zero media family planning adv

जनप्रतिनिधिलिसें स्थानीयबासीया पशुपति क्षेत्रया गुरुयोजना खोरेजी माग

नेवा: अनलाइन न्युज – ललेन्द्र शाक्य | २०७७ श्रावण १६, शुक्रबार १७:०३:१८

पशुपति क्षेत्र विकास कोषं स्थानीयबासीलिसें स्वंगुलिं तहया जनप्रतिनिधिलिसे सहलह मयाःसे दीर्घकालतक लिच्वः लाइगु गुरुयोजना प्रस्ताव याःगु धासें स्थानीयबासीं विरोध प्वंकूगु दु ।

संघर्ष समितिं थौं शुक्रवाः पशुपति क्षेत्रय् ग्वसाः ग्वःगु पत्रकार सम्मेलनय् संघीय सांसद गगनकुमार थापा, ३ नम्बर प्रदेशसभा दुजः नरोत्तम बैद्य, येँ महानगरपालिका ८ वडा वडाध्यक्ष दिनेशकुमार डंगोल लिसेंयापिन्सं छगू हे सलं कोष संचालक परिषदं २०७६ माघ १९ गते पारित यानाः मन्त्रिपरिषदय् पेश याःगु गुरुयोजनाया विरोध याःगु खः ।

सांसद थापां जनप्रतिनिधिलिसे सल्लाह तकं मयाःसे हःगु गुरुयोजना खारेजीया माग यायेत थां हे थःम्ह कोष संचालक परिषदया नायःतकं जुयाच्वंम्ह संस्कृति पर्यटन व नागरिक उड्डयनमन्त्री योगेशकुमार भट्टराईयात नापलानाः स्थानीयबासीया समस्याया विषयस अवगत याकूगु ज्याझ्वलय् जानकारी ब्यूगु खः ।

प्रदेशसभा दुजः नरोत्तम वैद्यं मन्त्री भट्टराई नं परिषद नायः जुयाः गुरुयोजना पातिर यायेगु व स्थानीयबासीपिन्त धाःसा ग्वाहालि याये धकाः निगू चरित्र ब्वःगु द्वपं ब्यूगु दु ।

वडाध्यक्ष दिनेशकुमार डंगोलं स्थानीयबासीया प्राचीनकालनिसेंया बस्ती सखाप यायेगु, स्थानीयबासीया नखःचखः धर्म संस्कृति नं नष्त जुइगु जूगुलिं गुरुयोजना खारेज जुइ हे माःगु धाःगु दु ।

समितिं कोषया सुं नं पदाधिकारीलिसे आः वार्त मयायेगु घोषणा तकं उगु ज्याझ्वलय् याःगु दु ।

परिषदया नायः तकं जुयाच्वंम्ह मन्त्री भट्टराईयात माग तयाः गुरुयोजना खारेजीया नितिं अपिल यायेत यंकूगु संघर्ष समितिया कजि आशामान संगतं धाःगु दु ।

Categorized in राजनीति