nepal investment baink

ज्याथीम्ह कवयित्री नारायणदेवी श्रेष्ठया छपू म्येया म्यूजिक भिडियाे पिदन

नेवा: अनलाइन न्युज – विजयरत्न | २०८० मङ्सिर १, शुक्रबार ११:०७:५९

'पासा उगु दिन वइतिनि' थेंज्या:गु ज्व:मदुगु म्ये च्वयादीम्ह ज्याथीम्ह कवयित्री नारायणदेवी श्रेष्ठया स्वक्वःगु ज्या–जंक्वया लसताय् वय्कलं हे च्वयादीगु 'प्रेम आश दुने बिलिबिलि जायेकाः’ बोलया म्येया म्यूजिक भिडियाेया रूपय् नं पिदनसा थुगु हे म्ये खसभासं नं हिइका पिकागु दु । नितां हे म्यूजिक भिडियाेया उलेज्या अग्रज कवयित्री नारायणदेवीजुया जंक्वःया लसता भ्वजय् शुक्रवाः जूगु खः  ।

क्षेत्रपाटी पार्टी प्यालेसय् जूग जंक्वःया लसता भोजय् वय्कःयातः देछाः कथं वय्कःया कायपिं व परिवारजनपिं गणेशराम श्रेष्ठ, मेरी पात्रवंश, दिनेशराम श्रेष्ठ, महेशराम श्रेष्ठ व नरेशराम श्रेष्ठया कुतलं वयकलं च्वयादीगु 'प्रेम आश दुने बिलिबिलि जायेकाः’ बोलया म्येया म्यूजिक भिडियोलिसें खस भाषं हिइका निर्माण यानाः पिकाना थः मांयात देछाःगु खः ।

म्येया नेपाली अनुवाद वरिष्ठ गायक, संगीतकार एवं साहित्यकार योगेश वैद्यजुं यानादीगु खः । कवयित्री नारायणदेवी श्रेष्ठजुया दकले न्हापां पिदंगु 'मुखु स्वाँ’ नांया कविता सफुतिइ दुथ्याःगु थुगु म्ये संगीतवद्ध यानाः रीता महर्जनं हालादीगु खःसा संगीत संयोजन जुगल डंगोलं यानादीगु खः ।

म्यूजिक भिडियोया छायांकन, सम्पादन एवं निर्देशन राजेन्द्र डंगोलं याःगु खः । म्यूजिक भिडियोस सुमिना महर्जनं नृत्य व अभिनय याःगु खःसा अनु महर्जनं कोरियोग्राफी यानादीगु खः ।

Categorized in कला