kmc bidya

जितेन्द्रया हरर संकिपा स्वंगू भाषं पिदन

नेवा: अनलाइन न्युज – विजयरत्न | २०७७ जेठ ६, मंगलबार ११:०२:५९

“थः कतः कतः थः” नांयागु नेवाः संकिपा दयेकाः चर्चाय् वःम्ह निर्देशक जितेन्द्र राजोपाध्यायं थ्व लकडाउनया ईया सदुपयोग यानाः छगू न्हूगु चिसंकिपा “आक्रान्त” दयेकूगु दु । नेपालभाषा, तामाङ्ग व खस नेपाली भाषा नापं यानाः स्वंगू भाषां दयेकूगु थ्व संकिपा हरर संकिपा खः ।

मू भुमिकाय् हरिकृष्ण शाहीया याकः अभिनय दुगु थ्व “आक्रान्त” चिसंकिपाय् (निजु) नेहा अवाले व कोहीनूर राजोपाध्यायया बिस्कं कथंया बःचाहाकःगु भूमिका दु ।

थ्व लकडाउनया इलय् म्हो जक कलाकार व प्राविधिक छ्यलाः छखा छेँय् दुने क्वचायेका तःगु दु ।

नेपालय् हरर विधाय् उलि संकिपा दयेकातःगु खनेमदुसा नेपालभाषाया संकिपा ख्यलय् “बारासी” नांयागु संकिपायात न्हापांगु हरर संकिपाया रुपय् कयातःगु दु ।

चिसंकिपाया ख्यलय् “द रिंग” नांयागु छगू निगू बाहेक हरर संकिपा उलि पिदंगु मदुनिगुलिं थ्व “आक्रान्त” संकिपा हरर संकिपाया मतिनामिपिनिगु निंतिं न्हूगु सवाः जुइफु धकाः धायेमाः ।

मुक्कं १५ मिनेट जक ताःहाकःगु थ्व चिसंकिपा थ्वहे वालय् जितेन्द्र राजोपाध्याय व हरिकृष्ण शाहीया युट्युब च्यानलपाखें रिलिज याःगु खःसा स्वःपिन्सं येकाच्वंगु दु धकाः निर्माण पक्षं कंगु दु ।

थ्व “आक्रान्त” संकिपाय् जयनकुमार मोक्तानं छायाँकन यानातःगु दुसा स्वंगू भाषं दयेकुगु थ्व संकिपाय् डबिंगय् जितेन्द्र राजोपाध्याय, जयनकुमार मोक्तान, कुमारी थिङ्ग, अवि लामा, सचि राजोपाध्यायपिन्सं सः बियातःगु दु ।

थुके ब्याकग्राउण्ड म्युजिकया ज्या कुमार लामा योञ्जनं याःगु खःसा बाखं, परिकल्पना, सम्पादन व निर्देशन जितेन्द्र राजोपाध्यायं याःगु खः ।

खस नेपाली फिल्मया ख्यलय् नं थःगु पलाः न्ह्याकेगु तयारी यानाच्वंम्ह निर्देशक जितेन्द्र राजोपाध्यायया छगू खस नेपाली फिल्म “घनचक्कर” याकनं हे पिदनेत्यंगु दुसा थुके सौगात मल्ल व सलोन बस्नेत थेंज्यापिं नेपाःया नांजाःपिं कलाकारपिन्सं मेनरोल म्हितातःगु दु ।

Categorized in कला