1142 nhoo dan adv

जितः सहिद याये मते न्हां (चिनाखँ)

जितेन्द्र महर्जन ‘याकःमि’ किपू

जिके म्वाःगु हि बाः वल
जिगु नुगः दुने घाः जुल
जितः सहयाये मफयाः
हाला जुयाः लँय्लँय्
देय् कुचा कुचा थइन
चुपिं सुयाः नुगः दुनेंदुनें
नये मखंपिं गरिब जनता
ग्वारा तुलाः हाला जुल लँय्लँय्
दुबिधा मदु, नं आभाष हे दु सुयाकें

थन थौं
सर्गतं निभाः दनननं त्वःगु हे खः
जनताया झुपडी स्व
खिउँया खिउँ न्ह्याबलें न्ह्याब्लेंया निंतिं
अरबौं  ध्यबा दँय्दँसं थन
खुसि बाः वय्थें वःगु नं खः

अय्नं
धौ फिनाः तःगु दु म्हुतु जायेक
गान्धारी, धृतराष्ट्र थें जुल मिखा दयाःनं
हानं खँ सःम्ह द्यः जुयाः
ज्या सःम्ह च्यो जुयेवं
नये मखंम्हं सुकूप्वाः चिंकाः
ल्हाः फफं सःहे सुकल
अय्नं वयात विइत सुयाकें मदु थाय्
छाय् कि व गरिब हे नं खत

उकिं
मुक्ति व स्वतन्त्रं लँ ल्यःम्ह योद्धां
थौं क्रान्तिया सः थ्वयेके त्वःतल
अलय् जिगु मिखां नं ख्वबि ज्वल
मन मस्तिष्कं धया हल
म्हां जि म्हां
कतःया नितिं जि ल्वाय् न्ह्यां हे म्हां
चाहे वं जितः
जिगु छ्यनय्
बज्रं हे छाय् मछ्यायेमा

तबि नं
थःगु स्वार्थया निंतिं 
देखासिखि याइपिं
खबरदार ! सावधान
थन हाकनं छक्वः
याकनं हे
दनदन मिं प्वाः च्यायेत्यंगु दु
उगु मिं प्वालं
देय् कुचाकुचा थलाः इनाकायेत
म्हुतुइ धौ फिनाः
गान्धारीया मिखाथें कां जुइत
मुक्ति व स्वतन्त्रं लँ ल्यःम्ह योद्धां
क्रान्तिया ध्वाँय् त्वःतकेत
सहिदया जन्म हाकनं यायेमते न्हां
नुगःया सलं धैच्वन हाकनं

अन्तय्
श्रद्धाञ्जली दु जिगु
अमर सहिद सहादतपिंत
ज्वजलपा दु मां जन्म ब्यूम्हेसित 
लिसें बिन्ति दु
अजाःम्ह क्रान्तिया न्ह्यलुवाः जितः
जुइके बिइमते न्हां

बिन्ति दु
अजाःगु क्रान्तिया सहिद जितः
जुइके बिइमते न्हां
जितः सहिद याये मते न्हां .

(थुगु चिनाखँ निक्वःगु नेपालभाषा ‘जन साहित्य गोष्ठी—११३६’ किपूया पांगाय् जूगु चिनाखँ धेंधेंबल्ला कासाय् न्हाप लाःगु खः ।)