zero media family planning adv

छु छु संकिपा स्वयेदइ थुगुसी ?

विजयरत्न असंबरे

थगुने नगुने नेपालभाषाया संकिपा ख्यः छगू कथं शुन्यथें जूगु खः । थगुने स्वंगु अले नगुने प्यंगुजक नेवाः संकिपा पिदंगुलिइ ने.सं.११३५ दुने झिगु नेवाः फिल्म पिदंगु खनेदत । थ्व दच्छिया दुने तिमिला, लाय् मदु पसः कला मदु ससः, धम्मवति, पागलपन, टेम्पो चालक, स्यंगु छेँ, तापलय्, भौमचा, जि यम्ह पासा, नखः नापं याना मुकं झिगू नेवाः फिल्म पिदंगु खनेदतसा आः थुगुसी ने.सं.११३६ दुने अझ अप्वः नेवाः फिल्म पिदनिगु खनेदु । थुगुसी पिदनिगु नेवाः फिल्ममध्ये छुं छुं फिल्मत डिभिडि भिसिडिचा कथं पिदनिसा छुंछुं फिल्मया च्यारिटी शो जुइगु खनेदु ।

थुगुसी संकिपाया डिभिडिचालय् निर्देशक आर्यम नकःमिया लोकंह्वाना च्वंगु टेलिसिरीयल “ड्याड सन”या डिभिडिचा नं लाःगु  दु । थुगुसी पिदनिगु मेमेगु नेवाः फिल्मय् निर्देशक श्यामराजा श्रेष्ठया “मनू म्हसिकी” छगू नं खः । लोकंह्वाम्ह हिरोइन भिन्तुना जोशी व खस नेपाली भाय्या संकिपाय् नं हिरो जुया फिल्म म्हिते धुंकूम्ह विनोद श्रेष्ठया मेन रोल दूगु थ्व फिल्मया छगू निगू शो अमेरिकाय् नं जुइ धुंकल धाःगु न्यने दु । विनोद श्रेष्ठं थ्व “मनू म्हसिकी” सिबें न्ह्यः “पानवती”, “त्याग” थेंज्यागु नेवाः फिल्म नं म्हिते धुंकल । अथेंहेतुं थुगुसी निर्देशक सुरेश स्थापितया “ल्हा हुस्लुं प्वा फुस्लुं”नं पिदनिगु लँपुइ लानाच्वंगु दु ।  “फय्गं” थेंज्यागु सिरीयल दयेके धुंकूम्ह निर्देशक सुरेश स्थापितया थ्व फिल्म याकन हे पिहाँ वइगु लँपुइ लानाच्वंगु दु । अथेंहेतुं “तिन तिकः महाबिक” नांयागु छगू फिल्म नं थुगुसी हे पिदनीगु जूगु दु । निर्देशक प्रविण लाकौलया थ्व फिल्मय् कलिउडया नांजाम्ह आइटम डान्सर सुष्मा कार्कीया आइटम डान्स नं दुथ्याका तःगु दु । थूगुसी पिहाँ वइगु सम्भावना दूगु फिल्मय् ऐतिहासिकता व साँस्कृतिकतां जाःगु निगु फिल्म नं लाः व । अज्यागु फिल्मय् छगू  “जामन गुभाजु” खःसा मेगु “श्री करुणामय लोकेश्वर” खः । “जामन गुभाजु”या निर्देशक रवि साय्मि छम्ह नांजाम्ह क्यामेरापर्सन खः । थुके सुशील राजोपाध्यायभाजुं जामन गुभाजुया मेन रोल याइगु जूगु दुसाः थ्व फिल्मया बाखँ ऐतिहासिक बाखँ खः अले थुकिया निंतिं सुशील राजोपाध्यायभाजुं हे धकीं बाखँ व खँल्हाबल्हा च्वज्या यानाच्वंगु दु ।
छगु संजोग हे धायेमालि की “श्रीकरुणामय लोकेश्वर”या च्वज्या नं छम्ह कलाकार ज्ञानेन्द्र ईशाराजुं च्वया च्वनादीगु दु । “श्रीकरुणामय लोकेश्वर”या निर्देशन बासु शाहीजुं यानादीत्यंगु खः । खस नेपाली भाय् व नेवाः भाय् निगुलिं भाषां दयेकीगु थ्व फिल्मया निंतिं कलाकार ल्यःज्या धाःसा जूगु मदुनि । नन स्टप फिल्म मेकरया रुपय् चर्चितम्ह निर्देशक बासु शाहीभाजुं दयेके त्यंगु “श्रीकरुणामय लोकेश्वर”या भिं साइत याःगु ज्याझ्वलय् हे भिं साइत चूलाकुगु मेगु फिल्म “एक सय एक”नं थुगुसी हे पिदनिगु फिल्म खः । थुके रुपेन्द्र श्रेष्ठ व रजनी खड्गीया मेन रोल दइगु ग्वसाः दु । थ्व छगु सामाजिक विषयया फिल्मया पिदनिगु खँ दु । थुगुसी हे बासु शाहीया मेगु छगू फिल्म “तानाज्य” नं पिदनिगु जूगु दु । निदँ न्ह्यःहे तयार जूगु थ्व फिल्मय् नांजाम्ह लोकंह्वाम्ह कलाकार सबिन शाक्यया मेन रोल दुसा थुके अर्नेश्वरी शिल्पकार नं छगु रोलय् खनेदइगु जूगु दु ।

