zero media family planning adv

जिं इहिपा याय् मखुत

- रेखा शाक्य

“छं म्ह्याय् नं बी न्यात धाःगु मखु ला ? गबले ले ?”

लँय् थःगु मतापं वनाच्वनाम्हस्या जिगु लिक्क वयाः तःगु थ्व न्ह्यसलं जिगु न्हाय्पं तिंस्वात । लिफः स्वयां  द्यइके वयाच्वंपिं निम्ह बाज्यःति वंपिं मिस्तय् खासखुस । लिसलय् व मिसां नं ‘खः’ धकाः मुुसुंन्हिलाः लिसः बिल ।

जितः इन्न मिन । छु तालयापिं मिस्त जुइ, थज्याःगु छेँखँ ल्हाय्त थाय्बाय् हे स्वय्माःगु मखुका, ई नि ब्यः । न्ह्याबलें नं जि लँपुइ याकःचा अफिस वनेगु झ्वलय् अथे हे बसय्, ट्याम्पो वा माइक्रोबसय् हे छाय् मजुइमा थज्याःगु खँ न्यने हे दु । गबलें ला सिक्क न्हिले नं मास्तिवइगु तर गबलें धाःसा नुगलय् हे थुं नं दी, इमिगु खँ न्यनाच्वनेबलय् ।

थज्याःगु खँ न्यँन्यं न्हाय्पं हीधुंकल जिगु । जितः झन् हे दिक्क जुइगु, छाय् इहिपा याय्गु ? इहिपा याना धकाः सुया जीवन खुशी जुयाच्वंगु दु ? गुलि नं थःथितिपिं, थःज्वलिंज्वःपिं इहिपा याय्धुंकूपिं खना, इमि खँ न्यनेबलय् थ्व इहिपा धाःगु खँग्वः प्रति हे वितृष्णा जुयावइगु जितः । जिं थू, लापा छपा ल्हातिं जक न्याइमखु । इहिपा यानाः जीवन हनाच्वंपिंके अक्सर ल्हाःपा निपा प्यपुंकेगु व्यवहार व चुम्बकया थें ज्याःगु आकर्षणया कमि खना ।

धाइ नि जीवनय् कि ब्वनाः कि व्यवहारं थुइकाः यक्व सय्के ज्यू । सम्भवत जिं नं इहिपाः मयानानिसां व्यवहारं अले जःखः जक स्वया हे आपालं व्यवहारिक ज्ञां मुंकेधुन । उकि जिं न्ह्याबलें बिचाः याय्गु, कथंकदाचित थ्व जीवनय् गबलें नं जिगु इहिपा जुलधाःसा अज्याःगु कमि कमजोरी सकतां चीकाः छगू दसूया रुपय् थःगु इहिपा जीवन न्ह्याइपुक हने । छगू आदर्श जुइ, इहिपा याइपिनिगु निंतिं ।

थौंकन्हय् जीवन हे फेसबुक । थीथी मनूत पासा जुयाच्वनी, नापलानाच्वनी, त्वःफिनाच्वनी । छन्हुया खँ, छम्ह फेसबुक पासां जितः इहिपाया प्रस्ताव तल । न्हापां ला जितः वयागु खँय् विश्वास याय् हे थाकुल । जिं स्यू, थज्याःगु फेसबुकया मतिना क्षणिक खः – फेसबुकया मतिना थौं कन्फर्म जूसा लच्छि लिपा डिलेट जुइ । तर नं वयागु इनापयात जिं हाकुतिना मछ्वया । छकः थुइकां छु हे जुइ धकाः थम्हं बिचाः यानाथें व्यवहारय् भिंम्ह अले सक्षमम्ह खःसा जि हे जिल नि । जिं वयागु बारे अले वं जिगु बारे थुइकावनाच्वना । नापमलानासां  निम्हस्या निम्हसिगु परीवारया बारे फेसबुकपाखें हे म्हसिकेगु ज्या नं जुयाच्वन । कनाच्वन, न्यनाच्वन, कनाच्वना, न्यनाच्वना । ई न्ह्यानाच्वंलिसे न्हियान्हिथं खँ ल्हाय्गु नं जुयांतुं वन । निम्हसिया म्हसिकाया कालबिल ।

