nepal investment baink

जेठ असारय् कोरोना संक्रमण उच्च विन्दुइ थ्यनेफु : स्वास्थ्यमन्त्री

नेवा: अनलाइन न्युज – ललेन्द्र शाक्य | २०७७ चैत्र २३, सोमबार १६:४५:१०

सरकारं वइगु जेठ असारय् कोरोना भाइरस कोभिड १९ या संक्रमण हाकनं उच्च विन्दुइ थ्यनेफूगु आंकलन याःगु दु ।

स्वास्थ्यमन्त्री व जनसंख्यामन्त्री हृदयेश त्रिपाठीं लिपांगु दिनय् हाकनं संक्रमण अप्वयाः वःगु धाःगु दु । आइतवाः संसद बैठकयात सम्बोधन यासें स्वास्थ्यमन्त्री त्रिपाठीं धाःगु दु, आःया दिनय् जनस्वास्थ्यया मापदण्ड पालनायात प्रभावकारी यायेमफुत धाःसा संक्रमण अप्वयाः जेठ असारय् मेगु उच्च विन्दुइ थ्यनेफु ।

थ्वसिबें न्ह्यः कार्तिक महिनाय् संक्रमण उच्च जूगु खः । कार्तिक ५ गते छन्हुं हे ५७४३ म्ह न्हूपिं संक्रमित लुयावःगु खःसा १० गते पोजेटिभिटी रेसियो (परीक्षणया आधारय् संक्रमितया अनुपात) ३५ प्रतिशत जूगु खः ।

भारतय् अप्वयाः वयाच्वंगु संक्रमणं नेपाःयात थप सचेत याःगु तकं मन्त्री त्रिपाठीं धाःगु दु । हाकनं लकडाउनय् वने म्वालेमा धकाः छ्यलेमाःगु फुक्क प्रभावकारी पलाः छ्यलेत सरकार तयार दूगु धासें वं धाःगु दु, आःया नेपाःया अवस्था आतंकित जुइमाःगु अवस्था मदु ।

मन्त्री त्रिपाठीया कथं थ्यंमथ्यं १८ लख नागरिकपिन्त खोप बिइधुनागु दु व असारतक ६० लख जनतायात बिइगु सरकारया आज्जु दु । खोप हयेत रकम अभाव मजुइगु धासें मन्त्री त्रिपाठीं धाःगु दु, खोपया नितिं ४८ अर्ब बजेट सुरक्षित दु । उलि नं खर्च मजुइफु ।

मन्त्री त्रिपाठीं कोरोनाय् जूगु खर्चया स्वेत पत्र जारी यायेगु प्रतिबद्धता तकं प्वंकूगु दु ।

Categorized in राष्ट्रिय