nepal investment baink

जनबहाःद्यः नाप स्वानाच्वंगु छुं छुं तथ्यत

ने.सं. ११४४ चिल्लाथ्व अस्तमि (२०८१ बैशाख ४ गते) मंगलवाः

जनबहाःद्यः जात्रा थनीनिसें न्ह्याःगु दु । थौं ने.सं. ११४४ चौलाथ्व अस्तमि मंगलवाःनिसें न्यान्हुयंकं न्ह्याइगु येँया थुगु जात्रा नेपाःया ततःधंगु जात्रामध्ये छगू जात्रा कथं कयातःगु दु ।

जनबहाःद्यःयात थीथी धर्मावलम्बीकथं थःथःगु आस्थाया द्यः कथं कयातःगु दु । जनबहाःद्यःयात देय्या रक्षा याइम्ह द्यः कथं नं कयातःगु दुसा उकिं थुम्ह द्यःयात जनतांनिसें राज्यसत्तां तकं उतिकं सम्मान यानाः वयाच्वंगु दु ।

थुम्ह द्यःयात कयाः छुं नं कथंया जात्राया झ्वलय् विघ्न बाधा वल धाःसा थुकिं राज्यसत्ता व देय्यात तःधंगु क्षति जुइगु ऐतिहासिक तथ्यत दु ।

येँया जनबहालय् तयातःगु ‘जनबहाःद्यःया शान्ति सफू’ ने.सं. ११२५ य् पिदंगु खः । उगु सफू दुने न्ह्यथनातःकथं थथे दु :

– ने.सं. ८०९ पुसया अस्तमिया दिं, जनबहाःद्यःया जवगु न्हायपं कुतुंवन । थुकिया लिच्वः उगुदँय् जुजु पार्थिवेन्द्र मल्ल मन्त ।

– ने.सं. ८१० साउन शुक्ल नवमीया दिं, जनबहाःद्यःया न्हासय् प्वः वल, थुकिया लिच्वः मरुया भारदार लक्ष्मीनारायण धाइम्हेसित स्यानाबिल ।

– ने.सं. ८८९ कार्तिक कृष्ण द्वादसी बहनी जनबहाःद्यःयात छु जुल ? थ्व खँ न्ह्यथनातःगु मदु, तर उगु दिं पृथ्वीनारायण शाह वयाः ख्वपयात पराजित याःगु खँ न्ह्यथनातःगु दु ।

अथेहे, पृथ्वीनारायण शाह नं ५०१ खा छेँय् मिँ तयाः २००१ म्ह मनूत स्याःगु व जुजु जयप्रकाश मल्लयात पशुपतिइ हःगु व अन हे सीगुलिसें ख्वपया जुजु, यलया जुजुयात ज्वनाः कान्तिपुर हःगु खँ न्ह्यथनातःगु दु ।

– ने.सं. ८९५ भाद्र शुक्लया दिं जनबहाःद्यःया खवगु मिखा स्यन । उगु हे दँया पुस महिनाय् पृथ्वीनारायण शाह मन्त ।

थुकथं थीथी खँ उगु‘जनबहाःद्यःया शान्ति सफू’ दुने न्ह्यथनातःगु दु ।