coved ad

जर्मनी व इटलीइ नं लुयावल ओमिक्रन भेरियन्तया संक्रमित

नेवा: अनलाइन न्युज – ललेन्द्र शाक्य | २०७८ मङ्सिर १२, आइतबार १३:२३:०३

छुं दिं न्ह्यः दक्षिण अफ्रिकाय् लुयावःगु कोभिड १९ या न्हूगु भेरियन्त ओमिक्रनया संक्रमित युरोपया थप मुलुकय् नं लुयावःगु दु ।

बेलायत, जर्मनी  इटली लिसेंया छुं छुं मुलुकय् ओमिक्रनया संक्रमित लुयावःगु अन्तर्राष्ट्रिय समाचार माध्यमं जानकारी ब्यूगु दु । शनिवाः बेलायतया निम्ह मनूयाके न्हूगु भेरियन्ट लुयावःगु खः । दक्षिण अफ्रिकापाखें वःपिं निम्ह मनूयाके ओमिक्रन  खनेदूगु बेलायतया स्वास्थ्यमन्त्री साजिद जाभिदं धाःगु खः ।

अथेहे, जर्मनीइ तकं नोभेम्बर २४ स दक्षिण अफ्रिकां वःपिं निम्ह यात्रुपिंके ओमिक्रन भेरियन्ट पुष्टि जूगु म्युनिखय् च्वंगु माइक्रोबायोलोजी केन्द्र म्याक भोन पेटेनकोभरं धाःगु दु ।

इटलीइ नं मोजाम्बिकपाखें लिहाँ वःम्ह छम्ह मनूयाके ओमिक्रन भेरियन्टपाखें संक्रमित जूगु व निम्ह मचालिसें छेँजःया मेपिं न्याम्ह दुजःपिंके तकं कोरोना संक्रमण पुष्टि जूगु अनया समाचार माध्यम लाप्रेसें जानकारी ब्यूगु दु ।

चेक गणतन्त्रया छम्ह मिसायाके नं न्हूगु ओमिक्रन भेरियन्टया संक्रमण पुष्टि जूगु लिबेरेकय् च्वंगु क्षेत्रीय अस्पतालया प्रवक्ता भ्याक्लाभ रिकारं धाःगु दु ।

नेदरल्याण्डया नेशनल इन्स्टिच्युट फर पब्लिक हेल्थया कथं दक्षिण अफ्रिकां निगः उडानय् वःपिंमध्ये ६१ म्ह यात्रुपिंके कोरोना संक्रमण पुष्टि लिपा इमित आइसोलेसनय् तःगु खः । जिन सिक्वेन्सिङपाखें उपिं मनूत न्हूगु भेरियन्टपाखें हे संक्रमित जूगु वा मजूगु निर्धारण जुइगु इन्स्टिच्युटं जानकारी ब्यूगु दु ।

थ्वसिबें न्ह्यः बेल्जियम, हङकङ, इजरालय व बोत्स्वानाय् ओमिक्रनया संक्रमित लुयावयेधुंकूगु दु ।

ओमिक्रन लुयावःगु बुखँ पिहाँ वयेखतं आपालं मुलुकं दक्षिण अफ्रिकी क्षेत्रं जुइगु हवाई उडानयात प्रतिबन्ध तयेधुंकूगु दु ।

‘बी.१.१.५२९’ नं धाइगु ओमिक्रनयात विश्व स्वास्थ्य संगठनं ‘चिन्ताया विषय’ धाःगु दु । थ्वसिबें न्ह्यःया भेरियन्टसिबें अप्वः संक्रामक कथं कयातःगु थुकिया उत्पिरिवर्तन क्षमता तकं आपाः जूगु दु । तर कोभिड १९ या मेमेगु भेरियन्टसिबें ओमिक्रन थप खतरनाक वा गम्भीर जू वा मजू धकाः पुष्टि जुइ धाःसा ल्यं हे दनि ।

Categorized in अन्तर्राष्ट्रिय