2565 buddha Jayanti ADV

जनगणना साउननिसें असोजतक यायेगु प्रस्ताव

नेवा: अनलाइन न्युज – ललेन्द्र शाक्य | २०७८ जेठ २६, बुधबार १२:४४:३४

कोरोना महामारीया हुनिं थुगु दँया राष्ट्रिय जनगणना अभियान लिच्वः लाःगु दु । अवस्था सामान्य जूगु खःसा म्हिगः मंगलवाःनिसें न्ह्यानाः असार ८ गतेतक क्वचायेकेमाःगु जनगणनाया ज्या कोरोना भाइरसया महामारीया हुनिं न्ह्यायेमफूगु खः ।

हरेक झिदँय् छक्वः जनगणना तिथि क्वःछिनाः नं इलय् क्वचायेके मफूगु थ्व इतिहासया हे न्हापांगु घटना जूगु केन्द्रीय तथ्यांक विभागं जानकारी ब्यूगु दु । विभागया सुचं अधिकारी तीर्थराज चौलागाईया कथं राष्ट्रिय जनगणना क्वःछ्यूगु तिथिइ जुइमफूगु थ्व न्हापांगु घटना खः । वं विश्वया न्यागू दर्जनसिबें अप्वः मुलुकय् कोरोना महामारीया हुनिं जनगणना स्थगित जूगु बुखँ वःगु धाःगु दु ।

चौलागाईँ नं कोरोना महामारीया हुनिं द्यगु गणनाया ज्या अवस्था अनुकूल जुयावंसां मध्य साउननिसें मध्य असोजया दथुइ यायेगु तयारी न्ह्याकागु जानकारी ब्यूगु दु ।

चौलागाईं नं धाःगु दु, ‘थ्व आर्थिक दँ दुने हे ज्या क्वचायेकेत कोरोनां बिइ धैगु ढुक्क मजुल । उकिं मेगु आर्थिक दँया नितिं बजेट व्यवस्थापन यानाः साउननिसें असोज तकया दुने जनगणना क्वचायेकेगु कथं तयारी यानागु दु । जिमिसं थ्वसिबें न्ह्यः तालिम बियापिं सुपरीवेक्ष्ँकपिन्त नं रिफ्रेसमेन्ट तालिम बिइमालिगु जुइ । उकिं थुकी ई लगेजुइ ।’

१५ साउननिसें १५ असोजतक जनगणना यायेगु प्रस्ताव असार न्हापांगु वाः मन्त्रिपरिषदय् यंकेगु तयारी दूगु नं विभागं जानकारी ब्यूगु दु ।

७ गुलिं प्रदेश व ७७ गू हे जिल्लाय् ज्याकुथि चायेकाः ८ हजारम्ह सुपरीवेक्षक व ३९ हजार गणक तकं छनोट यायेधुनागु विभागं जिल्ला व स्थानीय तहलय् जुइगु तालिमया नितिं केन्द्र व प्रशिक्षण सामग्री तकं तयार यानाः जिल्लाय् छ्वयेधुंकूगु खः ।

२० बैशाखतक तालिमयात निरन्तरता बियावःगु विभागं कोरोना संक्रमण तीव्र रुपं ब्वलनेधुंकाः तालिम लिसें फुक्क ज्याझ्वः स्थगित याःगु खः । वि.सं. १९६८ सालनिसें हरेक झिदँ झिदँय् जुयावयाच्वंगु जनगणनाया थ्व १२ क्वःगु जनगणना खः ।

Categorized in राष्ट्रिय