coved ad

ज्यापु महागुथि येँ महानगर समितिया न्हूपिं पदाधिकारीपिन्त भिंतुना देछात

नेवा: अनलाइन न्युज – ललेन्द्र शाक्य | २०७८ पौष २८, बुधबार ११:०४:३५

नेपाल संवत् राष्ट्रिय न्हूदँ समारोह समिति ११४२ पाखें ज्यापु महागुथि येँ महानगर समितिया न्हूपिं निर्वाचित पदाधिकारीपिं नायः पंचनारायण महर्जन, न्वकू नानीहेरा महर्जन व छ्याञ्जे मचाराजा महर्जनपिन्त भिंतुना देछाःगु दु ।

थथे न्हूपिं निर्वाचित स्वम्हं पदाधिकारीपिं न्हूदँ समारोह समितिया दुजःपिं खः । भिंतुना देछायेगु ज्याझ्वलय् समारोह समितिया नायः निरञ्जनरत्न शाक्यं वय्कःपिनिगु प्रगतिया कामना यासें थीथी मेमेगु जातिया संगठनलिसे नं समन्वय यानाः ज्यापु महागुथि येँ महानगर समिति न्ह्यज्यायेत इनाप यानादीगु खः ।

ज्याझ्वलय् ज्यापु महागुथि नेपाःया केन्द्रीय न्हापांम्ह न्वकू सन्त महर्जनं न्हूदँ समारोह समितिं थथे भिंतुना देछाःगुलिं लसता प्वंकूसें नेवाःतय्गु थीथी विषययात कयाः सकल नेवाःत छप्पं जुयाः न्ह्यायेमाःगु विचाः प्वंकादिल ।

अथेहे, न्हूम्ह निर्वाचित नायः पंचनारायण महर्जनं ज्यापु जाति जक मखु, सकल जातियात कःघानाः वनेफत धाःसा जक नेवाः जाति बल्लाइगु विचाः प्वंकादिसें वइगु दिं थःपिन्सं उकथं हे पलाः न्ह्याकेगु विचाः प्वंकादीगु खः ।

न्हूदँ समारोह समितिया ब्यवस्थापन पुचःया दुजः सुजीव बज्राचार्यं लसकुस यानादीगु उगु ज्याझ्वलय् निर्वाचित जुयादीम्ह न्वकू नानीहेरा व मेम्ह निर्वाचित छ्याञ्जे मचाराजा महर्जनं नं नुगःखँ प्वंकादीगु खः ।

निर्वाचित जुयादीपिं न्हूपिं पदाधिकारीपिन्त ख्येँ सगं बियाः व खादा न्ययेकाः सम्मान याःगु खः ।

ज्याझ्वलय् ज्यापु महागुथिया न्हापांम्ह उपाध्यक्ष सत्यनारायण डंगोल, नेवाः न्ह्यलुवाःपिं उमेश स्थापित, ज्योति शाक्य, शैलेश शाक्य लगंबरे, धर्मदेव महर्जन लिसेलिसें मिसा न्ह्यलुवाःपिनिगु उपस्थिति दूगु खःसा ज्याझ्वः न्हूदँ समारोह समितिया दुजः अमृत ताम्राकारं न्ह्याकादीगु खः ।

Categorized in नेवाः