Arin Enterprises

जि थौंनिसें जाँच बिइत वनेत्यना : रवि लामिछाने

नेवा: अनलाइन न्युज – ललेन्द्र शाक्य | २०७९ मङ्सिर ८, बिहिबार १४:०४:०९

राष्ट्रिय स्वतन्त्र पार्टीया सभापति रवि लामिछानें चुनाव त्याकेगु धैगु विजयी जुइगु मजूगु धाःगु दु ।

चितवन २ पाखें आपालं मतान्तरं चुनाव त्याकेधुंकाः रवि लामिछानें सकल मतदातापिन्त सुभाय् बिसें थुज्वःगु प्रतिक्रिया ब्यूगु खः ।

लामिछानें थौंनिसें थः जाँच बिइत वनेत्यनागु नं न्ह्यथंगु दु । व, उकिया लिच्वः न्यादँ लिपा वइगु वया धापू दु ।

रवि लामिछानें च्वःगु दु, राजनीतिइ निर्वाचित जुइगु धयागु विजयी जुइगु मखु । थ्व ला जाँच बिइत वनेगु नितिं सक्षम जुइगु जक खः । जि थौंनिसें जाँच बिइत वनेत्यना, गुकिया लिच्वः न्यादँ लिपा जक वइ । जि जनतायात त्याकेत जाँच बिइत वनाच्वना । उकिं जि आः हे विजय जुलुस याये चाहेमजू । जि विजय जुलसया पलेसा थौं स्वता इलय्, भरतपुर १० गेष्ट हाउस चौरय्, कन्हय् शुक्रवाः ११ ता इलय् इच्छाकामना गाउँपालिका ज्याकू न्ह्यःनेया फुटबल ग्राउण्ड कुरिनटारय् व कन्हय् शुक्रवाः हे स्वता इलय् सहिद स्मृति क्याम्पस चौर पद्मापुर कालिकाय् सुभाय् सभा यायेत्यनागु दु ।

छगू इनाप, कृपया अन वयेबलय् जिगु नितिं स्वांमाः, अबिर, खादा छुं नं हयादीमते । जि थौंनिसें हे ज्याय् पलाः तयेत्यना । जिगु सभा जुइगु थासय् निगः बाकस दइ । छगः बाकसय् समस्या पेटिका च्वयातःगु दइ । उकी छिकपिनिगु समस्या च्वयाः कुर्ककादिसँ । अले मेगु बाकसय् उजुरी, समस्या, सुझाब पेटिका च्वयातःगु दु । उकी, भ्रष्टाचारीया सुचं, जिं यायेमाःगु ज्या, जितः खबरदारी च्वयाः कुर्ककादिसँ ।

स्वांमाः, अबिर, खादाय् झीसं यानागु खर्च प्रायः फुक्क विदेश वनी । छुं हयेगु हे मन दुसा थःपिनिगु हे आँगन वा लँपुइ दूगु छफ्वः स्वां दःसा जितः गाः । जि गुलिफु उलि ज्याय् पलाः तये चाहेजू । भोट फ्वनेत, जुलुस यायेत वयेगु ई मदूगु थासय् जि ज्या यायेत वये ।

Categorized in राजनीति