नेवा: अनलाइन न्युज – ललेन्द्र शाक्य | २०७८ आषाढ ६, आइतबार ११:०४:३८

युरोकप २०२० अन्तर्गत समूह एफया कासाय् जर्मनीं पोर्चुगलयात त्याकूगु दु । जर्मनीं घरेलु मैदानय् छगोल यायेधुंकाः जूगु स्थिति फातापुइकाः पोर्चुगलयात ४–२ गोल अन्तरं बुकूगु खः । 

न्हापांगु जितलिपा जर्मनीं निगू कासापाखें ३ ल्याः मुंकूगु दु व नकआउट थ्यनीगु सम्भावना कायम तःगु दु । जर्मनी न्हापांगु कासाय् फ्रान्सलिसे १–० गोल अन्तरं बूगु खः ।

उखे न्हापांगु कासाय् हंगेरीयात ३–० गोल अन्तरं बुकूम्ह साविक विजेता पोर्चुगलया थुगु संस्करण न्हापांगु हार खः । 

म्यूनिखय् जूगु कासाया १५ औं मिनेटय् क्रिस्टियानो रोनाल्डों डिएगो जोटाया पासय् गोल यासें पोर्चुगलयात अग्रता ब्यूगु खः । तर, सुरुआत निसें हे आक्रामक रुपं म्हितूम्ह जर्मनीं बराबरी गोल यायेत ताःई पिइम्वाल । 

३५ औं मिनेटय् हे पोर्चुगलया रुबेन डियाजं आत्मघाती गोल यायेधुंकाः जर्मनीं कासा बराबरी यात । अथेहे, ३९ औं मिनेटय् राफेल गुरेडरां नं आत्मघाती गोल यायेधुंकाः न्हापांगु हाफय् जर्मनीं २–१ या अग्रता दयेकल ।

निगूगु हाफया १५ औं मिनेट दुने जर्मनीं निगोल यात । ५१ औं मिनेटय् रोविन गोसेन्कोया पासय् काइ हाभार्टं गोल यासें जर्मनीयात ३–१ या अग्रत ाबिल । अथेहे, ६० औं मिनेटय् जोसुअ किम्मीचया पासय् गोसेन्सं गोल यायेधुंकाः जर्मनीं ४–१ या अग्रता दयेकल ।

६७ औं मिनेटय् जोटां रोनाल्डोया पासय् गोल यासें गोल न्तर म्हो यायेगु कुतः याःगु खः, तर थप गोल यायेमफूबलय् जर्मनीं अःपुक हे त्याकल ।

ग्रुप अफ डेथ कथं कयातःगु समूह डी इ फुक्कस्यां निगू कासा म्हितेधुंकाः ४ ल्याःलिसें शीर्ष थासय् दु । जर्मनी व पोर्चुगलया समान ३ ल्याः दुसा हंगेरीया १ ल्याः दु ।

आः लिपांगु कासय् जर्मनीं हंगेरी व पोर्चुगलं फ्रान्सलिसे म्हिती ।

Categorized in कासा