुगु छ्यं या जकः तुतः ब्वनिपिं वा इमित जकः गःचाः हिलाच्वनिपिं मखु धैगु खँ यलय् बेखारत्न व येँय् प्रेमलाल त्याना सिदत । बेखारत्नजुं मेयर पद बहाली मंगःया पुलांगु ज्याकुथी यासां याकनं हे पुच्वःया न्हूगु ज्याकुथीं ज्या न्ह्याकल । न्हापा टिका भैरवं राजकुलो पाखें लः वया पुच्वःया प्यंगु पुखूलि लः जाइगु खः । थुपिं पुखूया हे लः पिम्बाहा पुखूलि न जुका तःगु खः । प्यंगु मध्ये छगु पुखू त्री पद्य  स्कुलं काल । मेगु पुखू नगरपालिकाया जुल बाकि दुगु निगु पुखू  ८ रोपनी, ९ आना व २ पैसा या लागाया ब्यक्तिगत जुयाच्वंगु थ्व थाय् २०३४ सालं २ लाख ५४ हजार क्षतिपूर्ति नाप अधिग्रहण याना नगरपालिकायात ब्युगु खः । थ्व निगु पुखू या भोगचलन याय्गु अधिकार दुम्ह कीर्ति ब्रम्हानन्द जोशीयात थ्व क्षतिपूर्ति ब्यूगु खः । क्षतिपूर्ति न्ह्यः भोगचलनया बिषय मुद्दा जुया सर्वोच्च अदालत तक थ्यन । थ्व ईलय निर्माण तथा यातायात मन्त्री जुयाच्वंम्ह पशुपति शमसेरं पुखू ल्हाना नीजि छेँय् दय्केत थःम्हं यानागु निर्णय वय्कःया हे दवाबं थःम्हंतुं खुइमालावन । 

यल ललित कलाया जक मखु तान्त्रिक बिद्या व पुखूया न नगरी खः । न्हापा नेपाः व तिब्बत लडाईं जूबले भिन्छेबाहाया गुभाजुपिसं तत्कालिन सरकारयात तान्त्रिक बिद्यां याना लडाईं त्याकेत ग्वाहाली याःगुलीं तःफाल्वहतय् च्वंगु १६ रोपनी दुगु पुखूत भोगचलन याय्त बक्सिस बिल । लिपा भोगचलनया हे खँय् मुद्दा जुसेंली बिक्रम संबत् तीस दशकया ल्यूने पाखे १ रोपनी या पुखू जक ल्यंका बाकि जग्गा कुचा कुचा याना मिल। गुकेया लिच्वः थौंया कुमारीपाटी बजाः जुल । थौंकन्हे लगंख्यः, जाउलाख्यः, पिम्बालय् न्हापाया पुखूत ला दनि तर पुच्वः व तःफाल्वहतय् पुखूत मदय्धुंकुगुलिं यलय् मेमेगु पुखूत व ल्वहंहितित सुनावनाच्वन । 

उबलेया राजनैतीक लहनाय् बुद्धिराजजु हाकनं मेयर जुइगु  सिबें मजुइगु हे खँ आपाः । वय्कः पुलाम्ह पंच खःःसां, वयासिबें पुलांम्ह लाल कम्युनिष्ट खः । पुलांगु नितां त्वताः न्हूम्ह कांग्रेस जुइ मजुइगु खँ सुनानं मस्यु । तर २०५४ सालय् जूगु निक्वःगु स्थानीय चुनावया ई थ्यंबले वय्कःयात एमालें चुनाव त्याइगु लक्षण व न्हापा कम्युनिष्ट जूगु यात बः कया यलय् मेयर या उम्मेदवार यात । थुकियात छथ्वः यलया एमाले कार्यकर्ता तय्सं उग्र बिरोध याना नकबहिल जुया वय्कःया उम्मेदवार खारेज या धका जुलुस तकं वल । थुखे नेपाली कांग्रेसं हाकनं बेखारत्नजु यात टिकट बिल । थुगु चुनावय् बुद्धिराजजु थःत वःगु खःगु मखुगु द्वपंया दथुं यक्वः भोटं त्याना मेयर जुयादिल । थुगु चुनावय् जि भोट तक कुर्क मवंसे मुकं स्वकुमी जक जुया बिमाल । यद्यपी जिं भोट कुर्क वंगु जूसा बेखारत्नजुयात छगू भोट अप्वः वइगु जुई । थ्व इलय् नेपाली कांग्रेस इमिगु कथं, मेमेगु तःतधंगु ज्याःखँय् ब्यस्त जुईमागुलिं जि थें जापिं  छगू जक भोट बिइफुपिन्त वास्ता याना च्वने मलात । 

