nepal investment baink

जनपक्षीय प्रगतिशील म्येच्वमि श्याम तमोटया ‘वया मां जि’ म्यूजिक भिडियो पिदनीगु

नेवा: अनलाइन न्युज – ललेन्द्र शाक्य | २०८० माघ १६, मंगलबार १२:४८:२४

‘गां गामं दना वा, बस्ती बस्तीं दना वा...’ , ‘गाउँ गाउँबाट उठ, बस्ती बस्तीबाट उठ...’ , थुगु अतिकं लोकंह्वाःगु कालजयी जनपक्षीय म्येया च्वमि श्याम तमोटया च्वसां पिज्वःगु नेपालभाषाया ‘वया मां जि...’ म्येया म्यूजिक भिडियो पिदनीगु जूगु दु । थुगु म्येया खस नेपाली भाषा भर्सन ‘आएँ आमा...’ या म्यूजिक भिडियोया म्यूजिक भिडियो नं नापं पिदनीगु जूगु दु ।

मांयात लुमंकाः लिहाँ वइगु थुगु मार्मिक म्येया लय् चिनामि व संगीत संयोजक नांजाःम्ह युवा संगीतकःमि सुरेन्द्र श्रेष्ठ खः ।

‘वया मां जि...’ नेपालभाषा भर्सनया म्येय् लोकंह्वाःम्ह म्येहालामि रत्नशोभा महर्जनं सः बियादीगु दुसा खस नेपाली भाषा भर्सनया ‘आएँ आमा...’ म्येय् लय् चिनामि लिसें संगीत संयोजक सुरेन्द्र श्रेष्ठं सः बियादीगु दु ।

थुगु म्येया म्यूजिक भिडियो ‘क्वान्टिटी सिबें क्वालिटी’ भिडियोयात प्राथमिकता बियाः वयाच्वंगु किपूया मगन इन्टरटेन्टमेन्टया लुखां पिदनीगु जूगु दुसा थुगु म्येया म्यूजिक भिडियोया निर्देशन मगन इन्टरटेन्टमेन्टया युवा फिल्ममेकर रजिन महर्जनं यानादीगु जूगु दु ।

निर्देशक रजिन महर्जनं जानकारी बियादी कथं थुगु म्येया छायाँकन ज्याझ्वः मेगु वाःनिसें न्ह्याइगु जूगु दु ।

छुं ला (महिना) न्ह्यः जक मगन इन्टरटेन्टमेन्टया लुखां रजिन महर्जनया हे निर्देशनय् लोकंह्वाःम्ह म्येहालामि जुजुकाजी रंजितया सलय् व लसय् आर. मानन्धरं च्वयादीगु नेपालभाषाया लोकंह्वाःगु म्ये ‘छंगु म्हगः गुलि बांलाः...’ म्येया म्यूजिक भिडियो मगनया अफिसियल यूट्युब च्यानलं पिदनेधुंकूगु दु ।  थुगु म्येया म्यूजिक भिडियोयात आपालं स्वकुमिपिन्सं छगू उत्कृष्ट म्यूजिक भिडियोया रुपं काःगु दु ।

अथेहे, मगन इन्टरटेन्टमेन्टया लुखां थ्वसिबें न्ह्यः किपूया भुवन महर्जनया च्वसाय्व लसय् अथेहे, हङकङय् च्वनादीम्ह राजेन्द्र डंगोलया सलं थ्वयाच्वंगु ‘व मनू सु मनू...’ बोलया म्येया म्यूजिक भिडियो नं रजिन महर्जनया हे निर्देशनय् मगनया यूट्युब च्यानलं पिदनेधुंकूगु दु । थुगु म्येपाखें आपालं अवार्ड नं त्याकूगु खः ।

मगन इन्टरटेन्टमेन्टया लुखां छुं छुं चिहा संकिपा नं पिदंगु दु । जनचेतनामूलक चिहा संकिपा कथं मगनं ‘उच्च शिक्षा’लिसें थीथी चिहा संकिपा पिथंगु दु ।

मगन इन्टरटेन्टमेन्टया निर्देशक रजिन महर्जनं जानकारी बियादी कथं वइगु वाःनिसें छायाँकन जुइगु नेपालभाषा भर्सन ‘वया मां जि...’ व खस नेपाली भाषा भर्सन ‘आएँ आमा...’ म्यूजिक भिडियो निर्माणया नितिं सकतां तयारी क्वचायेधुंकूगु दु ।

Categorized in कला