nepal life 2076 3 18

ज्यापु दिवसया राष्ट्रिय–म्ये

– लोककवि राजभाइ जकःमि

 

झीगु राष्ट्रिय ज्यापु–दिंया

भिन्तुना–स्वां छाः वया

झी नुगः–सः गुनुहुँ थ्वय्काः

झीगु हे म्ये हाः वया ।

 

देश झःझः धाय्क न्यंक

ह्वय्क्य झललल ज्यापु–स्वां

ज्यान हे बलिदान बी, तर

ख्वय्क्य मखु नेपाल–मां

आदिवासी देय्–थुवाः झी

फुक्क छम्ह थें न्ह्याः वया

झीगु राष्ट्रिय ज्यापु–दिंया

भिन्तुना–स्वां छाः वया ।

 

स्वाभिमानी आजु–अजि थें

थः तुती हे झी दने

जातिया स्वायत्त राज्यं

न्हूगु नेपाः नीस्वने

ल्वापु न्हन्यमा शान्ति न्यन्यमा

मुक्तिया जः माः वया

झीगु राष्ट्रिय ज्यापु–दिंया

भिन्तुना–स्वां छाः वया ।