nepal investment baink

जापान गायब जुइत्यंगु दु : एलन मस्कया भाइरल ट्वीट

नेवा: अनलाइन न्युज – ललेन्द्र शाक्य | ने.सं. ११४४ सिल्लागा नवमी (२०८० फागुन २१ गते)

सोसल मिडियाय् अतिकं सक्रिय जुयाच्वंम्ह अर्बपति एलन मस्कं एक्सय् याःगु छगू पोष्ट आः अतिकं चर्चाय् वयाच्वंगु दु ।

मस्कं आकाझाकां ट्वीट यानाः च्वःगु दु कि, “जापान याकनं हे समाप्त जुइफु ।” मस्कया उगु पोष्टं यक्वसित अजूचायेकूगु दु ।

वास्तवय् एलन मस्क मनूतसें आपालं मचा बुइकेमाः व पृथ्वीइ जनसंख्या अप्वयेकेगुलि योगदान यायेमाः धैगु खँय् सदां सः थ्वयेकाः वयाच्वंम्ह खः । मस्कं तःक्वःमछि धयाः वयाच्वंगु दु कि हलिमय् मनूतय्गु कमी दु । जनसंख्याया गिरावट मानव सभ्यताया नितिं तकं तःधंगु खतरामध्ये छगू जूगु एलन मस्कया मत दु ।

थ्वहे झ्वलय् मस्कं जापानया जन्मदर कीर्तिमानी रुपं क्वय् क्वाहाँवःगु बुखँयात कयाः थःगु प्रतिक्रिया सोसल मिडिया प्लाटफर्म एक्सय् शेयर याःगु दु ।

उगु पोष्टय् च्वयातःगु दु, “जापानया जन्मदर कीर्तिमानी न्यूनस्तरय् थ्यंगु दु । छम्ह मचा बुइबलय् निम्हसिबें अप्वः मनूया मृत्यु जुयाच्वंगु दु । थ्यंमथ्यं१२ करोड ५० लख जनसंख्याया नितिं दँय् दसं थ्यंमथ्यं १० लख मनूत गुमेयायेगु पायछि मखु ।”

थःगु एक्स ह्याण्डलय् उगु बुखँयात उदृत यासें मस्कं च्वःगु दु, “यदि छुं हिउपाः मजुल धाःसा जापान तनाः वनी ।”

फेब्रुअरी २९ तारिखय् याःगु थ्व पोष्ट आःतक ७ करोड ९० लखं स्वयेधुंकूगु दुसा २५ हजार प्रतिक्रियाया लिसिें ४० हजार क्वः हाकनं पोष्ट याःगु दु ।

मस्कया उगु ट्वीटय् छम्हेसिगु प्रतित्रिया दु, “समाप्त जुइगु थ्व ब्वाकासाय् दक्षिण कोरियां जापानयात बुकेफु ।”

अथेहे, मेम्ह छम्हेस्यां धाःसा जापानया सिबें युरोपया जन्मदर म्हो जूगु धासें दकले न्हापां युरोप गायब जुइगु न्ह्यथंगु दु ।

Categorized in अन्तर्राष्ट्रिय