nepal investment baink

जीप दुर्घटनाय् लानाः तच्वकं घाःपाः जूपिं निम्ह सित

नेवा: अनलाइन न्युज | २०८० मङ्सिर ४, सोमबार १३:०८:१८

रुकुम पश्चिमय् जीप दुर्घटनाय् लानाः तच्वकं घाःपाः जूपिं निम्ह सीगु दु ।

सीपिं चौरजहारी नगरपालिका १३ या ४५ दँया मस्तबहादुर ओली व सानीभेरी गाउँपालिका २ या ७ दँया मचा प्रतिक बुढा खः ।

मचा प्रतिक बुढायात वासः यायेगु नितिं एम्बुलेन्सपाखें सुर्खेत यंकाच्वंगु इलय् सल्यान जिल्लाया नेटा धैगु थासय् व ओली चौरजहारी अस्पतालय् सीगु चौरजहारी नगरपालिकाया नगर प्रमुख पुष्प वादीं जानकारी ब्यूगु दु ।

नगर प्रमुख वादीया कथं मेपिं न्याम्हेसिगु अवस्था नं तच्वः जुयाच्वंगु लिं गृहमन्त्रालयस समन्वय यानाः येँपाखें हेलिकोप्टर वयेत्यंगु व वहे हेलिकोप्टरपाखें थप वासः यायेगु नितिं येँय् छ्वयाहयेगु तयारी जुयाच्वंगु नगर प्रमुख वादीं जानकारी ब्यूगु दु ।

थौं सोमवाः सुथय् चौरजहारी नगरपालिकापाखें जिल्ला सदरमुकाम खलंगा वयेगु झ्वलय् चौरजहारी ८ गैरी जिउलाय् लु१ज २२९७ ल्याःया जीप दुर्घटनाय् लाःगु खः ।

जीपय् च्वनावःपिं चालकलिसें २२ म्ह घाःपाः जूगु खः ।

जीप मध्यपहाडी राजमार्ग अन्तर्गत लाःगु गैरी जिउला सतकखण्डं भेरी खुसि सिथय् कुतुंवंगु खः ।

घाःपाः जूपिनिगु चौरजहारी मिसन अस्पतालय् वासः जुयाच्वंगु दु । जीपय् क्षमतासिबें अप्वः यात्रु तयाहःगुलिं दुर्घटना जूगु जुइफूगु प्रहरीं आँकलन याःगु दु ।

थुकिया बारे थप अनुसन्धान जुयाच्वंगु जिल्ला प्रहरी ज्याकुथि रुकुम पश्चिमया सुचं अधिकारी प्रहरी निरीक्षक विष्णु प्रसाद श्रेष्ठं जानकारी ब्यूगु दु ।

Categorized in दुर्घटना-अपराध