Mohanai 2078 KTM

जनावरया कोखं मनूया जन्म : जापानय् जुयाच्वन अनुसन्धान

२०७७ चैत्र ८, आइतबार १४:२५:१८

जापानय् छम्ह वैज्ञानिकं आःतकया हे न्हूगु व अजूचायापूगु अनुसन्धान न्ह्याकूगु दु । उगु अनुसन्धानया नितिं सरकारी अनुदान तकं वयेगु सुरु जूगु दु ।

वैज्ञानिकं उगु अनुसन्धानया झ्वलय् पशुपिनिगु गर्भय् मनूया कोशिकाया विकास यायेगु कुतः याइगु जूगु दु । यदि उगु अनुसन्धान सुथां लाःसा जनावरयात मनूया सरोगेट मदरया रुपं छ्यलेफइ । अर्थात् जनावरया कोखं मनूया जन्म जुइ ।

जापानी स्टेम सेल वैज्ञानिक हिरोमित्सू नकोचीयात जापान सरकारं जनावरया कोखं मानव भ्रुणया विकास यायेगु अनुसन्धानया नितिं अनुमति ब्यूगु खः । थःगु टिमलिसे जानाः हिरोमित्सु उगु अनुसन्धानया सुरुवात यायेधुंकूगु दु ।

वैज्ञानिकपिन्सं सुरुइ छुंचाया भ्रुणय् मानव कोशिका विकसित याइ । वधुंकाः उगु भ्रुणयात पशुया गर्भय् प्रत्यारोपण याइ ।

वैज्ञानिकया कथं वास्तवय् थ्व अनुसन्धानया आज्जु जनावरपाखें मनूया उत्पादन यायेगु मखु । वैज्ञानिकपिं थुज्वःपिं जनावर तयार याये चाहेजू, गुकिया म्हगःया अंगत मानव कोशिकां जाःगु जुइमा । ता कि थुज्वःगु मानव कोशिकां जाःगु जनावरया अंगयात माःगु इलय् मनूया म्हगलय् प्रत्यारोपण यायेफयेमा ।

लुमंकेबहःजू, थुज्वःगु कथंया अनुसन्धानया कुतःत थ्वसिबें न्ह्यः नं मजूगु मखु । तर, थीथी देसं थुज्वःगु अनुसन्धान प्रकृतिलिसेया ख ेलवाड जूगु धासें उकियात स्वीकृति मब्यूगु खः । सन् २०१५ य् अमेरिकाय् नं थुज्वःगु कथंया हे कुतः जूगु खः । तर राष्ट्रिय स्वास्थ्य संस्थानं उकियात गलत धासें रोक तःगु खः । तर जापानी वैज्ञानिकपिन्सं धाःसा प्राकृतिक नियमयात हे चुनौती बिसें जनावरया कोखं मनूया जन्म याकेगु परियोजनाय् पलाः न्ह्याकूगु दु ।

अय्सां जापानया उगु परियोजनाया हुनिं खतरनाक परिमाण नं वयेफु । यदि उगु परियोजना सुथां ला धाःसा भविष्यय् छगू थुज्वःपिं जिव अस्तित्वय् वइ कि गुपिं बच्छि मनू व बच्छि जनावर जुइ ।