थ्व हे दथुइ जितः वयागु छगू निगू बानीं नुगः झस्के मयाःगु नं मखु । जिगु फेसबुकय् यानाहइगु कमेन्टत दक्व ब्वनीगु जुयाच्वन वं –
– जिं सुनाप पासा दयेकल
– सुयात जिं छु कमेन्ट यात
– जितः सुनां छु धकाः लिसः बिल आदि
जिगु फेसबुकया कमेन्ट ब्वनेधुंकाः बिस्तारं वं जितः फेसबुकपाखें तापाना हुँ धकाः नं धाल । जिं वयात लिसः बिया – छ हे नं जिं फेसबुक पाखें म्हसिकाम्ह खः । हानं जिं फेसबुकय् म्वाःमदुगु खँ नं ल्हानाच्वनागु मदु, जिगु अज्याःगु बानी नं मदु । उकिं जिं जि पासापिंपाखें तापाय्मखु ।
छन्हु निन्हु खँ नं मजुल । हानं वं हे खँ ल्हानाः स्वापुयात कथहँ न्ह्याकल । खँ सामान्य जुयावन । जिं वयात अफिसं फोन नं याय् मज्यूगु जुल, वयात अथे प्राइभेसी मतइगु मयः हँ । जिं थःगु सफाइ बिया, तर खँ क्वःमज्यू । वं जिगु खँ न्यनेगु ला छखे हे, वयागु धाथेंगु धारणा क्वब्वात – जि छं जुइत्यंम्ह मिजं, छं जिगु हरेक खँ न्यनेमाः । जिं धाथें याय्माः मखुसा बिचाः याय्माली झीगु स्वापुया बारे हँ ।
जिके वयागु हुकुमवादी उजं न्यनाच्वनेगु धैर्य मन्त । जिगु स्वभाभिक लिसः – जि छं बिचाः यानाथें खिचां न्ह्यपं संकाः ल्यूल्यू वइम्ह मिसा धकाः ताय्कागु खःसा व बिचाः त्वःताः छ्व । जि म्हिगः नं याकः म्वानाच्वनागु खः अले थौं नं म्वाय्गु आत्मविश्वास दु जिके । का, छं बिचाः याय्माःसा या । जि छं लहिनातःम्ह कमारी मखु दँ सा दँ, फय्तु सा फय्तु याइम्ह । जितः मिखां छुं मखंक तं पिहाँवल ।
जिं वयात म्हसिल, जितः म्हसिल, इहिपाया आगं नं सिल । छाय् इहिपा याय्गु, मतिइ लुल । जिं स्यू, जि सुयां हैकमवादीयात सहयाय् मफुम्ह धकाः । अथेला जिके हानं सुंप्रति समर्पणया भावना मदुगु मखु । जीवनय् गबलें नं सुंप्रति छुं याय् धकाः मतिइ तया, वयात जिं गबलें त्याः–बूया ल्याःचाः हे मतसें साथ बिया । न्ह्याबलें नं गुम्हसित थः नाला, वयात दुनुगलंनिसें थः नाला । अथे हे वयात नं थः नालेगु कुतः यानाच्वनागु हे खः । निम्हसिया खँ मिलेजुइ, मिलेमजुइ, थ्व स्वभाविकता जिं थू । उकिं न्हापालिपा नं फोनय् छुं खँय् कचमच जूसां जिं हे क्वमिलु जुया वनाप खँ ल्हानायंका । व लिपा थः हे मनू जुइम्ह खः, वयाके बांमलाःगु छुं बानी दुसा बुलुहँु मायां थुइकाबी, चीकाः बी धैगु मती तयाः थःत वप्रति समर्पित यानागु खः । तर लिच्वः अथे मजूल । थ्व हे खं निन्हु प्यन्हु तक जितः वाथावाथा कंकल ।
