city axpris 2

जनकवि व लोककवि नेपाः पासा पुचः अमेरिकाय् या सम्मानार्थ संरक्षकय्

नेवा: अनलाइन न्युज – विजयरत्न | ने.सं. ११४४ पोहेलागा त्रयोदसी

नेपालभाषा साहित्य, संस्कृति, सामाजिक व राजनैतिक ख्यलय् ज्वःमदुगु योगदान बियाच्वनादीपिं जनकवि दुर्गालाल श्रेष्ठ व लोककवि राजभाई जकःमियात नेपाः पासा पुचः अमेरिकाएया सम्मानार्थ संरक्षक कथं हंगु दु ।

येँय् जूगु छगू ज्याझ्वःया दथुइ वयकपिन्त थथे हंगु खः । हना ज्याझ्वलय् येँ महानगरपालिकाया उपप्रमुख सुनिता डंगोल मूपाहाँ कथं झायादीगु खः । अथेहेतुं विशिष्ट पाहाँ कथं ख्यालिजुजु मदनकृष्ण श्रेष्ठ झायादीगु खः ।

मूपाहाँ उपप्रमुख सुनिता डंगोलं वयकःपिन्त हनापौ देछानादीगु खःसा जनकवि श्रेष्ठ धाःसा थःगु प्रतिकुल उसाँय्या हुनिं हना ज्याझ्वलय् उपस्थित जुयामदी । वयकलं सामाजिक सन्जालपाखें थःपिन्त थथे हंगुलिं सुभाय् देछानादीगु खः।

ग्वसाःखलःया नायः मनोहर श्रेष्ठ सभानायः जुयादीगु उगु ज्याझ्वलय् वयकलं हे लसकुस नुगःखँ तयादिसे अमेरिकाय् स्वीनिदँ न्ह्यः नीस्वंगु थ्व पुचः हे नेपालं पिने नीस्वंगु दकले न्हापांगु नेवाः संगठन खः धकाः धासें अमेरिकाय् थ्व संगठनं सांस्कृतिक ज्याझ्वःया नापनापं युवापुस्तायात ग्वाहालि जुइकथं ज्या यानाः वयाच्वनागु खँ कनादिल ।

ज्याझ्वलय् साहित्यकार व सन्चारकःमि सुरेशकिरण मानन्धरं नेपाः पासा पुचः अमेरिकाय् या बारे थीथी खँ ह्यब्वयादिलसा कलाकार यमन श्रेष्ठं म्ये हालाः न्यंकादिल ।

सम्मानार्थ संरक्षकपिं शताब्दी पुरुष सत्यमोहन जोशी व समालोचक मानिकलाल श्रेष्ठया किपाः न्ह्यःने देवा च्याकाः श्रद्धान्जलि नं देछाःगु ज्याझ्वलय् ग्वसाःखलःया संरक्षक समीर महर्जन, लोककवि जकःमि, ख्यालिजुजु श्रेष्ठ लगायतं नुगःखँ तयादीगु खः ।

Categorized in नेवाः