Mohanai 2078 KTM

जिपिं चीनलिसे झुकेजुइमखु : ताइवानी राष्ट्रपति

नेवा: अनलाइन न्युज – ललेन्द्र शाक्य | २०७८ आश्विन २४, आइतबार १५:४५:४०

ताइवानी राष्ट्रपति साइ यिङ वेनं थःपिं चीनलिसे झुकेमजुइगु धाःगु दु ।

ताइवानया राष्ट्रिय दिवसया लसताय् ग्वसाः ग्वःगु छगू सभायात सम्बोधन यायेगु झ्वलय् वेनं चीनलिसे ताइवान झुकेमजुइगु प्रष्ट याःगु खः ।

ताइवानीपिं दबाब न्ह्यःने झुकेजुइगु छुं नं भ्रम मतःसां ज्यू, वेनं राष्ट्रिय दिवसया लसताय् चीनप्रति लक्षित यासें धाःगु दु ।

चिनियाँ राष्ट्रपति सी जिङफिङं ताइवानलिसे शान्तिपूर्ण पुनःएकीकरण यायेगु धाःगु कन्हय् कुन्हुं वेनं ताइवानीपिं चीन न्ह्यःने झुकेमजुइगु धाःगु खः । वं ताइवानया लोकतान्त्रिक जीवनशैलीया रक्षार्थ सैन्य क्षमता थप मजबुत यायेगु नं धाःगु दु ।

चिनियाँ योजना कथं वनेगु नितिं सुनां थःपिन्त दबाब बिइमफयेमा धकाः राष्ट्रिय सुरक्षा मजबुत यायेगु वेनया धापू खः ।

चीन न्ह्यःने हःगु लँपुं न जिमित स्वतन्त्र व लोकतान्त्रिक जीवनशैली प्रदान याइ न निगू करोड ३० लख ताइवनीपिन्त सार्वभौम याइ धकाः वेनं धाःगु दु ।

चीनं लिपांगुखुसि ताइवानयात सैनय दबाब बियाः वयाच्वंगु दु । शनिवाः चिनियाँ राष्ट्रपति सी नं ताइवानलिसे शान्तिपूर्ण पुनःएकीकरण यायेगु बाचा याःगु खः ।

ताइवानलिसे छुं नं हालतय् एकीकरण यायेगु संकल्प नाः वयाच्वंम्ह सीया लिपांगु अभिव्यक्ति धाःसा छुं नरम जूगु खः । तर वं मातृभूमि व इतिहास ल्वःमंकाः मुलुक कुचा याइपिनिगु भिं मजुइगु नं धाःगु खः ।

Categorized in अन्तर्राष्ट्रिय