nepal investment baink

जनबहाःद्यःया रथजात्रा तःजिक न्यायेकेत थीथी उपसमिति नीस्वन

नेवा: अनलाइन न्युज – ललेन्द्र शाक्य | ने.सं. ११४४ चिल्लागा अस्तमि (२०८० चैत्र २० गते) मंगलवाः

थ्वहे वइगु बैशाख ४ गतेनिसें न्यान्हुयंकं न्ह्याइगु जनबहाःद्यःया रथजात्रा तःजिक न्यायेकेगु नितिं नीस्वंगु जनबहाःद्यः रथजात्रा समारोह समिति ११४४ या सचिवालय मुँज्यां थीथी उपसमिति नीस्वंगु दु ।

म्हिगः सोमवाः च्वंगु सचिवालय मुँज्यां थथे थीथी उपसमिति नीस्वंगु खः । समितिया नायः निलकाजी शाक्यया सभापतित्वय् जूगु सचिवालय मुँज्यां शान्ति सुरक्षा, ट्राफिक व्यवस्थापन उपसमितिया भाला रवि तण्डुकारयात ब्यूगु दु ।

अथेहे, स्वयंसेवक परिचालन बालकृष्ण महर्जन, मिसा परिचालन नानीहेरा महर्जन व मिरा महर्जन ताम्राकार, संघसंस्था परिचालन दिपक महर्जन, सांस्कृतिक बाजा व्यवस्थापन पंचनारायण महर्जन, नेपाल स्काउट परिचालन रंजनलाल श्रेष्ठ, रथ निर्माण व गुथि संस्थान समन्वय, रुट निरीक्षण अमित बज्राचार्य, रेडक्रस अञ्जना मास्के, रथय् स्वां तयेगु व मत तयेगु व्यवस्था सुजन मुनिकार, घःमाः व्यवस्थापन नरेश महर्जनपिन्सं भाला कयादीगु दु ।

थुगु समितिया संयोजकय् सुजीव बज्राचार्य च्वनादीगु खःसा उपसंयोजकय् गणपतिलाल श्रेष्ठ च्वनादीगु दु ।

सचिवालयया सोमवाः च्वंगु मुँज्यां जनबहाःद्यःया रथ सालेगु लँपुया निरीक्षण कन्हय् बुधवाः सुथसिया ७ ता इलय् जमलय् च्वंगु तीनधारा पाठशालाय् मुनाः यायेगु निर्णय याःगु दु ।

Categorized in स्थानिय-समाज