nepal investment baink

जेठ ३१ गतेनिसें मेलम्चीया लः मवइगु !

नेवा: अनलाइन न्युज – ललेन्द्र शाक्य | नेपाल संवत ११४४ तछलाथ्व पंचमी (२०८१ जेष्ठ २९ गते) मंगलवाः

जेठ ३१ गतेनिसें मेलम्चीया लः वितरण बन्द जुइगु जूगु दु ।

जेठ निगूगु वाःनिसें हे मेलम्ची खुसिया लः बुलुसे च्वनाः वंगुलिं जेठ ३१ गतेनिसें आयोजनाया सुरुङय् लः पथान्तरण बन्द जुइगु मेलम्ची खानेपानी विकास समितिं जानकारी ब्यूगु दु ।

जेठ ३१ गते हे नेपालय् मनसुन सक्रिय जुइगु जूगु दु । समितिया कार्यकारी निर्देशक रत्न लामिछानें मनसुन सुरु मजुइवं हे खुसिया लः बुलुसे च्वनाः वंगुलिं जेठ ३१ गतेनिसें आयोजनाया सुरुङय् लः पथान्तरण बन्द जुइगु निर्णय याःगु जानकारी ब्यूगु दु ।

वं धाःगु दु, “थ्वहे जेठ ३१ गतेनिसेंसुरुङय् लः पथान्तरण बन्द यायेगु खानेपानी मन्त्रालयस निर्णय जूगु दु तर मनसुन दुहाँ वःसां नं तसकं वाः मवःतलेतक लः पथान्तरण बन्द मयायेगु जुइ ।”

वं थःपिं खुसिया लःया “क्लोज मनिटरिङ”य् दूगु धासें मुहान क्षेत्रय् तच्वकं वा वयाः खुसिइ नां चुइकल धाःसा लः पथान्तरण तुरुन्त बन्द यायेगु जानकारी ब्यूगु दु ।

२०७८ असार १ गते व साउन १६ व १७ गते भ्रेमथाङपाखें वःगु खुसिबाः व चलखं मेलम्ची खानेपानी आयोजनाया हेडबक्स संरचना तहसनहस याःगु खः, गुगु आःतक पुनःनिर्माण जुइफूगु मदुनि ।

वंगु दँ असार २० गते लः पथान्तरण बन्द याःगु खःसा माघ १ गतेनिसें उपभोक्ताया हितिइ लः छ्वयेगु सुरु याःगु खः ।

सरकारया वइगु आर्थिक दँ ०८१/०८२ या नीति व ज्याझ्वलय् दँ ज्वःछि हे मेलम्चीया लः आपूर्ति जुइगु व्यवस्था मिलेयायेगु प्रतिबद्धता प्वंकूगु दु ।

Categorized in बजाः