न्हापा बुद्धिराजजुया ज्याकुथी मंगलय् जूबले, वय्कःनाप खँल्हाबल्हा याय्गु व्हःताः चू मलाः । पुच्वःया यल उप–महानगरपालिकाय् वय्कः नाप खँल्हाय्गु व्हःताः चूलात । न्हापांगु छगू थजागु इलय् वय्कःयात जिं धया–छपिं हाकनं मेयर जुयावया थ्व न्हूगु तःखाछेँ पूवन, झी धाइनी दय्कुम्हं भोग याय् मखनकि  दय्कुगु छेँय् व दय्कुम्ह मनू नितां आसकुति जुया, आसांद्याना प्रेत जुइयः १ 

थनंलि वय्कःयात ज्याकुथी वा छेँय् बखत बखतय् थी थी ज्या खँय् नापलाय्गु जुजुं  वन ।

२०५४ सालं जि येँय् च्वंगु फिनलैण्ड दुतावासं ग्वाहाली याना  न्ह्याना च्वंगु नेपाः या बन विकास सम्बन्धी छगू आयोजनाय् परामर्शदाता कथं ज्या याना च्वनाबलय् दुतावास या कार्यवाहक राजदूत इसा हुर्तिगजुं जिगु मार्फत बुद्धिराजजुयात यलया मेयर ल्याखँ राजदूत या छेँय् भाटभटेनी बहनी या बेली या नितिं सःतल । राजदूत हुर्तिग नाप ज्याया सिलसिलाय् बरोबर नापलाइगु । छन्हु जिं खँ या सिलसिलाय् फिनलैण्ड  सरकारं यलया विकासया नितिं छुं याय्फैला धका खँ तयाबलय् राजदूतं सकारात्मक लिसः बियादिल । लिच्वःकथं मेयर–राजदूत या बेली ज्याझ्वः बने जुल । थ्व ज्याझ्वः क्वज्युगु ईलय् न्ह्याना तसकं सौहार्दपुर्ण वातावरणय् क्वचाल । लिपा वय्कलं मुकुन्द बिष्ट यात नगरपालिका पाखें विदेशीत नाप सम्पर्क तय्त औपचारिक रुपं जिम्मेवारी बिया न्हूगु कुतः यानादिल ।

थ्व हे सालं जि छगू ज्याय् पूर्वी युरोपीय् दे हंगेरी वनेमाबलय् तयारी या झ्वःलय् वय्कलं थःगु छेँया फोनं अन्तराष्ट्रिय कल व फ्याक्स कालबिल याय्गु सुबिधा जित बिया दिल । 

जुजु बिरेन्द्र नाप हार्दिक स्वापु व वय्क या थःगु हे यलय् बल्लागु जनाधारया हुनिं वय्कलं नगर प्रमुख कथं थःम्हं मनंतुनाथें यलय् ज्यायाय् खन । जुजु बिरेन्द्र व युवराज दिपेन्द्र या सुनियोजित हत्या लिपा जुजु ज्ञानेन्द्रं राज्य लाका कया दय्कुगु मन्त्री परिषदय् बुद्धिराजजु मन्त्री जुइ धुंका वय्कःया राजनैतीक जीवनया उत्तरार्धय् वय्कः यात सुखद अवकाश प्राप्त जुल । वय्कः यात एमालें ब्युगु मेयरया टिकट व जुजु ज्ञानेन्द्रं ब्युगु मन्त्री पद छता हे प्रवृति या राजनीतिक जिम्मेवारी खः गुकेयात बुद्धिराजजुं विवादरहित ढंगं मुदिता चित्तं पुवंका दिल । सखे बुद्ध, धर्म व संघ प्रति वय्कःया निरन्तर श्रद्धा या थ्व फल खः ।