ने.सं.११३६ दुने आर्यम नकःमिया  “तुयुमति” पिदनिगु खँ दु थुके हिसिला महर्जनया नापनापं अर्नेश्वरी शिल्पकार व मनिष श्रेष्ठ लगायतया मू भुमिका दु । अथेहेतुं  “पटाचारा” थेंज्यागु स्वंगुस्वंगु राष्ट्रिय चलचित्र पुुुरस्कार त्याकेत ताःलागु फिल्मया निर्देशक रामकृष्ण खड्गीया निर्देशकया न्हूगु फिल्म “कृषा गौतमी”नं थुगुसी हे पिदनिगु फिल्म खः । खय्तला थ्व फिल्म ने.सं. ११३५ या स्वांया पुन्हि खुन्हु हे रिलिज जुइगु खँ दूगु खःसां थुगुसी तःभुखाय्या हुनिं रिलिज मजूगु खः । नेपाःया संकिपा ख्यःया नांजाम्ह व पुलांम्ह हिरो शिव श्रेष्ठया नं छगू मेन रोल दइगु थ्व फिल्मय् “पटाचारा”या हे जोडी कर्मा व मेलिना मानन्धरयन जोडी हाकनं छक्वः खनेदयेक वयेत्यंगु दु । “पटाचारा”थेंहेतुं “कृषा गौतमी”नं बुद्धकालिन बाखँनय् आधारित संकिपा खःसा थ्व फिल्म नं मेमेगु नेवाः फिल्म थें डिभिडीचालय्जक लिकुनिगु मखसे “पटाचारा”थेंहेंतुं गुण सिनेमा हलय् बकायदा रिलिज जुइगु फिल्म खः । “पटाचारा” व ्“कृषा गौतमी”या निर्माण ज्याय् ल्हा तःगु गुण सिनेमां थ्व निगु संकिपासिबें न्ह्यः“गोलमाल”व“शंकरा”नांयागु निगु नेवाः फिल्मय् नं लाय् तःगु खःसां थ्व निगुलिं फिल्म धाःसा आःतकं पिहां वःगु मदुनि । “पटाचारा” व “कृषा गौतमी”निगुलिं फिल्मया निर्देशक रामकृष्ण खड्गी जूथेंहेंतुं “गोलमाल”व“शंकरा”नांयागु निगुलिं फिल्मया निर्देशक राज शाक्य खः ।
आःतकं पिहां मवःनिगु नेवाः फिल्मय् निर्देशक सुरेन्द्र तुलाधरया दकले न्हापांगु पलाः कथं शुटिंगु शुरु जूगु “अंश”नं खःसा मेगु फिल्मय् निर्देशक प्रकाशराज मानन्धरया “काय्मचा ल्यायम्ह” नं खः । अथेहेतुं निर्देशक सुर्य श्रेष्ठया “थःगु छेँ” नं आ तक पिहाँ मवनिगु नेवाः फिल्म खः । थथे पिहाँ मवनिगु नेवाः फिल्म मेमेगु नं दयेफु । तर थ्व च्वसुतिइ अज्यागु दक्वं फिल्मया नां धाःसा दुथ्याकेगु कुतः जूगु खसां उलि ताःलाय् फया च्वंगु मदु । तर लिपा लिपा हाकनं अज्यागु संकिपाया नां दुथ्याकेगु कुतःधाःसा जुयांतुं च्वनि धइगु आस याये हे माः ।