नेवा: अनलाइन न्युज – निश्चल | नेपाल संवत ११४४ तछलाथ्व पंचमी (२०८१ जेष्ठ २९ गते) मंगलवाः

येँया थबही लागाय् लाःगु जुद्धोदय मा.वि. (जेपी स्कूलय्) चायेकातःगु फुक्क पसःक्वः येँ महानगरपालिकां बन्द यानाब्यूगु दु । 

निगू तल्ला पसःक्वः दयेकातःगु उगु स्कूलय् थ्यंमथ्यं न्ययेगूसिबें अप्वः पसः येँ महानगरपालिकां सोमवाः बन्द याःगु खःसा थौं मंगलवाः सुथय् नं बन्द मजूगु पसः महानगर प्रहरी वनाः सटर हे सालाः तालं ग्वयाब्यूगु दु । 

येँ महानगरपालिकां सामुदायिक स्कूलय् पसः तयेगु अधिकार मदुगु धासें सोमवाः येँया थीथी सामुदायिक स्कूलय् चायेकातःगु पसः बन्द यानाब्यूगु खः ।

जुद्धोदय मावि।या ६० प्रतिशत लागाय् पसः दयेकाः बालं बिइगु ज्याय् तःधंगु आर्थिक अनियमितता जूगु तथ्यत पिने पिहाँ वःगु दु । थनी झिंन्यादँ न्ह्यः पसःक्वः दयेकाः बालं बिइगु नितिं ठेकेदारनाप याःगु सम्झौता पायछि मजूगु व उगु सम्झौता कथं उगु स्कुलं बालं ब्यूसां ठेकेदारयात जक लवः दइगु ज्या याःगुलिं आर्थिक अनियमितता जूगु आशंका यानाहःगु खः । 

Categorized in स्थानिय-समाज