city axpris 2

जनमोर्चां रेशम चौधरीयात आममाफी बिइगु प्रक्रिया पनेत माग

नेवा: अनलाइन न्युज – ललेन्द्र शाक्य | २०८० जेठ १२, शुक्रबार १२:०७:२८

राष्ट्रिय जनमोर्चां नागरिक उन्मुक्ति पार्टीया नेता रेशम चौधरीयात आममाफी बिइत वर्तमान सरकारं न्ह्यःने यंकूगु प्रक्रियाया विरोध प्वंकूगु दु ।

चौधरीयात आममाफी बिइगु ज्यां दण्डहीनता, अपराधया राजनीतिकरण व राजनीतिया अपराधीकरण अप्वइगु जनमोर्चाया ठहर दु ।

टिकापुर काण्डय् दोषी ठहर जुयाः सर्वस्वलिसें जन्मकैदया सजायँ भोगेयानाच्वंम्ह चौधरीयात प्रचण्ड नेतृत्वया वर्तमान सरकारं गणतन्त्र दिवसया दिं आममाफी बिइगु प्रक्रिया न्ह्यःने यंकूगु दु । उगु प्रक्रियायात पनेत जनमोर्चां माग याःगु दु ।

जनमोर्चाया नायः चित्रबहादुर केसीं थौं शुक्रवाः सार्वजनिक याःगु विज्ञप्तिइ धयातःगु दु, ‘टिकापुर हत्याकाण्ड छुं राजनीतिक मजूसे आम नरसंहारया घटना खः । उगु घटनाया मू नाइकेयात गणतन्त्र दिवसया लसताय आममाफी बियाः कैद मिनाहा याकेत सरकारं न्ह्यःने यंकूगु प्रक्रिया थःपिनिगु सरकार टिकेयायेत याःगु राजनीतिक कालबिल वा सौदाबाजी जक खः ।’

विगतय् सरकारं रवि लामिछानेया राहदानी प्रकरणय् राजनीतिक सौदाबाजी यानाः मुद्दा मन्ह्याइगु निर्णय याःबलय् सरकारयात थिकेजूगु लुमंकूसे जनमोर्चा नायः केसीं धाःगु दु, ‘उकिं रेशम चौधरीयात आममाफी बिइगु नितिं न्ह्यःने यंकूगु प्रक्रिया पनेत सरकारयाके माग यानाच्वना ।’

थरुहट थारुवानं कैलालीया टिकापुरय् याःगु आन्दोलनं हिंसात्मक रुप काःबलय् २०७२ भाद्रय् ७ म्ह सुरक्षाकःमि व छम्ह मचा सीगु खः ।

उकिया मू योजनाकारया रुपं रेशम चौधरी २०७४ फागुन १५ गतेनिसें थुनाय् दु । वयात अदालतं क्वःछ्यूगु जन्मकैदया सजायँ कथं, २० दँ कैद भुक्तान यायेमाःगु खः । माफी मिनाहाया प्रक्रिया कार्यान्वयन जूसा वं थ्यंमथ्यं १५ दँ कैद सजायँ मिनाहा कायेखनी ।

Categorized in दुर्घटना-अपराध