Mohanai 2078 KTM

छ्यनय् त्वँचा दु ला ? दुसा आः मदयेकेगु घरेलु विधि वल

२०७७ कार्तिक १९, बुधबार १३:४३:१९

चिकुलाया इलय् न्हियान्हिथं म्वःल्हुइत थाकुइ फु । उकी नं म्हगःयात लुमुकाः तयेत ख्वातुगु वसःया लिसेलिसें तपुली, गलबन्दीया छ्यलाबुला यायेमालीगु जुइ । थुकिं यानाः छ्यं चासुइगु लिसें थीथी समस्या खनेदइ व छ्यनय् त्वँचा थाइ ।

त्वँचा खासयानाः छ्यःया छ्यंगुलि च्वंगु मृत्त कोशिकातय्गु हुनिं थाइ । उकिं त्वँचापाखें छुटकारा कायेगु नितिं छुं घरेलु विधि दु ।

चिकं मालिस :

छ्यंया फुक्क समस्या, खासयानाः त्वँचा न्हंकेगु दकले अप्वः प्रभावकारी उपचारी खः चिकं मालिस । चिकं मालिसपाखें छ्यंया सँयात पोषण प्राप्त जुइ । छ्यंया मांशपेशीत उत्तेजित जुइ व रक्तसंचार नं तिब्र जुइ । व, सँ स्वस्थ, सुन्दर, ख्वातुइगु व ताःहाकः जुइ । उकिं वालय् छक्वः चिकं तया: सँया मालिस याये अतिकं आवश्यक जू ।

बाफ :

मालिसलिपा सँपाखें फोहोरमैला सफा यायेगु नितिं बाफ बिइमाः । थुकिया नितिं क्वाःलखं रुमाल प्याकाः सँ बांलाक्क हुइगु । बाफपाखें सँया हाय् फसेजुयाच्वंगु फोहरमैला व मृत्त कोशिकात पिहाँ वइ व चिकं नं छ्यंया छ्यंगू दुने दुहाँ वनी । गुकिं यानाः सँया हा बल्लाइ व त्वँचाया समस्या नं मदयाः वनी ।

कागतीया रस :

थ्व सिजनय् कागती फालाफाल दइ । कागतीया रसय् भिटामिन सी, ए, बी, फस्फोरस व एन्टिअक्सीडेन्ट दइ । गुकिं सँ चमकदार व ख्वातुकाः बिइ ।

छ्यनय् त्वँचा दुसा क्वःगु चिकनय् कागतीया रस तयाः मालिस यायेबलय् त्वँचा नष्ट जुयावनी । लिसें सँ हाइगु समस्या नं तनावनी । म्वःल्हुइ न्ह्यः कागतीया रसं छ्यंया मालिस यानाः म्वःल्हुइबलय् नं फाइदा हे जुइ ।

धौ व मलय् :

धौया सेवनं छ्यंया छ्यंगूया रुखोपन नष्ट याइ । थुकिं त्वँचाया समस्या नं नष्ट याइ । धौलय् मलय् चुं ल्वाकछ्यानाः सँया मालिस धुंकाः म्वःल्हुइ माः । थ्व क्रिया वालय् निक्वःतक यायेमाः । थुकिं त्वँचा थाइमखुसा सँ नरम, हाकुइगु व ख्वातुइगु नं जुइ ।

अम्बः (अमला) :

स्वस्थ व सुन्दर सँया नितिं क्यारोटिन आवश्यक तत्व खः, गुगु तत्व अम्बलय् दइ । सँयात पोषण बिइत अम्बःया चिक. तयेफु । लिसेलिसें तुलसी व अम्बःया पाउडरया लेप दयेकाः थुगु लेपपाखें छ्यनय् मालिस यायेफु । त्वँचा गायब ।

अथेहे, थ्यंमथ्यं बाघौतक उगु लेप छ्यनय् तयातयेमाः । थ्वधुंकाः स्याम्पुं बांलाक्क म्वःल्हुइमाः । त्वँचाया समस्या समाधानया नितिं थ्व अतिकं प्रभावकारी उपाय खः ।

मीपाखें उपचार :

मी (मेथी)इ निकोटिनिक एसिड वा प्रोटिन दइ । गुकिं सँया हायात पोषण प्राप्त जुइ । थ्व लेपयात थःगु सँ व छ्यनलय् कम्ती नं बाघौतक तयातयेमाः । ३० मिनेटलिपा स्याम्पुं बांलाक्क म्वःल्हुइमाः । थुकिं त्वँचा न्हनावनी, सं मजबुत जुइ व सँ हाइगुपाखें नं छुटकारा प्राप्त जुइ ।

हाम्वःया चिकं :

हाम्वःया चिकं तयेबलय् सँ मजबुत, ख्वातुइगु, ताःहाकः जुइगु लिसेलिसें त्वँचा नं सखाप जुइ । थुकिया नितिं सँय् हाम्वःया चिकनं मालिस यायेमाः । मालिस लिपा सँयात क्वाःगु रुमालं चिनाः बाफ बिइमाः । न्यागू मिनेटलिपा म्वःल्हुइमाः । त्वँचा गायब ।