nepal investment baink

जनबहाःद्यःया देगः दयेकेगुज्या दिकल

नेवा: अनलाइन न्युज – ललेन्द्र शाक्य | ने.सं. ११४४ सिल्लागा खस्थि (२०८० चैत्र २ गते)

ताःई न्ह्यःनिसें येँया नांजाःगु जनबहाःद्यःया देगः पुनःनिर्माण यायेगु ज्या तत्कालया नितिं दिकूगु दु ।

भारतीय राजदूतावासया ग्वाहालिपाखें नेपाल सरकारं सहरी विकास व भवन निर्माण मन्त्रालय नं टेण्डरपाखें ठेकेदार नियुक्त यानाः पुनःनिर्माण यायेगु ज्या न्ह्याकूगु खःसा ठेकेदारपाखें तःक्वः हे म्याद थप यानाः पुनःनिर्माणया ज्या क्वचायेकेगु बचं बियाः नं ज्या इलय् हे क्वमचायेकूगुलिं थथे ज्या दिकागु खँ जनबहाःद्यःया गुरुजु निलकाजी शाक्यं जानकारी बियादीगु दु ।

जनबहाःद्यःया देगः पुनःनिर्माण यायेगु ज्या वंगु १३ महिना न्ह्यःनिसें न्ह्याकूगु खः ।

पुनःनिर्माणया नितिं भारत सरकारपाखें ६ करोड २६ लख चानचुन आर्थिक ग्वाहालि याःगु दु ।

ठेक्कापट्टा लाःगु कम्पनीं थ्वहे वइगु बैशाख ९ गतेतक दुनेनिर्माण सम्पन्न यायेमाःगु मखुसा ठेकेदार कम्पनीयात कारवाही यायेमाःगु माग जनबहाःद्यःया गुरुजुपिं व जनबहाः सुधार समितिं माग याःगु खःसा उगु मागयात कयाः मन्त्रालयस सहलह नं जूगु खः । तर, मन्त्रालय नं थथे सहलह जूगु कथं ठेकेदारयात कारवाही थ्यंक यायेमाःगु विषययात च्यूताः मकाःगुलिं तत्कालया नितिं ठेकेदारयात ज्या याके मबियागु खँ जनबहाःद्यःया गुरुजु शाक्यं जानकारी बियादीगु दु ।

शाक्यं सरकारं धर्म संस्कृतियात च्यूताः कयाः ज्या मयाःगु हुनिं थथे जनबहाःद्यःया देगः इलय् हे क्वचायेकेमफूगु द्वपं नं बियादीगु दु । लिसें वय्कलं इलय् ज्या मयाःगु कम्पनीयात कारवाही यानाः न्हूगु कम्पनीयात ज्या याकेमाःगु माग नं यानादीगु दु ।

गुरुजु शाक्यं सरकारं थ्व विषययात गम्भीर रुपं मकाल धाःसा धर्म संस्कृति सम्पदा अभियन्ता व जनबहाःद्यःया भक्तजनपिं छथाय् च्वनाः सरकारयात ध्यानाकर्षण याकेगु ख्याच्वः नं बियादीगु दु ।

वंगु १३ महिना न्ह्यःनिसें जनबहाःद्यः देगःया न्ह्यःने जस्ता पाता ग्वयाः द्यःयात विराजमान याकातःगु दु। जनबहाःद्यःया जात्रा नं थ्वहे वइगु बैशाख ४ गतेनिसें न्यान्हुयंकं न्ह्यायेत्यंगु दु ।

Categorized in स्थानिय-समाज