prabhu baink new

जिं थःत छ्यार्र त्वःते मास्तिवः (पद्मरत्न तुलाधरया च्वखँ)

-पद्मरत्न तुलाधर

जिगु न्ह्यःने छगू आजु दु । उगु आजुइ थ्यनकि  जिगु भिं जुइ । जि थें जाःपिं सकलें जनताया भिं जुइ । थथे सीकं नं जि वाताहां अनया अन हे तुं । जिं चाः, थ्व जिगु कमजोरी खः । जिं थू, थ्व जिगु हे जक ग्याः पहः खः । देशय् जुयाच्वंगु अन्याय, अत्याचार, अव्यवस्था फुक फुक स्वयाः थुइकाः जिं त्वलहं त्वलहं जक उगु आजुइ स्वयाच्वना ।

भुतुमालि ल्वाकीबलय् मेगु भुतुमालि चायेत माजा दुगु का छ्यार्र त्वःती थें जिं नं थःत छ्यार्र त्वःते मास्तिवः ।

जिं न्ह्याबलें थःत कुंका च्वनाम्ह थें ताइगु । न्ह्याबलें न्ह्याबलें जिं थःत चिका च्वनाम्ह थें ताइगु । जिके गुबलें गुबलें दना वइगु विद्रोह नं जिं प्वंके मफु । संस्कारं चिका च्वनाम्ह जि, नैतिकता व अनैतिकताया स्वःतिपाँचय् तक्यना च्वनाम्ह जि, जिगु स्वतन्त्रता सुनानं लाकातःथें जिं थःम्हं थःतहे पिल्ह्वये मफु ।

कानूनं ख्यानातःम्ह जि, जि गुलि ग्याफर, जिं अन्यायया विरोधय् नापं सः तयेमफु । जिं संस्कार दयेकुगु थः नापं सकलें भिंकेत, नैतिकता व अनैतिकताया दापँ नं जि भिंगु लँपुइ न्ह्यज्यायेत खः । कानून धैगु सकस्यां भिंया निंतिं हे । थथे हे खः, थ्व थथे हे खः जिं स्यू । अय्नं जि चायेकाच्वना । जि उसिहि तकं हे सने मफु थ्व न्ह्यज्याये हे जक माःगु लँपुइ । थ्व बन्धन जिं थः थम्हंतुं हे नाला कयाच्वनागु थें नं च्वनावइ । छाय्धाःसा जि थः हे दने मफुम्ह थें, थः थःम्हं हे ग्याना च्वनाम्ह थें ।

जिगु न्ह्यःने छगू आजु दु । उगु आजुइ थ्यनकि  जिगु भिं जुइ । जि थें जाःपिं सकलें जनताया भिं जुइ । थथे सीकं नं जि वाताहां अनया अन हे तुं । जिं चाः, थ्व जिगु कमजोरी खः । जिं थू, थ्व जिगु हे जक ग्याः पहः खः । देशय् जुयाच्वंगु अन्याय, अत्याचार, अव्यवस्था फुक फुक स्वयाः थुइकाः जिं त्वलहं त्वलहं जक उगु आजुइ स्वयाच्वना ।

गनं थ्यंके हे माः धकाः जिं बांलाक स्यू । जि विवश खः ला ? मखु । जिगु अधिकार मदुला ? दु । जि स्वतन्त्र मखु ला ? खः । द्वन्द्व हे जुइम्वाःगु थ्व फुक्क खँय् नं जि अलमल अलमल । गुलि छुं नं मखु थें सालिक थें जि ! थ्व फुक्क थुलकि जितः चिनातःगु संयम चबुइ माः, धैर्य ब्यने माः ।

अय्नं जि व हे व हे जक ग्याफर । थ्वहे ग्याःचिकु पहलं जि उकुस मुकुस । थ्वहे बन्धनया जालय् जि मछिं मछिं । जि फसय् कुनातःम्ह थें, जि तसकं तःधंगु जेलया बन्दी थें ।

तर चमबू, चमब्यं । उकिं थ्व जिगु हे कमजोरी । जिं जितःहे कुना तयागु, थुना तयागुया चिं थ्व । थथे नं जि चायेके धुन । अय्नं जिके ग्याःचिकु । अय्नं जि व हे व हे जक ग्याफर । थ्वहे ग्याःचिकु पहलं जि उकुस मुकुस । थ्वहे बन्धनया जालय् जि मछिं मछिं । जि फसय् कुनातःम्ह थें, जि तसकं तःधंगु जेलया बन्दी थें । उकिं जितः आः जिगु थ्व नियमित गती विश्वास मदु । थ्व गति हे नं जितः छगू न्यवः थें । उकिं थःत मचिसे, थःत मकुंसें, थःत मह्येकुसे ब्वये मास्तिवः, न्ह्यलुइ मास्तिवः, न्ह्यज्याये मास्तिवः ।

भुतुमालि ल्वाकी बलय् मेगु भुतुमालियात चायेत माजा दुगु का छ्यार्र त्वःती थें जिं नं थःत छ्यार्र त्वःते मास्तिवः । धात्थें थम्हं थःत हे त्वःते मास्तिवः छ्यार्र................छ्यार्र..................उगु थासय् थ्यंकेत गन फुक मनूतय् म्हगस बाय् च्वंच्वन ।

(नेवाः न्ह्यलुवाः पद्मरत्न तुलाधरया न्हापांगु ज्याजंक्वया लसताय् वय्कलं हे च्वयादीगु ‘बाथरुम व मेमेगु निबन्ध’ सफूपाखें ल्ह्यया –सं.)