ई न्हयानातुं वन । हाकनं छक्वः दक्वं लोमंका न्हापालिपाथें खँया खुसि न्ह्यानावन, जीवनया खुसि न्ह्यानावन । दक्व सहज जुल । वं छु छु न्यन जिं दक्वं कना – थःगु जीवनया बारे, ज्या खँया बारे, जि खुल्ला किताब जुयाबिया । हरे भगवान, सुं पासा नापलाःवन कि जिं अन वनाः घोर अपराध यानावयाथें वयात स्पष्टीकरण बीमालीगु । गबलय् तक ? जिं गुलि वयात खँ कना, उलि हे वया जिप्रति शंका अप्वः । शंकां लंका च्याकीम्ह । तर जब जब जिं वयाके छुं न्यन,े वयाके जितः बीगु लिसः दइमखु । थ्व हे धाइ – लिपा धाय्का, न्हापाया खँया आः छु महत्व दु धकाः । जिं थुकी नं विरोध मयाना । खः, व वने धुंकूगु ई खः, जि नापमलाःनिबलय्या । उकिया ल्याःचाः याना वनकि जिमिगु वर्तमान व भविष्य नितां छखे लाइ । जिमित जिमिगु वर्तमान व भविष्य दःसा गाः । धाय्त ला वं अथे हे धाल तर व्यवहारय् धाःसा वं जि नापलाय्सिबें न्ह्यःया जिमि पासापिनिगु बारे न्यनेकने अप्वय्का यंकल । फेसबुकय् स्वयाः वयात मयःम्ह जिमि पासायात अनफ्रेण्ड याय्गु हुकुम वल । मेगु निर्देशन – इहिपा धुंकाः जि घण्टौं फेसबुक चलेयाय् दइमखु, अले जिं जागीर नं त्वतेमाः ।
थ्व स्वापु ताःई तक न्ह्याइमखु धैगु मनय् शंका उपशंका । अय्नं जिं व नापं जीवन न्ह्याकेगु बचं बीधुन, लिफः स्वय्मखु, बरु सहलह ब्याकाः न्ह्याःवने धैगु जिगु आत्मविश्वास अबलय् तक । लिपा इलं जिगु व प्रतिया विश्वास, समर्मण व मतिना छ्वासुकायंकल । जिं वयात तक्वः धाय् नं धुन, जि जिन्दगी बरु याकःचा म्वाय्, तर सुयां शंकाया घेराय् च्वना न्हिं न्हिं छ तंचाइला धकाः ग्याना ग्याना म्वाय्मखु ।
विश्वास, मतिनाया व खिपः खः गुकी शंकाया सुपः छपु जक नं ल्यनाच्वंतले गनं छकः ध्वलकि, कत्तालकि धुसुक्क चब्बुइ । अज्याःगु शंकाया खिपतय् जीवन नीकाः कम से कम जि ला म्वाय् मफु । जिगु खँ वयात लुमधन । जिं छुं मद्वंकासां व तंचाइला, वयात यःला मःयःला धकाः च्यूताः कयाः पलाः न्ह्याकेगु जिगु नितिं छुं अःपूगु खँ मखु । मचानिसें थौं तक थःगु नितिं हरेक उहः काय्गु अधिकार जितः बियातःगु जिमि मांअबुं ।
थथे इहिपाः न्ह्यः हे जितः कुनेगु व जिगु पलाखय् न्यवः न्ह्याकूगु जिं छतिं नं यः मताय्का । अय्नं जिं इहिपा याय्त्यनाम्ह मिजं खः, जिं वयागु नं यःमयःया सम्मान याय्माः धकाः अनं लिपा गनं हे नं मवना, वयात मयःगु छुं मयाना ।  जिं जिगु आत्मायात थथे चिनाच्वनेमाःसां वयागु इच्छाया सम्मान याय्भनं वयात यःगु जक याय् । सखे याकःचा म्वाय्गु व सुयां जुयाः म्वाय्गुया दथुइ थुलि हे पाइगु जुइ धकाः मती तयाः थःगु नुगःयात ह्यय्का ।
जिं वयात बरोबर धया, आःतक ला जिगु इहिपा मजूनि उकिं जिं न्ह्याकाच्वनागु पलाःयात पनेमते, विश्वास यानाब्यू, इहिपा जिगु नितिं छुं कासा मखु, जिगु जीवनय् इहिपाया तःधंगु महत्व दु, आस्था दु, थःगु हे दृष्टीकोण दु । जिगु नितिं इहिपा छुं पुजासिबें म्हो मजू । यक्वसिगु जीवनय् इहिपाया तालमेल बेमेल जुया ईनाप न्ह्याय् मखनाः स्वापुती हिउपाः वःगु खना । उकिं आःयात जि स्वच्छ ढंगं म्वानाच्वंसां छन्त इहिपा धुंकाः छुं शिकायतया मौका तकं नं बीमखु ।
