nepal investment baink

जनगायक श्रेष्ठ व सदावहार गायक वैद्ययात लुमंकाः गुणास्मृति ज्याझ्वः याइगु

नेवा: अनलाइन न्युज – ललेन्द्र शाक्य | २०८० माघ १५, सोमबार १२:४२:२१

जनगायक भृगुराम श्रेष्ठ व सदाबहार गायक योगेश वैद्ययात लुमंकाः गुणास्मृति ज्याझ्वः याइगु जूगु दु ।

थ्वहे वइगु शनिवाः सुथय् ८ः३० ता इलय् येँया नेपाः ब्यांक्वेटय् थथे गुणास्मृति ज्याझ्वः यायेत्यंगु खः ।

नेवाः देय् दबू, नेपालभाषा मंकाः खलः, नेपालभाषा एकेदेमि व नेपाल संवत न्हूदँ राष्ट्रिय समारोह समितिया मंकाः ग्वसालय् गुणास्मृति ज्याझ्वः यायेगु निर्णय जूगु खँ नेवाः देय् दबू नं जानकारी ब्यूगु दु ।

उगु गुणास्मृति ज्याझ्वलय् जनगायक भृगुराम श्रेष्ठ व सदाबहार गायक योगेश वैद्यं नेपालभाषाया आन्दोलनय् यानादीगु योगदानयात कयाः नेवाः न्ह्यलुवाः मल्ल के सुन्दरं सकल नेवाः ख्यःपाखें नुगःखँ तयेत्यंगु दु ।

अथेहे, ज्याझ्वलय् जनगायक श्रेष्ठ व सदाबहार गायक वैद्यं हालादीगु आपालं म्येत मध्ये छुं छुं म्ये गायक पवित्र कसाः व रिता महर्जनं न्ह्यब्वयेत्यंगु दु ।

अथेहे, वय्कःपिनिगु लुमन्ति किपाः नं पिथनेत्यंगु दु ।

ग्वसाः खलकं थुगु गुणास्मृति ज्याझ्वलय् ब्वति कायेगु नितिं सकल नेवाः ख्यःयात इनाप याःगु दु ।

Categorized in कला