प्यंगु कार्यकाल व नीछदँया यल नगरपालिकाय् प्रमुखया रुपय् बुद्धिराजजुया यलय् दूरगामी लिच्वः धैगु जिं स्वय् थनया झिंन्यागु बाहा बहिया भौतिक जिर्णोद्धार व संरक्षण खः । थुुकियात धौख्यलय् बुद्धिराजजु थें तःक मेयर जुयादिम्ह बेल प्रसाद श्रेष्ठ जु या दूरगामी लिच्वः काठमाडौं विश्वविद्यालय नाप तुलना याय् बह जु । थजागु ज्या जुइत, याय्त छम्ह मनून छकः जक कुतः याना गाइमखु तःक कुतः याय्माः, तःक कुतः याय्गु मौका वय्मा, मौका दय्के सय्के माः । 

यलया झिंन्यागु बाहा बहिया गुलि गुठी जग्गा दु, गुकथं मदया वन, दनिगु यात गुकथं ल्यंका तय्गु धैगु बारे न थुकिया भौतिक जिर्णोद्धार व संरक्षण या नाप नापं विचाःयाय्माःगु, माःगु ज्या याय्माःगु महत्वपुर्ण विषय खः । छगू उदाहरण कथं हिरण्यवर्ण महाविहारया धपगालय् च्वंगु जग्गा यात नगरपालिकां तरकारी बजाः दय्कल, छुँ जग्गा विहारं हे प्रक्रिया पुवंका मिल (गथे अशोक हल दुगु जग्गा, पिम्बाहा या गुगुं इलय् श्री चण्डी विद्याश्रम दय्के धाःगु जग्गा) थथेहे झीगु बाहा बहिया जग्गात झी झी मिले जुया झीसंहे, झीगु नितिं छ्यलाच्वना वा मेपिसं, कतपिसं झीसं मसिक छय्लाच्वन? झी मिले जुइ मफुगुलिं लाका यंकाच्वन? त्यला यंकाच्वन? हेका यंकाच्वन? खुया यंकाच्वन? झीसं छप्पं जुया थजागु सिइके, थुइके व पने माःगु दु । 

भारतीय राजदुत केभी राजन या पालं निसें यलया मेयर जुया शुरु जूगु थनया भारतीय दुतावास मार्फत भारतीय सरकारनाप या बुद्धिराजजुया सम्बन्ध थौतक्क त्वामदनी । भारतया तत्कालीन राष्ट्रपति के आर नारायण नेपाःवःबले येँ महानगरयात १२ करोड भारतीय सरकारं ग्वाहाली यागु खँ लुमंका यलय् न उकथं ग्वाहाली याय्माल धका राष्ट्रपतियात यलय् वःबले तप्यंक धाल । लिच्वः कथं राष्ट्रपति दिल्ली ल्याहांवना स्वलाया दुने ३ करोड २० लाख या नगरय् सरसफाई याय्गु सामान यलय् छोया हल । मेयरया पदावधि फुगुलि भारतीय सरकारं माक्व ग्वाहाली याना यलय् पुच्वय्तुं सभाहल दय्केगु वय्कःया मति धाःसा पुमवन । संकिर्ण विचाःयात राजनीति या नाँ छुना ब्युगुलिं थौं यलया सभाहल जुइमाःगु थाय् पार्किङ बालं नय्गु थाय् जुल । थ्वनापं भारतीय ग्वाहाली कया यलया भौतिक सास्कृतिक सम्पदा या विकासया नितिं मेयर जुया ज्या याय् मखँसां ललितपुर विकास को लागि समाज नाँ या संस्था चाय्का बुद्धिराजजुं थौकन्हे यानाच्वना दिगु कुतः दुवाले बहः । भारतीय दुतावासं थथे तप्यंक ग्वाहाली याय्गु लँपु जुजु ज्ञानेन्द्र या हे पालय् सूर्य बहादुर थापा प्रधानमन्त्री जुबले चाःगु खः । मछा मजुपिं नगरपालिकायात साक्षी तया, भवन विभागयात दाँ बिया बुद्धिराजजुं याना च्वनादिगु थ्व कुतः भारतीय दुतावासया लागी छगु न्ह्याईपुगु न्हूगु प्रयोग खः, मस्र्या तय्त जक मखु नेवाःतय्त न जिमिसं स्वया धका धाय्गु व धाय्केगु लँपु खः । बुद्धिराजजुया लागी ला थ्व थःगु कर्मया माःहना हे जुल । सिद्धिलाल, धिरेन्द्र, व ज्ञानेन्द्र जुजुं न्ह्याःवनाच्वंगु कर्मया माःहना । 