तर अफसोच, न जिगु खँया भाव थुइकल, न जिगु भावनाया कदर हे यात, न ईयात पीगु आँट हे याय्फत । करारनामाय् ल्हाःचिं तयाः इहिपाः न्ह्यः सम्झौता याय्त जिं जितः तयार याय्मफुत । सत्य, न जिं जिगु आत्मायात चीफत, न त इहिपा याय्त्यनाम्ह मिजंया नामय् थःत बरः तय्फत । स्वतन्त्रता जिगु जीवन । थः धयाथे मदुगु जीवन छु जीवन । जिगु म्हुतुं नँ न्याय्थें सः थ्वल । का म्हाल, जि आवंलि थ्व इहिपा नांया न्यवलं चीकाः बकंफुसुलुगु स्वापुती तक्यनाः थःत अदृश्य रुपं मीत तयार जुइमखुत । इहिपा जिगु नितिं छगू समर्पण खः न कि ब्यापार याय्त, निगू पक्षया दुथुइ थ्व थ्व बुँदाया शर्तय् निम्हेसिगु सहमति दु धकाः याय्गु सम्झौता पत्र खः । मिखाः छकः न्याक्क तिसिना । नुगलं खिउँगु जक खन अले गनं याकःचा लँपुइ थः न्ह्याःवनाच्वनागु खन । चाकःछिं शुन्यता अले हाकूगु सर्गतय् तिमिला याकःचा च्वना नं न्हिलेगु कुतः यानाच्वन । बच्छि ख्वाः खिउँ अले बच्छि न्ह्यू क्यनाः याकःचा म्वानाच्वन । जिं जितः व हे तिमिला खंका, न्हाय्कं स्वयाथें थौं थःत ध्वदुइका ।
जिगु लँपु लुत । जिगु ख्वालय् सन्तुष्टीया जः बुलुहँु चकनावल । नुगः नं याउँसे च्वन । जिं मोबाइलय् नम्बर डायल याना । उखें हेल्लो धाःगु सः ताय्दत । वयागु छुं खँ न्यने न्ह्यः हे जिं जिगु उहः न्यंका । छंगु व जिगु म्वाय्गु पहः, बिचाः याय्गु आधार अले थुइकेगु दृष्टीकोणय् आपालं पाःगु खनेदत । जिं तक्वः कुतः यानाः नं छंगु जिगु दथुइ ब्वलंगु व गाःयात ल्हानाः बिचाःयात माथं वंकेगु लिधंसा लुइके मफुत । उकिं छंगु व जिगु लँपु छपु हे मजुइगु जुल । ल्वानाः निखे फस्वय्गु स्वया आः हे दुवाः वःबलय् ल्हाः ब्वय्काः, अले नुगः चकंकाः “वने न्है” धाय्गु उचित ताय्का । छ पासा खः, पासाया रुपय् गबलें नं जितः लुमंकि जि सदां छंगु न्ह्यःने दंवय् । जिगु खँ छं थुल हे ज्वी । सदां छ खुशी जुइमा । थुलि धयाः वयागु लिसः न्यने न्ह्यः हे फोन दिकाबिया ।
छ्यनय् दिकातयागु जाकिया बोरा बँय् दिकाथें जुल । जिगु म्ह फसय् ब्वयाच्वंगुथें हलन्त जुल । ताःहाकय्क सासः ल्हाना । मानौं पञ्जलय् च्वंम्ह झंगः आजाद जुयाः सर्गतय् थःगु दक्वं पपू प्याखं हुइकाः ब्वयाच्वंम्ह थें जिं नं याकःचा हे ब्वया । केवल जिम्ह हे जक जुया । अन सर्गः छगुलिं जिगु जुल । सर्गतं धाल जितः – छ छ हे जुयाः म्वा । अले नुगः म्हूचिना, ल्हाःम्हूचिना । जिगु नुगलं धाल, जि जि हे जुइ, इहिपा थ्व जुनी ला याय्मखुत, याय् हे मखुत । सत्य नं याय्मखुत ।