nepal investment baink

जनबहाःद्यः रथ सालीगु लँपु भोताहितिइ लँ दयेकेगु ज्या न्ह्याकल

नेवा: अनलाइन न्युज | ने.सं. ११४४ चिल्लाथ्व पुन्हिं (२०८०चैत्र १२) सोमवाः

थ्वहे वइगु बैशाख ४ गते अस्तमिया दिंनिसें न्यान्हुयंकं न्ह्याइगु येँया तःधंगु जात्रा जनबहाःद्यःया रथजात्रा व्यवस्थित कथं न्यायेकेगु नितिं थौं सोमवाः सुथय् येँ महानगरपालिका सार्वजनिक निर्माण महाशाखाया इन्जीनियरलिसें उगु महाशाखाया विभागीय उपप्रमुख सुरेश राईलिसेंया पुचलं भोताहितिया लँपु निरीक्षण याःगु दु ।

२७ वडाया नायः योगेश खड्गी, जनबहाःद्यः रथजात्रा व्यवस्थापन समितिया नायः निलकाजी शाक्यलिसें स्थानीयबासीपिन्सं थ्वहे वइगु बैशाख २० गतेया दुने भोताहितिइ धः तयेगु नितिं म्हूगु लँपु दयेकेमाःगुलिं थथे निरीक्षण ज्याझ्वः याःगु खः ।

वडानायः खड्गीं जनबहाःद्यःया रथजात्राय् बाःछि न्ह्यः हे भोताहितिया लँपु दयेकेमाःगु धासें थुकिया नितिं येँ महानगरपालिकाया सम्बन्धित निकाय गम्भीर जुइत इनाप यानादीगु दु । वय्कलं वडापाखें यायेमाःगु ग्वाहालि सकतां जुइगु बचं बियादिसें जनबहाःद्यःया रथ सालाः हइबलय् छुं नं कथंया पंगः मजुइक लँ दयेकेत इनाप नं यानादीगु खः ।

वयकःया इनाप लिपा थौं सोमवाः हे भोताहितिइ लँ दयेकेगु ज्या न्ह्याःगु दु ।

नेवाः अनलाइनन्यूजलिसे खँ ल्हासें वडा नायः खड्गीं जनबहाःद्यःया रथजात्रा न्ह्यः हे लँ दयेकेगु ज्या क्वचायेकेगु नितिं थःपिन्सं फुक्क निकायस सुचं बिइधुनागु व स्वयं येँ महानगरपालिकाया प्रमुख बालेन शाह नं भोताहितिइ धः तयेगु नितिं म्हूगु लँ जात्रा न्ह्यः क्वचायेकेगु नितिं थःपिंनाप सहलह ब्याकूगु खँ कनादीगु दु ।

जनबहाःद्यःया रथ सालीगु न्हापांगु दिं जमलं असं थ्यंकाः याः न्यायेकीगु खःसा उगु हे दिं राष्ट्रपति रामचन्द्र पौडेल जनबहाःद्यः दर्शन यायेगु नितिं असं थ्यंकीगु ज्याझ्वः तयातःगु दु ।

जात्रा न्ह्यः भोताहितिइ थथे गाः म्हुयाः धः तयेगु ज्या याःगुलिं थीथी ख्यलं गनं जनबहाःद्यःया जात्रा थ्व पालय् जात्राया न्हापांगु दिं हे स्यनीगु खःला धकाः च्यूताः तयेगु यानाहःगु दु ।

Categorized in स्थानिय-समाज