भूतपुर्व प्रधानमन्त्री कीर्तिनिधी बिष्ट, काजी नारायण प्रसाद श्रेष्ठ, प्रभु शमसेर जबरा अले बुद्धिराजजु दिगु , जिगु छेँय् जूगु छगू पारिवारिक मुनाय् बुद्धिराजजुं थौकन्हे भारतीय दुतावासया ग्वाहालीं वय्कःया समाज मार्फत यलय् जुयाच्वंगु बिकासया खँ विस्तारपुर्वक कनादिबले फुक सिनं ध्यान बिया न्यंगु खः । सरकारी पदय् मदुसां वय्कःया सकिृयता सिया वय्कः मन्त्री जुयादिगु मन्त्री परिषद् या उपाध्यक्ष कीर्तिनिधीजुं नेवाः भासं वय्कःयात धयादिल–छिं न्हू न्हूगु खँ न्यंकादिल बुद्धिराजजी ।

२०१७ सालया काण्ड लिपा परिवार व ब्यापारय् तक्यने न्ह्यः नेपाली कांग्रेसया नेता शुसिल कोइरालां हलिउडय् प्याखँम्वः जुइगु कुतः याथें बुद्धिराजजुं न बलिउडय् प्याखँम्व जुइगु लगभग सफल कुतः याःगु  खः ।२०१२ सालय् यलय् अशोक हल चाला न्हापां क्यंगु  ‘मयूरपंख’ निसें नीदँ सिबें अप्व तक अशोक हलय् क्यंगु छगु हे प्याखँ त्वमफिक वय्कलं स्वयादिल । प्याखँ स्वय्गु यायां थः हे हिन्दी प्याखनय् म्हितेगु धुन सवार जुल । अले २०१६ सालपाखे छगु हिन्दी प्याखँया पत्रिका मार्फत छगु फिल्म कम्पनीइ थःगु फोटो सहित हिन्दी भाषं हे चिठि च्वया बम्बई व्छल । खुलाती लिपा उखें वय्कःयात ब्वनापौ वल । च्वयाहल( छित जिमिसं ल्यया । गुलि फु याकनं पुनाय् अभिनयया खुला ट्रेनिङ कया बम्बई वा... तर वय्कःया माँ न वय्कःयात बम्बई मव्छसे थ्व खँ सिइवं ब्याहा या लागां चिनाबिल । थुकथं बम्बई वने त्वफ्युसां वय्कःया उबले हलय् वना प्याखँ स्वःवनेगु बानी धाःसा त्वमफ्यु । प्याखँ स्वय्गु उबलेया लत यात भौ यात धौ पासा धयाथें २०३७ साल पाखे वय्कः फिल्म सेन्सर बोर्डया दुजः जुल व हिन्दी प्याखँ हलय् वय् न्ह्यः स्वय्गु व्हःताः चुलात । 

शुसिल कोइराला प्रधानमन्त्री जुया राजनीतिइ सफल जुथें हलिउडय् सफल जुइला मजुइ थ्व ला धाय् थाकु तर बुद्धिराजजु बलिउडय् वंगु जुसा माला सिन्हा या भात सीपी लोहनी सिबें सफल जुइगु खइ । छाय्धाःसा प्याखँ म्वः जुइगु, प्याखँ  हुलेगु व म्ये हालेगु वय्कःयात दकले यःगु बिषयत खः । ब्यापारी जुया राजनीति याना मचाय्क तःपा ख्वाःपाः पुया प्याखँपा काय्गु सिबें चाय्क ख्वाःपाः पुया प्याखँपा काय्गु न्ह्याइपु नं लुधं न । पुना जुया उबले बम्बई थ्यने माःगु वय्कःया पलाः यलय् हे अतःमतः क्यन व थौंतक ज्या जंको या बैंश धुंका न क्यना हे च्वन तिनि...

Categorized in बिचा: